Romanyon 4 - An Bibel Kernewek 20234 (Kernewek Kemmyn)

Patron Abraham

¹ Pandr'a leveryn ytho y hwrug Abraham y gavoes, agan hendas war-lergh an kig?

² Rag mar peu Abraham justifiys der oberow, ev a'n jeves bostya, marnas a-rag Duw.

³ Rag pandr'a lever an skryptor? ‘Abraham a fydhyas yn Duw ha homm o akontys dhodho avel ewnder.’

⁴ Lemmyn dhe neb a lavur nyns yw an gober reknys avel ro mes avel kendon.

⁵ Ha dhe neb na lavur mes neb a drest ynno ev neb a justifi an den ongrassyes, y reknir y fydh avel ewnder.

⁶ Yndella Davydh a gews a vennesikter an den neb yw reknys ewn gans Duw heb oberow:

⁷ ‘Gwynnvys an re gevys dhedha aga hammweythyow ha kudhys aga feghosow;

⁸ gwynnvys an gour ma na reken an Arloedh y begh er y bynn.’

⁹ Yw an vennath ma war an re drodreghys, po war an re na's teves an trodreghyans ynwedh? Ni a lever, ‘Fydh Abraham a veu akontys avel ewnder.’

¹⁰ Fatell veu reknys ytho? A veu ev trodreghys po na? Ny veu trodreghys hwath, mes antrodreghys.

¹¹ Ev a'n jeva an tokyn a drodreghyans a-wosa, sel a'n ewnder a'n jevo seulabrys dre fydh hag ev hwath antrodreghys; may fo gwrys tas peub eus ow krysi kyn fo antrodreghys; may fo ewnder akontys dhedha i ynwedh.

¹² Hag yndella ev yw tas an re trodreghys, an re nag yns unnsel trodreghys, mes ynwedh ymons ow kerdhes yn olow fydh agan tas ni Abraham kyns ev dhe vos trodreghys.

An Ambos Kowlwrys dre Fydh

¹³ Rag ny dheuth der an lagha an ambos dhe Abraham ha'y henedh y fedha ev her an bys mes der ewnder an fydh.

¹⁴ Rag mara pydh an re a hol an lagha heryon, fydh yw gwag ha'n ambos re beu distruys.

¹⁵ Rag an lagha a wra konnar, mes le nag eus lagha nyns eus torrva-lagha.

¹⁶ Ytho an ambos a dheu dhiworth fydh, may fo dre ras ha may fo surhes dhe oll y dhiyskynnysi – na vo unnsel dhe'n re a hol an lagha mes ynwedh dhe'n re usi a fydh Abraham, neb yw tas dhyn ni oll.

¹⁷ Dell yw skrifys, ‘My re'th wrug tas kenedhlow pals’ – a-rag an Duw may fydhyas ynno, neb a re bewnans dhe'n re varow hag a elow dhe vosva an taklow na's teves bosva.

¹⁸ Neb a grysi yn govenek dres govenek y to ha bos ‘an tas dhe genedhlow pals’, dell via leverys, ‘Yndella y fydh dha henedh.’

¹⁹ Ha nyns esa ow kwannhe yn fydh pan brederi y farwsa y gorf y honan drefenn ev dhe vos a-dro dhe gans bloedh, po pan brederi y farwsa torr Sara.

²⁰ Ny'n gwre diskryjyans vyth mayth hokya a-dro dhe ambos Duw, mes y feu krevhes y'n fydh ow kormel Duw,

²¹ hag ow pos sur y hylli Duw gul an pyth re ambossa.

²² Dredhi ynwedh ‘Rakhenna feu akontys dhodho avel ewnder.’

²³ Mes ny veu an geryow, ‘y feu akontys dhodho’ skrifys unnsel ragdho ev,

²⁴ mes ragon ni ynwedh. Akontys vydh dhyn ni hag a fydh ynno ev neb a dhrehevis Yesu agan Arloedh dhiworth an re varow,

²⁵ neb a veu res dhe'n mernans drefenn agan drogoberow ha drehevys rag may fen ni kevys ewn.