Oberow 5 - An Bibel Kernewek 20234 (Kernewek Kemmyn)

Ananias ha Saffira

¹ Mes unn gour, Ananias y hanow, ha'y wreg Saffira a werthas park,

² ha'y wreg ow kodhvos, ev a withas dhodho y honan rann a'n pris, ha dri an remenant, ha'y gorra orth treys an abesteli.

³ Mes yn-medh Peder, ‘Ananias, prag y lenwis Satnas dha golonn, rag leverel gow dhe'n Spyrys Sans ha kemmeres dhis dha honan rann a bris an tir?

⁴ Hag ev heb y wertha, a ny veu dhiso jy, ha wosa y vos gwerthys, a ny veu an mona dhiso jy? Prag y tewlsys an ober ma y'th kolonn? Ny leversys gow dhe dus, mes dhe Dhuw.’

⁵ Pan glewas Ananias an geryow ma, ev a goedhas dhe'n leur, hag ev a verwis; hag own meur a dheuth war beub a glewas anedhi.

⁶ An wer yowynk a sevis ha'y vaylya, ha'y dhoen yn-mes ha'y ynkleudhyas.

⁷ Hag y feu spas a-dro dhe dri our, ha'y wreg a dheuth a-ji, heb godhvos an pyth a hwarvia.

⁸ Peder a leveris dhedhi, ‘Lavar dhymm mar kwerthsowgh an tir a'n sommenn ma?’ Ha hi a leveris, ‘Gwerthsyn, a'n sommenn na.’

⁹ Yn-medh Peder dhedhi, ‘Prag y fewgh unnver dhe demptya Spyrys an Arloedh? Otta, treys an re neb re ynkleudhyas dha wour ymons orth an daras, hag i a wra dha dhoen jy yn-mes.’

¹⁰ A-dhesempis hi a goedhas orth y dreys ha merwel. Pan dheuth an wer yowynk a-ji, i a's kavas marow, hag i a's dug yn-mes ha'y ynkleudhyas ryb hy gour.

¹¹ Hag own meur a dheuth war oll an eglos ha war oll an re a glewas a'n taklow ma.

An Abesteli a Yaghha Meur a Dus

¹² Lemmyn dre dhiwla an abesteli meur a doknys ha marthusyon a hwarva yn mysk an bobel; hag yth esens oll war-barth yn Portal Solomon;

¹³ ha ny vedhas nagonan a'n re erell junya gansa, mes an bobel a's synsis yn enor meur.

¹⁴ Ha moy a gryjygyon a veu keworrys dhe'n Arloedh, niverow bras hag a wer hag a venynes.

¹⁵ Keffrys i a dhros yn-mes an glevyon y'n stretow, ha'ga gorra war weliow ha strelyow, may koettha skeus Peder dhe'n lyha war rann anedha hag ev ow passya.

¹⁶ Hag ynwedh routh vras a'n sitys a-dro dhe Yerusalem a omguntellas, ow toen klevyon ha'n re o plagys gans tebel spyrysyon, hag i oll a veu yaghhes.

An Abesteli yw Helghys

¹⁷ Ena y sevis an arghoferyas ha myns esa ganso, henn yw parti an Sadukeow, lenwys a avi,

¹⁸ hag i a dhalghennas an abesteli ha'ga gorra y'n prison kemmyn.

¹⁹ Mes nosweyth el an Arloedh a igoras darasow an prison, ha'ga hembronk yn-mes, ha leverel,

²⁰ ‘Kewgh, sevewgh y'n tempel ha kewsewgh dhe'n bobel oll an geryow a'n bewnans ma.’

²¹ Pan glewsons hemma, i a entras y'n tempel a-dro dhe vora, ha dyski. Lemmyn y teuth an arghoferyas ha'n re esa ganso, hag i a elwis an konsel hag oll an senedh a vebyon Ysrael, hag i a dhannvonas dhe'n prison may fens dres.

²² Mes pan dheuth an soedhogyon, ny's kavsons y'n prison; ytho i a dhehwelis ha derivas,

²³ ow leverel, ‘Ni a gavas an prison deges fast yn tien, ha'n withysi ow sevel orth an darasow, mes pan igersyn ny gevsyn denvyth a-ji.’

²⁴ Lemmyn pan glewas kapten an tempel ha'n bennoferysi an geryow ma, penndegys meur ens i, owth omwovynn pandr'a vedha siwyans hemma.

²⁵ Ha nebonan a dheuth ha derivas dhedha, ‘Otta, yma'n wer a worrsowgh y'n prison ow sevel y'n tempel, hag ow tyski an bobel.’

²⁶ Ena an kapten ha ganso an withysi eth hag i a's dros heb nell, rag own a's teva a'n bobel, na vens labydhys.

²⁷ I a's dros ha'ga gorra a-dherag an konsel; ha'n arghoferyas a wovynnas orta,

²⁸ ow leverel, ‘Ni a erghis dhywgh yn stroeth ma na dhyskewgh y'n hanow ma, mes otta, hwi re lenwis Yerusalem a'gas dyskas, hag ervirys owgh dhe dhri warnan ni goes an gour ma.’

²⁹ Mes Peder ha'n abesteli a worthybis ha leverel, ‘Y koedh dhyn obaya dhe Dhuw, a-der dhe dus.

³⁰ Duw agan tasow a dhrehevis Yesu, neb a ladhsons orth y gregi yn gwydhenn;

³¹ Duw a ughelhas an gour ma dh'y barth dhyghow avel Rewler ha Selwyas, rag ri edrek dhe Ysrael ha dehwelyans peghosow.

³² Ha dustunioryon on ni dhe'n taklow ma, keffrys an Spyrys Sans res gans Duw dhe'n re a obay dhodho.’

³³ Ha pan glewsons hemma, i a veu serrys meur, ha mynnes aga ladha.

³⁴ Mes unn Farise y'n konsel henwys Gamaliel, dyskador a'n lagha hag enorys gans oll an bobel, a sevis yn-bann, hag erghi may fe an wer gorrys yn-mes termyn berr,

³⁵ hag yn-medh ev dhedha, ‘Gwer Ysrael, kemmerewgh with a'gas honan a-dro dhe'n pyth a vynnowgh dhe wul gans an dus ma.

³⁶ Rag nans yw neb termyn Thewdas a sevis, ow leverel y vos nebonan, ha dhodho niver a wer a junyas, a-dro dhe beswar kans anedha; ev a veu ledhys, ha kemmys a obaya dhodho a veu skoellys a-les ha ny dheuthons dhe dravyth.

³⁷ Wosa hemma Yudas a Alile a sevis yn dydhyow an niveryans, ha dynya rann a'n bobel war y lergh; hag ev ynwedh a verwis, ha kemmys a obaya dhodho a veu skoellys a-les.

³⁸ Ytho, lemmyn my a lever dhywgh, sevewgh a-ves dhiworth an dus ma ha gesewgh i; rag mars yw a dhensys an towl ma po an ober ma, distruys vydh,

³⁹ mes mars yw a Dhuw, ny yllowgh hwi aga distrui, na vowgh kevys yn tevri bos ow sevel erbynn Duw.’ Ytho i a obayas dhodho,

⁴⁰ ha pan alwsens an abesteli, i a's kronkyas hag erghi dhedha na gowssens yn hanow Yesu, ha'ga livra.

⁴¹ Rakhenna, i eth yn-mes dhiworth an konsel ow lowenhe, drefenn aga bos reknys gwiw dhe berthi disenor a-barth an hanow.

⁴² Ha pub dydh y'n tempel hag y'n chiow ny hedhsons dyski ha pregoth Yesu, an Krist.