Salmow 142 - An Bibel Kernewek 20234 (Kernewek Kemmyn)

Maskil a Davydh, pan esa y'n mogow.

¹ My a gri war an Arloedh gans ow lev, gans ow lev devri y hwrav ow govynnadow dhe'n Arloedh.

² My a dhyllo ow krodhvol a-dheragdho, my a dhiskwa a-dheragdho ow anken.

³ Pan glamderas ow spyrys a-bervedh ynnov ty a aswonnis ow hyns. Y'n fordh may kerdhyn i re gudhas maglenn er ow fynn.

⁴ Mir orth ow leuv dhyghow ha gwel, rag nyns eus denvyth a'm aswonno; skovva a fyllis dhymm, nyns eus neb a wittho ow enev.

⁵ My a armas warnas, A Arloedh; yn-medhav, ‘Ty yw ow skovva, ow rann yn tir an re vew.’

⁶ Goslow dhe'm garm; rag yth ov vy dres pur isel. Gwra ow delivra dhiworth ow helghysi, rag kreffa yns i agesov.

⁷ Doroy ow enev yn-mes a brison, may hwormelliv dha hanow. An re wiryon a omguntell a-dro dhymm, rag ty a vydh da orthiv.