Oberow 9 - An Bibel Kernewek 20234 (Kernewek Kemmyn)

Treylyans Sowl

¹ Mes Sowl, hwath owth anella godrosow ha denladh erbynn dyskyblon an Arloedh, eth dhe'n arghoferyas,

² ha pysi dhiworto lytherow dhe'n synagys yn Damaskus may trolla yn kelmys dhe Yerusalem myns a dus an Fordh a gaffa, ha gwer ha benynes.

³ Lemmyn, hag ev ow mos, y hwarva pan esa ow tos nes dhe Damaskus, a-dhesempis golow mes a nev a splannas a-dro dhodho,

⁴ hag ev a goedhas dhe'n dor, ha klewes lev ow leverel dhodho, ‘Sowl, Sowl, prag y'm helghydh vy?’

⁵ Yn-medh ev, ‘Piw osta, Arloedh?’ Hag ev a leveris, ‘My yw Yesu, neb a helghydh.

⁶ Mes sav yn-bann, ke a-ji dhe'n sita, ha leverys vydh dhis an pyth a dhelledh ty dhe wul.’

⁷ Lemmyn an wer esa ow vyajya ganso a sevis avlavar, ow klewes an son, mes heb gweles denvyth.

⁸ Sowl a sevis dhiworth an dor ha pan veu igerys y dhewlagas, ny welas travyth; hag orth y ledya er an leuv, i a'n dros yn Damaskus.

⁹ Ha tri dydh ny ylli gweles, ha ny dhybris nag eva.

¹⁰ Lemmyn yth esa yn Damaskus unn dyskybel henwys Ananias, ha'n Arloedh a leveris dhodho yn hunros, ‘Ananias.’ Hag yn-medh ev, ‘Ottavy, Arloedh.’

¹¹ Ha'n Arloedh a leveris dhodho, ‘Sav yn-bann, ke dhe'n stret henwys Digamm, hag yn chi Yudas hwila den Tarsus, henwys Sowl, rag otta, yma ev ow pysi,

¹² hag ev re welas yn hunros gour henwys Ananias ow tos a-ji hag ow korra y dhiwla warnodho, may hwello arta.’

¹³ Hag Ananias a worthybis, ‘Arloedh, my re glewas dhiworth lies a-dro dhe'n gour ma, pygemmys drog re wrug ev dhe'th syns yn Yerusalem;

¹⁴ hag omma ev a'n jeves awtorita dhiworth an bennoferysi dhe gelmi myns a grio war dha hanow.’

¹⁵ Mes an Arloedh a leveris dhodho, ‘Ty ke, drefenn bos hemma ow mayn dewisys rag doen ow hanow a-dherag an Jentilys ha myghternedh ha mebyon Ysrael;

¹⁶ rag my a wra diskwedhes dhodho pygemmys y telledh ev dhe wodhav a-barth ow hanow.’

¹⁷ Hag Ananias eth dhe-ves hag entra y'n chi, hag ow korra y dhiwla warnodho ev a leveris, ‘Broder Sowl, an Arloedh re'm dannvonas, Yesu neb a omdhiskwedhas dhis y'n fordh may teuthys, may hwylli arta, ha bos lenwys a'n Spyrys Sans.’

¹⁸ Hag a-dhistowgh neppyth kepar ha skans a goedhas dhe-ves dhiworth y dhewlagas, hag ev a welas arta. Ena ev a sevis yn-bann hag a veu besydhys,

¹⁹ hag ow kemmeres boes ev a veu krevhes. Yth esa gans an dhyskyblon yn Damaskus niver a dhydhyow

Sowl a Bregoth yn Damaskus

²⁰ hag a-dhistowgh ev a bregowthas Yesu y'n synagys, y vos Mab Duw.

²¹ Pubonan oll neb a'n klewas a's tevo marth, hag yn-medhons i, ‘A nyns yw hemma an gour re dhistruis an re na yn Yerusalem neb a gri war an hanow ma? Ha deuva omma rakhemma, ma's dokko i yn kelmys a-dherag an bennoferysi.’

²² Mes Sowl a veu lenwys moy ha moy a nerth, hag ev a worras yn deray an Yedhewon esa trigys yn Damaskus, ow previ bos hemma an Krist.

Sowl a Dhienk dhiworth an Yedhewon

²³ Pan o tremenys lies dydh an Yedhewon a vrasas war-barth rag y ladha;

²⁴ mes aga bras a dheuth ha bos godhvedhys dhe Sowl. I a aspias gluw orth an porthow, ha dydhweyth ha nosweyth, ma'n distruens;

²⁵ mes an dhyskyblon a'n kemmeras nosweyth, ha'y worra yn-nans dres an fos yn kanstell.

Sowl yn Yerusalem

²⁶ Pan dhothya yn Yerusalem, ev a assayas junya gans an dhyskyblon; mes yth esa dhedha i oll own anodho rag ny gryssons y vos dyskybel.

²⁷ Mes Barnabas a'n kemmeras, ha'y dhri dhe'n abesteli ha derivas dhedha fatell welsa an Arloedh y'n fordh, neb a gowssa orto, ha fatell arethsa yn hardh yn Damaskus yn hanow Yesu.

²⁸ Ytho ev eth a-ji hag yn-mes gansa yn Yerusalem, owth arethya yn hardh yn hanow an Arloedh,

²⁹ hag ev a gewsis ha disputya orth an Hellenistyon; mes i a assayas y ladha.

³⁰ Mes pan wodhva an vreder, i a'n dros yn-nans dhe Sesarea ha'y dhannvon yn-rag dhe Tarsus.

³¹ Ytho, yth esa kres dhe'n eglos dres oll Yudi ha Galile ha Samaria, ha drehevys veu; ow kerdhes yn own an Arloedh hag yn konfort an Spyrys Sans, hi a balshas.

Yaghheans Ayneas

³² Lemmyn, dell hwarva, Peder, hag ev ow mos a-dro yn pub le, a dheuth ynwedh dhe'n syns trigys yn Lydda.

³³ Ena ev a gavas unn den henwys Ayneas, neb re bia a'y wrowedh war weli eth blydhen, rag palsyes ova.

³⁴ Yn-medh Peder dhodho, ‘Ayneas, Yesu Krist a'th yaghha; sav yn-bann ha kempenn dha weli.’ Hag a-dhistowgh ev a sevis yn-bann.

³⁵ Ha pubonan trigys yn Lydda ha Sharon a'n gwelas, ha treylya dhe'n Arloedh.

Peder yn Lydda ha Yoppa

³⁶ Lemmyn yn Yoppa yth esa unn dhyskybles henwys Tabitha, henn yw dhe styrya Dorkas; an venyn ma o leun a oberow da hag a rians alusenow.

³⁷ Ha dell hwarva y'n dydhyow na klav o hi, ha hi a verwis; ha wosa hy golghi i a's gorras a'y growedh yn soler.

³⁸ Lemmyn rag bos Lydda ogas dhe Yoppa, an dhyskyblon a glewas bos Peder ena ha dannvon dew wour dhodho, ow pysi, ‘Heb strechya, deus dhyn ni.’

³⁹ Ytho Peder a sevis yn-bann ha mos gansa; pan dhothya, i a'n ledyas yn-bann dhe'n stevell wartha, ha'n gwedhwesow oll a sevis rybdho, owth oela hag ow tiskwedhes krysyow ha dillas re wrussa Dorkas ha hi gansa.

⁴⁰ Mes Peder a's gorras i oll yn-mes, ha mos war benn-dewlin ha pysi; ena ow treylya dhe'n korf ev a leveris, ‘Tabitha, sav yn-bann.’ Ha hi a igoras hy dewlagas, ha pan welas hi Peder hi a esedhas yn-bann.

⁴¹ Hag ev a ros dhedhi y leuv ha'y drehevel; hag ow kelwel an syns ha'n gwedhwesow, ev a's diskwedhas yn few.

⁴² Hag y teuth ha bos godhvedhys dres oll Yoppa, ha lies a grysis y'n Arloedh.

⁴³ Hag y hwarva ev dhe wortos yn Yoppa lies dydh gans unn Simon, dyghtyer kreghyn.