Ruth 3 - An Bibel Kernewek 20234 (Kernewek Kemmyn)

Ruth ha Boaz orth an Leur-drushya

¹ Hag yn-medh Naomi hy hweger dhedhi, ‘Ow myrgh, a ny hwilav ragos powes, may fo da genes?

² Lemmyn, Boaz, mayth eses owth oberi gans y vaghtethyon, a nyns yw ev agan neskar? Otta, haneth yn nos yma ev ow kwynsella heydh dhe'n leur-drushya.

³ Ytho gwra omwolghi, hag omuntya hag omwiska, ha ke yn-nans dhe'n leur-drushya. Mes gwayt na as dhe'n gour godhvos dha vos ena bys pan worfenno ev dybri hag eva.

⁴ Pan wrowedh ev dhe goska, merk an tyller may hwrowedh. Ena ke, gwra diskudha y dreys ha growedha rybdho. Ev a wra derivas dhis an pyth a dhegoedh dhis y wul.’

⁵ Ruth a worthybis dhedhi, ‘Pup-tra a leversys dhymm y wul, henna a wrav.’

⁶ Ytho hi eth yn-nans dhe'n leur-drushya ha gul pup-tra par dell wrussa hy hweger gorhemmynna dhedhi y wul.

⁷ Pan worfennsa Boaz dybri hag eva, ha lowen y golonn, ev eth dhe wrowedha dhe benn an bern greun. Ena Ruth a gramyas yn kosel ha diskudha y dreys ha growedha rybdho.

⁸ Ha dell hwarva, yn kres an nos, an gour dhe grena ha treylya hag otta, yth esa benyn ow krowedha ryb y dreys.

⁹ Hag yn-medh ev, ‘Piw osta?’ Ha hi a worthybis dhodho, ‘Ruth ov vy, dha vaghteth. Gwra lesa dha lostenn dres dha vaghteth, rag dha vos agan neskar.’

¹⁰ Hag yn-medh ev, ‘Bennigys osta gans an Arloedh, ow myrgh, moy yw dha guvder y'n diwedh es y'n dalleth. Rag ny wruss'ta mos war-lergh an wer yowynk, po boghosek po rych.

¹¹ Ha lemmyn, ow myrgh, na borth own, my a vynn gul ragos pup-tra re leversys, drefenn oll ow fobel y'n dre a woer dha vos benyn leun a vertu.

¹² Lemmyn, gwir yw ow bos neskar, mes yma neskar arall neb yw kar nes es dell ov vy.

¹³ Gorta omma haneth, ena ternos vyttin; ytho, mar fynn ev dha dhemmedhi, yndella re bo, ha mar ny vynn ev gul yndella, ena my a vynn dha dhemmedhi, mar sur dell vew an Arloedh. Kosk omma bys vyttin.’

¹⁴ Ha hy a wrowedhas ryb y dreys bys vora, ha sevel kyns den dhe alloes aswonn den arall. Yn-medh ev dhedhi, ‘Bynner re bo ev konvedhys bos benyn omma y'n leur-drushya.’

¹⁵ Ena ev a leveris, ‘Doro an warrlenn usi warnas, ha sett dalghenn ynni’, ha hi a's synsis fast hag ev a vusuras hwegh musur a heydh ha'y worra war hy diwskoedh. Ena ev eth dhe'n dre.

¹⁶ Ha hi a dhehwelis dh'y hweger, neb a wovynnas, ‘Fatell wruss'ta spedya, ow myrgh?’ Ha hi a dherivas dhedhi pup-tra re wrussa an gour rygdhi.

¹⁷ Hag yn-medh hi, ‘Ev re ros dhymm an hwegh musur ma a heydh, rag ev a leveris dhymm, “Na ge dhe'th hweger gwag dha dhiwla.” ’

¹⁸ Ena yn-medh Naomi, ‘Gorta omma, ow myrgh, erna wodhvi fatell goedh an mater ma, rag ny wra an gour powes marnas ev a wra ervira an mater hedhyw.’