Romanyon 5 - An Bibel Kernewek 20234 (Kernewek Kemmyn)

Agan Selwyans yn Yesu Krist

¹ Rag a-ban on justifiys dre fydh, kres a'gan beus gans Duw der agan Arloedh Yesu Krist

² ma'gan beus dredho entra dre fydh dhe'n gras may sevyn ynno ha ni a vost yn agan govenek may kevrennyn golewder Duw.

³ Dres henna, ni a bost yn agan galarow, ow kodhvos galar dhe dhri perthyans,

⁴ ha perthyans a dhre prevyans, ha prevyans a dhre govenek,

⁵ ha ny fyll govenek dhyn, rag kerensa Duw dhe vos dinewys yn agan kolonn der an Spyrys Sans re beu res dhyn.

⁶ Ha ni hwath heb gweres, dhe'n ewn dermyn y ferwis Krist rag an re ongrassyes.

⁷ Praga, skant ny vynnir merwel rag den gwiryon – kyn fedhir martesen merwel rag densa.

⁸ Mes Duw a dhiskwa y gerensa dhyn drefenn Krist dhe verwel ragon ha ni hwath peghadoryon.

⁹ Ytho a-ban on justifiys gans y woes, dhe voy y fydhyn selwys dredho a gonnar Duw.

¹⁰ Rag mars en unnverhes gans Duw, ha ni hwath eskerens, dre vernans y Vab, kemmys moy, wosa ni dhe vos unnverhes y fydhyn selwys gans y vewnans.

¹¹ Yndella ha nahen, mes ni a vost yn Duw der agan Arloedh Yesu Krist, may kevsyn dredho lemmyn agan unnverheans.

Adam ha Krist

¹² Ytho dell dheuth pegh a-bervedh y'n bys der unn den ha mernans dre begh, hag yndella mernans a lesas dhe dus oll drefenn dus oll dhe begha –

¹³ yth esa pegh a-bervedh y'n bys kyns an lagha dhe vos, mes nyns yw reknys avel pegh pan nag eus lagha.

¹⁴ Byttegyns mernans a reynyas a-dhia Adam bys yn termyn Moyses, ha war an re ynwedh nag o aga feghosow haval dhe dreuspass Adam, neb yw figur anodho ev neb a vedha ow tos.

¹⁵ Mes nyns yw an ro rydh haval dhe'n kammweythres. Rag mar merwis lies dre dreuspass unn den, kemmys moy re balshas gras Duw ha'n ro rydh yn gras an unn den Yesu Krist rag lies.

¹⁶ Ha nyns yw an ro rydh haval dhe siwyans pegh an unn den na. Rag an vreus owth holya unn pegh a dhug dampnya, mes an ro rydh owth holya lies pegh a dheg ewnheans.

¹⁷ Mar reynya mernans dre gammwrians unn den der an unn den na, kemmys moy y hwra reynya yn bewnans an re hag a gemmer palster a'n ras ha'n ro rydh a ewnder der an unn den Yesu Krist.

¹⁸ Ytho dell dhug drogober unn den dampnasyon tus oll, yndella ober gwiryon unn den a dheg ewnheans ha bewnans rag tus oll.

¹⁹ Ytho dell veu lies gwrys peghadoryon dre dhiwostytter unn den, yndella dre wostytter unn den lies a vydh gwrys gwiryon.

²⁰ Mes an lagha a dheuth, rag palshe an kammweythres; mes y'n tyller may palshi pegh, gras a balshi dhe voy,

²¹ rag may kwrella gras reynya par dell reynya pegh yn mernans, der ewnder dhe vewnans heb diwedh dre Yesu Krist agan Arloedh.