Salmow 132 - An Bibel Kernewek 20234 (Kernewek Kemmyn)

Salm gradhow.

¹ Porth kov, A Arloedh, a Davydh ha'y boenvos oll;

² Fatell dos ev ti dhe'n Arloedh ha lia li dhe Dhuw galloesek Yakob;

³ ‘Nyns av a-bervedh yn skovva ow chi na yskynna yn tyller ow gweli

⁴ ny rov kosk dhe'm dewlagas, na hun dhe greghyn ow dewlagas,

⁵ erna gyffiv tyller dhe'n Arloedh, trigva dhe Dhuw galloesek Yakob.’

⁶ Otta, ni a glewas anedhi yn Efratha, ha'y havoes yn gwelyow an koes.

⁷ ‘Gwren ni mos bys yn y drigvaow ev, hag omblegya a-dherag y skavell-droes.’

⁸ Sav, A Arloedh, a-berth y'th powesva, ty hag argh dha nerth.

⁹ Bedhes dha oferysi gwiskys yn ewnder, ha gwres dha syns garma yn lowen.

¹⁰ A-barth Davydh dha was na dreyl dhe-ves fas dha Untys.

¹¹ An Arloedh re dos ti yn gwiryonedh dhe Davydh; ny wra ev treylya dhiworto: ‘Onan a'n frut a'th korf a worrav war dha se.

¹² Mar kwra dha fleghes synsi ow hevambos, ha'm dustuniow a dhyskav dhedha, aga fleghes ynwedh bynitha a vydh esedhys war dha dron.’

¹³ Rag an Arloedh re dhewisas Sion, ev re yeunis war hy lergh dhe vos trigva dhodho:

¹⁴ ‘Hemma a vydh ow fowesva bynitha; omma y trigav, rag my re yeunis war hy lergh.

¹⁵ Hy boes yn tevri a vennigav; dh'y boghosogyon y rov bara lowr.

¹⁶ Hy oferysi a wiskav gans selwyans, ha'y syns a arm gans lowena.

¹⁷ Ena y hwrav dhe gorn Davydh egina; my re dhyghtyas lugarn dhe'm Untys.

¹⁸ Y eskerens my a wisk gans meth, mes warnodho y fydh y gurun ow splanna.’