Salmow 103 - An Bibel Kernewek 20234 (Kernewek Kemmyn)

Salm a Davydh.

¹ Bennik an Arloedh, ow enev, ha pup-tra eus ynnov, bennik y hanow sans.

² Bennik an Arloedh, ow enev, ha na ankov oll y dhader;

³ Neb a av dhis oll dha gammweyth, neb a yaghha oll dha glevesow,

⁴ Neb a dhaspren dha vewnans dhiworth an pytt, orth dha guruna gans tregeredh ha truedh,

⁵ neb a'th lenow a dhader hedre vi bew mayth yw nowydhhes dha yowynkneth kepar ha'n er.

⁶ An Arloedh a wra ewnder ha gwirvreus dhe seul yw arweskys.

⁷ Ev a dherivas y fordhow dhe Moyses, ha'y wriansow dhe vebyon Ysrael.

⁸ An Arloedh yw truedhek ha grassyes, lent ow serri ha meur y dregeredh.

⁹ Ny vydh ev prest ow keredhi, ha ny syns ev y sorr bynitha.

¹⁰ Ny wrug ev dhyn war-lergh agan peghosow, nag attyli dhyn war-lergh agan kammweythresow;

¹¹ rag mar ughel dell usi an ebron a-ugh an nor, mar vras yw y dregeredh orth an re a berth own anodho;

¹² mar bell dell usi an howldrevel dhiworth an howlsedhes, mar bell re worras ev agan kammwriansow dhiworthyn ni.

¹³ Avel tas a gemmer truedh a'y fleghes, yndellma an Arloedh a gemmer truedh a'n re a berth own anodho.

¹⁴ Rag ev a aswonn agan devnydh; yma kov dhodho agan bos doust.

¹⁵ Dydhyow mab-den yw avel gwels; avel bleujenn an gwel, yndella y fleujyow ev;

¹⁶ an gwyns a dremen dresti, ha gyllys yw, ha ny aswonnir hy thyller byth moy.

¹⁷ Mes tregeredh an Arloedh re beu bythkweth hag a vydh bys vykken war an re a berth own anodho, ha'y ewnder dhe fleghes aga fleghes;

¹⁸ dhe seul a syns y gevambos hag a berth kov a'y arghadowyow, orth aga hollenwel.

¹⁹ An Arloedh re fastyas y se y'n nevow, ha'y wlaskor a wra maystri war bup-tra.

²⁰ Bennigewgh an Arloedh, hwi eledh ev, hwi alloesogyon a wra herwydh y er ev, seul a woslow orth y lev pan gews ev.

²¹ Bennigewgh an Arloedh, oll y luyow, y venystrys neb a wra y vodh.

²² Bennigewgh an Arloedh, oll y oberow, yn pub tyller a'y vaystri. Ow enev, bennik an Arloedh.