Salmow 106 - An Bibel Kernewek 20234 (Kernewek Kemmyn)

¹ Gormelewgh an Arloedh. Grassewgh dhe'n Arloedh, rag ev yw da, rag y dregeredh a dhur bys vykken.

² Piw a yll kewsel a wriansow nerthek an Arloedh po diskwedhes oll y wormola?

³ Gwynnvys an re a syns gwirvreus, hag a wra ewnder pup-prys.

⁴ Porth kov ahanav, A Arloedh, herwydh dha ras orth dha bobel; deus dhymm gans dha selwyans;

⁵ rag may hwelliv sewenyans an re dewisys genes, ha lowenhe yn heudhder dha genedhel, ha bostya gans dha ertach.

⁶ Ni re beghas gans agan tasow; ni re wrug kammweythres ha sherewneth.

⁷ Agan tasow yn Ejyp ny gonvedhsons dha varthusyon, na perthi kov a'th tregeredh veur, mes i a rebellyas ryb an mor, ryb an Mor Rudh.

⁸ Byttegyns ev a's selwis a-barth y hanow, rag may hwrella dh'y wriansow nerthek bos aswonnys.

⁹ Hag ev a geredhis an Mor Rudh, ha desyghys veu; ytho ev a's hembronkas der an downderyow kepar ha der an difeyth.

¹⁰ Hag ev a's selwis a leuv an re a's kasas, ha'ga dasprena dhiworth leuv an eskar.

¹¹ An dowrow eth dres aga eskerens; nyns o nagonan anedha gesys.

¹² Ena i a gryssons dh'y eryow ev; i a ganas y wormola.

¹³ Hware yth ankovsons y wriansow; ny wortsons y gusul.

¹⁴ Mes drokhwans krev a dheuth warnedha y'n difeyth; hag i a brovas Duw y'n gwylvos.

¹⁵ Hag ev a wrontyas dhedha aga govynnadow, mes dannvon kleves fell yn aga enev.

¹⁶ Hag i a borthas avi orth Moyses yn mysk an tyldow, hag orth Aron, sans an Arloedh.

¹⁷ An dor a igoras ha kollenki Dathan, ha kudha kuntelles Abiram.

¹⁸ Ha tan a dardhas yn aga huntelles; an flamm a loskas an debeles.

¹⁹ I a wrug leugh yn Horeb ha gordhya an imaj teudh.

²⁰ Ytho i a dreylyas aga gordhyans dhe hevelep ojyon ow tybri gwels.

²¹ I a ankovas Duw aga Selwyas, neb re wrug gwriansow meur yn Ejyp,

²² gwriansow marthys yn pow Ham, ha gwriansow euthyk ryb an Mor Rudh.

²³ Rakhenna ev a leveris y hwrussa aga diswul, na saffa Moyses y dhewisys a-dheragdho y'n aswa, rag treylya y sorr dhe-ves ma na's diswrello.

²⁴ Ena i a skornyas an tir teg, ha ny gryssons dh'y er ev;

²⁵ mes i a grodhvolas yn aga thyldow; ny woslowsons orth lev an Arloedh.

²⁶ Ytho ev a dhrehevis y leuv er aga fynn dh'aga domhwel y'n difeyth,

²⁷ dhe wul dh'aga has koedha yn mysk an kenedhlow, ha dh'aga skattra y'n broyow.

²⁸ Hag i a lenas orth Baal-peor, ha dybri offrynnow an re varow.

²⁹ Yndella i a'n sorras der aga gwriansow, ha'n pla a dardhas yn aga mysk.

³⁰ Ena Finehas a sevis ha breusi, ha'n pla a hedhis.

³¹ Hag y feu henna reknys dhodho avel ewnder a unn henedh dhe'n nessa bys vykken ha bynnari.

³² I a'n sorras ynwedh ryb dowrow Meriba, may porthas Moyses dregynn a-barth dhedha;

³³ Rag i a rebellyas erbynn y spyrys, may kewsis yn tibreder gans y dhiwweus.

³⁴ Ny dhiswrussons an kenedhlow kepar dell worhemmynnis an Arloedh dhedha;

³⁵ Mes i a veu kemmyskys gans an kenedhlow ha dyski aga gwriansow.

³⁶ Hag i a servyas aga fals dhuwow, o antell dhedha.

³⁷ I a offrynnas aga mebyon ha'ga myrgh dhe'n dywolow;

³⁸ ha skoellya goes gwiryon, goes aga mebyon ha'ga myrgh, neb a offrynnsons dhe dhuwow Kanan; ha'n tir a veu defolys gans goes.

³⁹ Yndella i a veu mostys yn aga gwriansow aga honan, hag i a omdhug avel horys yn aga gwriansow.

⁴⁰ Rakhenna sorr an Arloedh a dhewis erbynn y bobel, hag ev a aborryas y ertach y honan.

⁴¹ Hag ev a's ros yn leuv an kenedhlow, ha'n re a's kasas a wrug maystri warnedha.

⁴² Ha'ga eskerens a's gwaskas, hag i a veu fethys yn-dann aga diwleuv.

⁴³ Lieskweyth ev a's delivras, mes i a rebellyas erbynn y gusul, hag a veu dres isel yn aga hammweyth.

⁴⁴ Byttegyns ev a welas aga anken pan woslowas ev orth aga garm.

⁴⁵ Hag ev a borthas kov a'y gevambos a'ga govis i, hag edrek a'n jeva herwydh y dregeredh meur;

⁴⁶ hag ev a wrug dhedha kavoes truedh dhiworth oll an re a's kemmeras yn kethneth.

⁴⁷ Salw ni, A Arloedh agan Duw, ha kuntell ni yn-mes a'n kenedhlow, may hwodhven gras dhe'th hanow sans ha bostya y'th wormola.

⁴⁸ Benniges re bo an Arloedh, Duw Ysrael, trank heb worfenn ha bys vykken ha bynnari. Ha leveres oll an bobel, ‘Amen.’ Gormelewgh an Arloedh.