Oberow 25 - An Bibel Kernewek 20234 (Kernewek Kemmyn)

Powl a Elow orth an Emperour

¹ Tri dydh wosa y dhevedhyans yn ranndir, Festus eth yn-bann dhe Yerusalem dhiworth Sesarea,

² ha'n bennoferysi ha ledyoryon an Yedhewon a ros dherivas dhodho erbynn Powl ha pysi,

³ ow kovynn favour dhiworto, ma'n galwa dhe Yerusalem, rag yth esens ow mynnes kontrewaytya rag y ladha y'n hyns.

⁴ Gans henna Festus a worthybis y fedha Powl synsys yn Sesarea, hag yth ervira ev y honan mos di a verr spys.

⁵ ‘Ytho’, yn-medh ev, ‘An re na yn agas mysk ha dhedha awtorita, ens yn-nans genev, ha mars eus neppyth kamm y'n gour, kuhudhens ev.’

⁶ Wosa ev dhe wortos yn aga mysk namoy es eth po deg dydh, ev eth yn-nans dhe Sesarea; ha ternos ev a esedhas y'n barr ha gorhemmynna may fe Powl dres.

⁷ Pan dheuth ev, an Yedhewon re dhothya yn-nans dhiworth Yerusalem a sevis a-dro dhodho ha dri orto lies kuhudhans poes, na allsons previ.

⁸ Ena Powl a wrug y dhefens: ‘Kammenn na beghis vy erbynn lagha an Yedhewon nag erbynn an tempel nag erbynn Sesar.’

⁹ Mes Festus, ow mynnes diskwedhes favour dhe'n Yedhewon, a worthybis dhe Powl, ow leverel, ‘A vynn'ta mos yn-bann dhe Yerusalem dhe vos breusys ena a-ragov a-dro dhe'n taklow ma?’

¹⁰ Mes yn-medh Powl, ‘Yth esov vy ow sevel a-rag barr Sesar, may telledh ow bos breusys. Ny wrug vy drokoleth vyth dhe'n Yedhewon, dell wodhesta fest yn ta.

¹¹ Rakhenna mar kammwrav ha mar kwrug vy neppyth ow tervynn an mernans, ny skonyav a verwel; mes mar nyns eus travyth y'n taklow ma'm kuhudh an re ma, denvyth ny yll ow daskorr dhedha. Orth Sesar y halwav.’

¹² Ena Festus, wosa ev dhe omgusulya gans y gonsel, a worthybis, ‘Ty re elwis orth Sesar; a-rag Sesar ty a wra mos.’

Festus a Omgusul gans Myghtern Agrippa

¹³ Ha pan o passys niver a dhydhyow, myghtern Agrippa ha Bernike a dheuth dhe Sesarea rag salusi Festus.

¹⁴ Ha drefenn i dhe wortos ena lies dydh, Festus a worras a-dherag an myghtern an maters a-dro dhe Powl, ow leverel, ‘Yma unn gour, gesys prisner gans Feliks,

¹⁵ hag a-dro dhodho an bennoferysi ha henavogyon an Yedhewon a leveris dhymm ha my yn Yerusalem, ha govynn orthiv breus er y bynn.

¹⁶ My a worthybis dhedha nag yw usadow Romanek daskorr denvyth kyns an den kuhudhys dhe vetya orth y guhudhysi fas orth fas, ha dhe gavoes spas dhe wul defens a-dro dhe'n kuhudhans.

¹⁷ Rakhenna, pan dheuthons war-barth omma, ny gellis vy termyn, mes ternos, esedhys y'n barr, my a worhemmynnis may fe dres an gour.

¹⁸ Pan sevis yn-bann an guhudhysi, ny'n kuhudhsons gans drogober vyth a dheseven vy,

¹⁹ mes fowt akordyans a's teva ganso a-dro dh'aga kryjyans aga honan hag a-dro dhe unn Yesu re varwsa, mes Powl a dhestas y vos bew.

²⁰ Drefenn ow bos ankombrys orth an dhadhel a-dro dhe'n taklow ma, my a wovynnas mar vynnas ev mos dhe Yerusalem dhe vos breusys ena a-dro dhe'n taklow ma.

²¹ Mes pan bysis Powl dhe vos synsys yn-dann with rag ervirans an Emperour, my a worhemmynnis may fe synsys bys pan allav y dhannvon dhe Sesar.’

²² Hag Agrippa a leveris dhe Festus, ‘My ow honan a garsa klewes an den.’ Yn-medh ev, ‘A-vorow y hwre'ta y glewes.’

Powl Dres a-rag Agrippa

²³ Rakhenna ternos Agrippa ha Bernike a dheuth, meur aga ryelder, ha pan entersens y'n vreuslys, gans an tribunyon ha gwelhevin an sita, Festus a worhemmynnis ha Powl a veu dres.

²⁴ Ha Festus a leveris, ‘Myghtern Agrippa, hag oll an wer eus omma genen ni, hwi a wel an den ma, hag a-dro dhodho oll an gemmynieth yedhowek a'm pysis, hag y'n Yerusalem hag omma, ow kria na dhelledh ev dhe vewa na fella.

²⁵ Byttegyns, my a gonvedhas na wrug ev travyth ow tervynn an mernans, mes pan elwis ev y honan orth an Emperour, my a erviras y dhannvon.

²⁶ Mes nyns eus dhymm travyth sertan dhe skrifa dhe'm arloedh yn y gever; rakhenna my re'n dros a-ragowgh, dres oll a-ragos tejy, myghtern Agrippa, may kyffiv neppyth dhe skrifa wosa y vos apposys.

²⁷ Rag, dell hevel dhymm, erbynn reson yw dannvon prisner heb diskwedhes an kuhudhansow er y bynn.’