Salmow 107 - An Bibel Kernewek 20234 (Kernewek Kemmyn)

LYVER V

¹ Grassewgh dhe'n Arloedh, rag ev yw da; rag y dregeredh a dhur bys vykken.

² Leveres yn kettellma an re dasprenys gans an Arloedh, a wrug ev dhe dhasprena dhiworth dorn an eskar,

³ ha'n re a guntellas ev mes a'n powyow, dhiworth an howldrevel ha dhiworth an howlsedhes, dhiworth an kledh ha dhiworth an dyghow.

⁴ I a wandras y'n difeyth hag yn fordh an gwylvos, ny gavsons sita may trykkens ynni;

⁵ nown a's teva ha syghes, aga enev a glamderas ynna.

⁶ Ena i a elwis war an Arloedh yn aga foenvos, hag ev a's delivras dhiworth aga ankres.

⁷ Hag ev a's hembronkas war an fordh ewn, mayth ellens dhe sita dhe driga ynni.

⁸ A krassens i dhe'n Arloedh y dregeredh, ha'y varthusyon rag mebyon den!

⁹ Rag ev a re lowr dhe'n enev syghesik, hag ev a lenow a dhader an enev nownek.

¹⁰ Seul a esedh yn tewolgow hag yn skeus ankow, kelmys yn anken ha horn,

¹¹ drefenn i dhe omsettya erbynn lavarow Duw, ha dispresya kusul an Ughella;

¹² Ev a iselhas aga holonn gans lavur; i a drebuchyas, ha nyns esa denvyth a's gweressa.

¹³ Ena i a elwis war an Arloedh yn aga foenvos, hag ev a's delivras dhiworth aga ankres.

¹⁴ Ev a's dros yn-mes a dewolgow ha skeus ankow, hag a dorras aga holmow dhe demmyn.

¹⁵ A krassens i dhe'n Arloedh y dregeredh, ha'y varthusyon rag mebyon den!

¹⁶ Rag ev re dorras an porthow a vrons, ha treghi an barrys a horn.

¹⁷ Re anedha o klav drefenn aga threuspass, ha drefenn aga hammweyth yth ens i pystigys.

¹⁸ Aga enev a aborryas boes a bub eghenn, hag i a dheuth nes dhe borthow ankow.

¹⁹ Ena i a elwis war an Arloedh yn aga foenvos, hag ev a's delivras dhiworth aga ankres.

²⁰ Ev a dhannvonas y er ha'ga sawya, ha'ga delivra dhiworth terroes.

²¹ A krassens i dhe'n Arloedh y dregeredh, ha'y varthusyon rag mebyon den!

²² Ha gwrens i offrynna offrynnow grasyans, ha derivas y wriansow gans kanow lowena.

²³ Kemmys a yn-nans dhe'n mor yn gorholyon, ow kul negys yn dowrow meur;

²⁴ an re ma re welas gwriansow an Arloedh, ha'y varthusyon y'n downder.

²⁵ Ev a gewsis, ha drehevel an hager-awel, hag a sevis tonnow an mor.

²⁶ I a yskynnas dhe'n nevow, ha diyskynna dhe'n downderyow; aga enev a deudhis drefenn poenvotter;

²⁷ i a droyllyas ha trebuchya kepar ha den medhow, hag oll aga skians a fyllis.

²⁸ Ena i a elwis war an Arloedh yn aga foenvos, hag ev a's delivras dhiworth aga ankres.

²⁹ Ev a wrug an hager-awel kalmynsi, may tewis tonnow an mor.

³⁰ Ena yth ens i heudhik rag aga bos kosel, hag ev a's hembronkas bys y'n porth may fynnsons bos.

³¹ A krassens i dhe'n Arloedh y dregeredh, ha'y varthusyon rag mebyon den!

³² Ha gwrens i y ughelhe yn kuntelles an bobel, ha'y wormel yn kuntellva an henavogyon.

³³ Ev a wra dhe avonyow bos difeyth, ha dhe fentynyow dowr bos tir sygh.

³⁴ Ev a wra dhe dir leun a frut bos difeythtir, drefenn sherewneth an re usi trigys ynno.

³⁵ Ev a dreyl an difeyth dhe boll a dhowr, ha tir sygh dhe fentynyow dowr.

³⁶ Hag ena y hwra ev dhe'n re nownek triga, may tarbarrons sita dhe driga ynni;

³⁷ ha gonis has yn parkow, ha plansa gwinlannow, hag a re frut ha trevas.

³⁸ Hag ev a's bennik, mayth ynkressyons yn fras, ha ny as aga gwarthek dhe lehe.

³⁹ Mes pan yns i lehes ha plegys dhe'n dor der arwask, anken ha galar,

⁴⁰ ev a dhinwa despit war bennsevigyon ha gul dhedha gwandra yn difeyth hepfordh;

⁴¹ mes ev a dhrehav an boghosek mes a anken, hag a wra teyluyow ragdho avel flokk.

⁴² An re ewnhynsek a wel henna, ha lowenhe; ha pub sherewneth a dhege y anow.

⁴³ Piwpynag a vo fur, avisyes a'n taklow ma, ha prederens i a dregeredh an Arloedh.