Salmow 119 - An Bibel Kernewek 20234 (Kernewek Kemmyn)

¹ Gwynnvys an re yw heb namm y'n fordh, hag a gerdh yn lagha an Arloedh.

² Gwynnvys an re a with y dhustuniow, hag a'n hwila ev a leun golonn;

³ an re ynwedh na wra sherewneth, neb a gerdh yn y fordhow ev.

⁴ Ty re worhemmynnis may synsyn dha arghadowyow gans rach.

⁵ Unnweyth mar pe ow fordhow mar fast may hwrellen vy synsi dha ordenansow!

⁶ Ytho ny borthav meth, pan wrama vri a'th worhemmynnow oll.

⁷ My a ras dhis gans ewnder kolonn, pan dhyskav dha vreusow gwiryon.

⁸ My a syns dha ordenansow; na wra ow gasa yn tien.

⁹ Fatell wra den yowynk glanhe y hyns? Owth omwitha herwydh dha er.

¹⁰ A leun golonn my re'th hwilas; na as vy dhe vos yn stray dhiworth dha worhemmynnow.

¹¹ Dha lavarow re gudhis y'm kolonn, ma na begghiv er dha bynn.

¹² Ty yw benniges, A Arloedh; dysk dhymm dha ordenansow.

¹³ Gans ow diwweus re venegis vy oll breusow dha anow.

¹⁴ My re lowenhas yn fordhow dha dhustuniow kemmys hag yn kevoeth pub oll.

¹⁵ My a vynn prederi a'th arghadowyow, ha hwithra dha hynsyow.

¹⁶ My a lowenha y'th ordenansow; ha ny wrav ankevi dha er.

¹⁷ Bydh hel orth dha was, rag may pewiv, ha synsi dha er.

¹⁸ Igor ow dewlagas may hwelliv marthusyon dha lagha.

¹⁹ Alyon ov vy war an nor; na gudh dha worhemmynnow ragov.

²⁰ Ow enev yw konsumys gans hireth war-lergh dha vreusow pub dydh oll.

²¹ Ty re geredhis an re woethus; milliges yw an re a gammdremen dhiworth dha worhemmynnow.

²² Treyl a-dhiworthiv mewl ha despit, rag my re withas dha dhustuniow.

²³ Pennsevigyon ynwedh a esedhas ha kewsel er ow fynn, mes dha was a brederis a'th ordenansow.

²⁴ Dha dhustuniow ynwedh yw ow lowena, ow husulyoryon.

²⁵ Ow enev a len orth an doust; bewha vy herwydh dha er.

²⁶ My a dherivas ow fordhow, ha ty a'm gorthybis; dysk dhymm dha ordenansow.

²⁷ Gwra dhymm konvedhes fordh dha arghadowyow, ha my a breder a'th varthusyon.

²⁸ Yma ow enev ow teudhi dre voredh; krevha vy herwydh dha er.

²⁹ Kemmer dhiworthiv an fordh a falsuri, ha gront dhymm ras dha lagha.

³⁰ My re dhewisas an fordh a lenduri, ha'th vreusow re worris a-dheragov.

³¹ My re lenas orth dha dhustuniow; A Arloedh, na as vy dhe vos toellys.

³² Poenya a wrav yn fordh dha worhemmynnow, pan redh jy kennerth dhe'm kolonn.

³³ Dysk dhymm, A Arloedh, fordh dha ordenansow, ha my a's gwith bys y'n diwedh.

³⁴ Gwra dhymm konvedhes, ha my a with dha lagha; devri my a'n syns a leun golonn.

³⁵ Gwra dhymm mos yn hyns dha worhemmynnow, rag ynno yma ow lowena.

³⁶ Pleg ow holonn troha'th tustuniow, ha na wra hy flegya troha krefni.

³⁷ Treyl ow dewlagas dhe-ves, ma na wellons euveredh; bewha vy y'th fordh.

³⁸ Kollanw dha lavar rag dha was, neb a omre dhe own ahanas.

³⁹ Treyl dhe-ves an geredh a borthav own anedhi, rag da yw dha vreusow.

⁴⁰ Otta, my re yeunis war-lergh dha arghadowyow; bewha vy y'th ewnder.

⁴¹ Re dheffo dhymm dha dregeredh, A Arloedh, dha selwyans, herwydh dha lavar.

⁴² Ena my a yll gorthybi dhe'n den a'm kabel, rag my a drest yn dha er.

⁴³ Na gemmer an ger a wiryonedh yn-mes a'm ganow yn tien, rag my re fydhyas y'th vreusow.

⁴⁴ My a syns dha lagha pup-prys, bys vykken ha bynnari.

⁴⁵ Ha my a gerdh yn rydhses, rag my a hwila dha arghadowyow.

⁴⁶ My a gews a'th tustuniow a-dherag myghternedh, ha ny borthav meth.

⁴⁷ My a lowenha y'th worhemmynnow a wrugavy aga hara.

⁴⁸ Ha my a dhrehav ow diwleuv dhe'th worhemmynnow a geris, ha my a breder a'th ordenansow.

⁴⁹ Porth kov a'n ger orth dha was, ynno may hwruss'ta dhymmo fydhya.

⁵⁰ Hemm yw ow honfort y'm anken, rag dha lavar re'm bewhas.

⁵¹ Tus woethus re'm skornyas dres eghenn, byttegyns ny blegis vy dhiworth dha lagha.

⁵² My a borthas kov a'th vreusow re beu a-dhia'n oesow koth, ha konfort a gevis.

⁵³ Konnar a'm dalghennas drefenn an debeles, an re a forsak dha lagha.

⁵⁴ Dha ordenansow re beu kanow dhymm yn chi ow fergherinses.

⁵⁵ My re borthas kov a'th hanow yn nos, A Arloedh, ha my re synsis dha lagha.

⁵⁶ Hemma re beu ow usadow, rag my re withas dha arghadowyow.

⁵⁷ Ty yw ow rann, A Arloedh. My a ambos synsi dha eryow.

⁵⁸ My re hwilas dha fas a leun golonn; bydh grassyes orthiv herwydh dha lavar.

⁵⁹ My a brederis a'm fordhow ha treylya ow threys troha'th tustuniow.

⁶⁰ My a fistenas ha ny dhelatis an termyn rag synsi dha worhemmynnow.

⁶¹ Lovonow an debeles re'm kolmas, mes ny ankevis dha lagha.

⁶² Yn hanter-nos sevel a wrav rag grassa dhis, drefenn dha vreusow gwiryon.

⁶³ Koweth ov vy dhe seul a'th own hag a syns dha arghadowyow.

⁶⁴ An nor, A Arloedh, yw leun a'th tregeredh; dysk dhymm dha ordenansow.

⁶⁵ Ty re wrug da dhe'th was, A Arloedh, herwydh dha er.

⁶⁶ Dysk dhymm skians da ha godhvos, rag my re grysis y'th worhemmynnow.

⁶⁷ Kyns my dhe vos yn anken, my a gammdremenas, mes lemmyn my a syns dha lavar.

⁶⁸ Da osta jy ha grassyes; dysk dhymm dha ordenansow.

⁶⁹ An re woethus re'm droguras gans gowyow er ow fynn, mes my a with dha arghadowyow a leun golonn.

⁷⁰ Maga tew avel an blonek yw aga holonn, mes my a lowenha y'th lagha.

⁷¹ Da yw ow bos yn anken, rag may tyskiv dha ordenansow.

⁷² Gwell genev yw lagha dha anow ages milyow a owr hag a arghans.

⁷³ Dha dhiwleuv re'm gwrug ha'm formya; gwra dhymm konvedhes, may tyskiv dha worhemmynnow.

⁷⁴ An re a'th own a'm gwel ha lowenhe, rag my re fydhyas yn dha er.

⁷⁵ My a woer, A Arloedh, dha vreusow dhe vos gwiryon, hag yn lenduri ty dhe'm trobla.

⁷⁶ Bedhes dha dregeredh orth ow hebaskhe, herwydh dha ambos dhe'th was.

⁷⁷ Des dhymm dha druedh, may fiv vy bew; rag dha lagha yw ow lowena.

⁷⁸ Perthes an re woethus meth, rag gans falsuri y hwrussons kamm dhymm; mes my a breder a'th arghadowyow.

⁷⁹ Treylyes dhymmo vy an re a berth own ahanas, ha'n re a aswonn dha dhustuniow.

⁸⁰ Bedhes ow holonn perfydh y'th ordenansow, ma na berthiv meth.

⁸¹ Difygya a wra ow enev ow yeuni war-lergh dha selwyans; mes my a fydh yn dha er.

⁸² Ow dewlagas a fyll ow yeuni war-lergh dha lavar, ow leverel, ‘P'eur hwredh jy ow hebaskhe?’

⁸³ Rag desyghys ov vy avel botell yn mog; ny ankevis dha ordenansow

⁸⁴ Py lies yw dydhyow dha was? P'eur hwredh jy breus erbynn an re a wra ow helghya?

⁸⁵ An re woethus re gleudhyas pyttow ragov, nag yns herwydh dha lagha.

⁸⁶ Oll dha worhemmynnow yw fyrv. I a wra ow helghya gans falsuri; ty bydh gweres dhymmo vy.

⁸⁷ Nammna wrussens i ow hisya war an nor, mes ny skonis dha arghadowyow.

⁸⁸ Bewha vy herwydh dha dregeredh; yndellma y synsav dustuniow dha anow.

⁸⁹ Dha er, A Arloedh, yw desedhys fast bynitha yn nev.

⁹⁰ Yma dha lelder a unn henedh dhe'n nessa; ty re selyas an nor, hag ev a sev.

⁹¹ Herwydh dha vreusow i a dhur hedhyw, rag pup-tra oll yw dha servysi.

⁹² Na ve dha lagha ow lowena, devri my a vawrsa yn ow anken.

⁹³ Bynitha ny ankovav dha arghadowyow, rag dredha ty re'm bewhas.

⁹⁴ Ty a'm piw, salw vy; rag my re hwilas dha arghadowyow.

⁹⁵ An debeles re'm gortas rag ow hisya, mes my a breder a'th tustuniow.

⁹⁶ My re welas bos finweth dhe bub perfydhder, mes dha worhemmynn yw efan dres eghenn.

⁹⁷ Assa wrav vy kara dha lagha; oll an jydh my a breder anodho!

⁹⁸ Dre dha worhemmynnow ty re'm gwrug furra ages ow eskerens, rag ymons i genev bynitha.

⁹⁹ My a gonvedh moy ages ow dyskadoryon oll, rag my a breder yn town a'th tustuniow.

¹⁰⁰ My a gonvedh moy ages an henavogyon, drefenn my dhe witha dha arghadowyow.

¹⁰¹ My re withas ow threys rag pub drog hyns, rag may synsiv dha er.

¹⁰² Ny blynchis vy dhiworth dha vreusow, drefenn ty dhe dhyski dhymm.

¹⁰³ Ass yw hweg dha lavarow dhe'm stevnik, hwekka es mel dhe'm ganow!

¹⁰⁴ Dre dha arghadowyow my a gyv skentoleth; rakhenna my a gas pub drog hyns.

¹⁰⁵ Lugarn dhe'm treys yw dha er, ha golow dhe'm hyns.

¹⁰⁶ My re dos hag afydhya, my dhe synsi dha vreusow gwiryon.

¹⁰⁷ Troblys ov vy dres musur; bewha vy, A Arloedh, herwydh dha er.

¹⁰⁸ Degemmer, A Arloedh, an offrynnow bolonjedhek a'm ganow, ha dysk dhymm dha vreusow.

¹⁰⁹ Yma ow enev prest y'm leuv; byttegyns ny ankovav dha lagha.

¹¹⁰ An debeles re worras maglenn ragov, mes nyns yth vy yn stray dhiworth dha arghadowyow.

¹¹¹ My re gemmeras dha dhustuniow yn ertach bys vykken, rag lowena ow holonn yns i.

¹¹² My re worras ow holonn dhe wul dha ordenansow bys vykken, ha bys y'n diwedh.

¹¹³ My a gas an re yw dewblek aga brys, mes dha lagha a garav.

¹¹⁴ Ow hovva ha'm skoes osta jy; yn dha er jy y fydhyav.

¹¹⁵ Kewgh a-dhiworthiv, hwi dhrogoberoryon, rag may hwitthiv gorhemmynnow ow Duw.

¹¹⁶ Gwra ow mentena herwydh dha lavar, may fewiv, ha na as vy dhe vos toellys y'm govenek

¹¹⁷ Skoedh vy, may fiv saw, ha prest y lowenhav y'th ordenansow.

¹¹⁸ Ty a dhispres oll an re res eth yn stray dhiworth dha ordenansow, rag falsuri yw aga brys.

¹¹⁹ Ty a syns oll tebeles an nor dhe vos plosedhes; rakhenna my a gar dha dhustuniow.

¹²⁰ Ow hig a gren rag own ahanas, ha my a berth own a'th vreusow.

¹²¹ My re wrug gwirvreus hag ewnder; na as vy dhe'n re a'm gwask.

¹²² Gwra mewghya rag dha was er dader; na as an re woethus dhe'm arwaska.

¹²³ Ow dewlagas a fyll ow yeuni war-lergh dha selwyans, ha war-lergh lavar dha ewnder.

¹²⁴ Gwra dhe'th was herwydh dha dregeredh, ha dysk dhymm dha ordenansow.

¹²⁵ Dha was ov vy, gwra dhymm konvedhes rag may hwodhviv dha dhustuniow.

¹²⁶ Prys yw dhe'n Arloedh oberi, rag i re dhiswrug dha lagha.

¹²⁷ Rakhenna my a gar dha worhemmynnow moy ages owr, moy ages owr fin.

¹²⁸ Rakhenna my a gerdh yn ewn herwydh oll dha arghadowyow; my a gas pub hyns gowek.

¹²⁹ Marthys yw dha dhustuniow; rakhenna ow enev a's gwith.

¹³⁰ Diskwedhyans dha eryow a re golow; ev a re skians dhe'n re sempel.

¹³¹ My a igoras ow ganow, ha dyena, rag my a yeunis war-lergh dha worhemmynnow.

¹³² Treyl war-tu ha my, ha bydh grassyes orthiv, herwydh dha usadow orth an re a gar dha hanow.

¹³³ Orden ow hammow y'th lavar, ha na wres drogoberow maystri warnav.

¹³⁴ Daspren vy dhiworth arwask den, may synsiv dha arghadowyow.

¹³⁵ Gwra dhe'th fas splanna war dha was, ha dysk dhymm dha ordenansow.

¹³⁶ Ow dewlagas a dhewrak gans goverow a dhowr drefenn na synsir dha lagha.

¹³⁷ Gwiryon osta, A Arloedh, hag ewnhynsek yw dha vreusow.

¹³⁸ Ty re worhemmynnis dha dhustuniow yn ewnder, ha len dres eghenn yns i.

¹³⁹ Tan ow holonn re'm distruis, drefenn ow eskerens dhe ankevi dha eryow.

¹⁴⁰ Dha lavar yw pur dres eghenn, ha'th was a'n kar.

¹⁴¹ Byghan ov vy ha dispresys, mes ny ankovav dha arghadowyow.

¹⁴² Dha ewnder yw ewnder nevra a bes, ha dha lagha yw gwirder.

¹⁴³ Anken ha poesyjyon re'm kemmeras, mes dha worhemmynnow yw ow lowena.

¹⁴⁴ Ewnder dha dhustuniow a dhur bys vykken; gwra dhymm konvedhes, ha my a vew.

¹⁴⁵ My re elwis a leun golonn; gorthyp dhymm, A Arloedh. My a with dha ordenansow.

¹⁴⁶ My re elwis warnas; gwra ow selwel, may synsiv dha dhustuniow.

¹⁴⁷ My a sev kyns dydh-tardh ha kria; yn dha eryow y fydhyav.

¹⁴⁸ Ow dewlagas a dhifun kyns goelyow an nos, rag may prederriv a'th lavar.

¹⁴⁹ Klew ow lev, A Arloedh, herwydh dha dregeredh; bewha vy herwydh dha vreusow.

¹⁵⁰ An re a'm helgh gans sherewneth a dheu yn ogas, ha pell ymons i dhiworth dha lagha.

¹⁵¹ Ogas osta, A Arloedh, hag oll dha worhemmynnow yw gwir.

¹⁵² Seuladhydh my re wodhva dhiworth dha dhustuniow ty dh'aga fondya bynitha.

¹⁵³ Mir orth ow anken, ha gwra ow delivra, rag ny ankevis vy dha lagha.

¹⁵⁴ Pled ow hen, ha daspren vy; bewha vy herwydh dha lavar.

¹⁵⁵ Pell yw selwyans a'n debeles, rag ny hwilons dha ordenansow.

¹⁵⁶ Meur yw dha druedh, A Arloedh; bewha vy herwydh dha vreusow.

¹⁵⁷ Meur aga niver yw ow helghysi ha'm eskerens, byttegyns ny dreylis vy dhiworth dha dhustuniow.

¹⁵⁸ My a welas an re dhislen, ha keudh a'm beu, rag ny synsons dha lavar.

¹⁵⁹ Mir fatell garav dha arghadowyow; bewha vy, A Arloedh, herwydh dha dregeredh.

¹⁶⁰ Sommenn dha er yw gwirder, ha pubonan a'th vreusow gwiryon a dhur bys vykken.

¹⁶¹ Pennsevigyon re'm helghyas heb ken, mes ow holonn a gren rag dha er.

¹⁶² Lowen ov vy orth dha lavar avel nebonan a gyv meur a breydh.

¹⁶³ Falsuri a gesis vy, ha'y skonya, mes dha lagha a garav.

¹⁶⁴ Seythgweyth y'n jydh y'th wormolav drefenn dha vreusow gwiryon.

¹⁶⁵ Kres meur a vydh dhe'n re a gar dha lagha, ha nyns eus travyth a wrello dhedha trebuchya.

¹⁶⁶ My re wortas dha selwyans, A Arloedh, ha kollenwel dha worhemmynnow.

¹⁶⁷ Ow enev re synsis dha dhustuniow, ha my a's kar yn feur.

¹⁶⁸ My re synsis dha arghadowyow ha'th tustuniow, rag bos oll ow fordhow a-dheragos.

¹⁶⁹ Re dheffo ow garm nes a-dheragos, A Arloedh; gwra dhymm konvedhes, herwydh dha er.

¹⁷⁰ Des ow govynnadow a-dheragos; gwra ow delivra herwydh dha lavar.

¹⁷¹ Ow diwweus a lever gormola, drefenn ty dhe dhyski dhymm dha ordenansow.

¹⁷² Ow thaves a gews a'th lavar, rag oll dha worhemmynnow yw ewnder.

¹⁷³ Bedhes dha leuv orth ow gweres, rag dha arghadowyow a dhewisis.

¹⁷⁴ My re yeunis war-lergh dha selwyans, A Arloedh, ha'th lagha yw ow lowena.

¹⁷⁵ Bewes ow enev, hag ev a'th wormel, ha gwres dha vreusow ow gweres.

¹⁷⁶ My re wandras yn sowdhan avel davas yw kellys; hwila dha was, rag ny ankevis dha worhemmynnow.