Salmow 12 - An Bibel Kernewek 20234 (Kernewek Kemmyn)

Dhe vester an keur: war Sheminith. Salm a Davydh.

¹ Salw, A Arloedh, rag nyns eus unn dremas gesys; rag an dus len re dhifygyas mes a vebyon den.

² I a lever euveredh, pub den gans y hynsa; gans gweus fekyl ha kolonn dhewblek y kowsons.

³ An Arloedh a dregh oll gweusyow fekyl, an taves hag a lever bostow bras,

⁴ an re a lever, ‘Gans agan taves y tryghyn ni, agan gweusyow yw dhyn ni; piw yw arloedh warnan ni?’

⁵ ‘Drefenn an voghosogyon dhe vos ravnys, drefenn kynvann an edhommogyon, lemmyn my a sev’, yn-medh an Arloedh; ‘my a'n gorr y'n sawder a yeun ev.’

⁶ Lavarow an Arloedh yw lavarow glan, avel arghans teudhys yn forn a bri, purhes seythgweyth.

⁷ Ty a'gan syns, A Arloedh, ty a'gan gwith rag an genedhel ma bys vykken.

⁸ An debeles a gerdh a bub tu, ha bileni yw ughelhes yn mysk mebyon den.