Salmow 138 - An Bibel Kernewek 20234 (Kernewek Kemmyn)

Salm a Davydh.

¹ My a'th wormel, A Arloedh, a leun golonn; a-rag an duwow y kanav gormola.

² My a ombleg troha'th tempel sans, hag a wormel dha hanow, drefenn dha dregeredh ha'th wiryonedh, rag ty re veurhas dha hanow ha'th lavar a-ugh pup-tra.

³ Y'n jydh may helwis vy ty a worthybis dhymm, hag ynkressya nerth y'm enev.

⁴ Oll myghternedh an nor a'th wormel, A Arloedh, rag i re glewas lavarow dha anow.

⁵ Hag i a gan a fordhow an Arloedh, rag meur yw golewder an Arloedh.

⁶ Rag ughel yw an Arloedh, hwath ev a wra vri a'n re isel, mes a bellder ev a aswonn an re woethus.

⁷ Kyn kerdhav yn kres anken, ty a with ow bewnans; ty a ystynn dha leuv erbynn sorr ow eskerens, ha'th leuv dhyghow a'm saw.

⁸ An Arloedh a gowlwra y vynnas ragov; dha dregeredh, A Arloedh, a dhur bys vykken; na dhispres oberow dha dhiwleuv.