Oberow 23 - An Bibel Kernewek 20234 (Kernewek Kemmyn)

Powl a-rag Feliks yn Sesarea

¹ Powl, ow mires gluw orth an konsel, a leveris, ‘Breder, bys y'n jydh ma my re vewas gans kowses da a-rag Duw.’

² Ha'n arghoferyas Ananias a erghis dhe'n re esa ow sevel yn y ogas gweskel yn ganow Powl.

³ Ena Powl a leveris dhodho, ‘Duw a wra dha weskel tejy, ty fos wynnhes; a esedhydh jy orth ow preusi herwydh an lagha, hag erbynn an lagha ty a worhemmynn may fiv gweskys?’

⁴ An re esa ow sevel yn ogas a leveris, ‘A dhespitydh jy an arghoferyas a Dhuw?’

⁵ Hag yn-medh Powl, Ny wodhvev, breder, y vos arghoferyas; rag skrifys yw ‘Ny wrewgh kewsel drog a-dro dhe rewler a'gas pobel.’

⁶ Ena Powl, ow kodhvos bos re Sadukeow ha re erell Fariseow, a grias y'n konsel, ‘Breder, Farise ov vy, mab Fariseow; yth esov vy ow pos breusys a-dro dhe wovenek dasserghyans an re varow.’

⁷ Pan leveris hemma, yth esa strif ynter an Fariseow ha'n Sadukeow, ha rynnys veu an kuntelles.

⁸ Rag Sadukeow a lever nag eus dasserghyans nag el na spyrys, mes Fariseow a's aswonn oll.

⁹ Hag yth esa garma bras, ha re a'n skribys yn bagas an Fariseow a sevis yn-bann ha kenkia yn krev, ‘Ny gevyn ni travyth kamm y'n den ma. Fatla mar kwrella spyrys po el kewsel orto.’

¹⁰ Ha pan sevis strif bras, an tribun, ow perthi own y fedha Powl skwardys a-les gansa, a worhemmynnis dhe'n soudoryon dos yn-nans ha'y denna yn-mes a'ga mysk ha'y dhri y'n kastell.

¹¹ An nessa nos, an Arloedh a dheuth dhodho ha leverel, ‘Gwellha dha jer, rag dell dhuges dustuni dhe'n taklow a-dro dhymm yn Yerusalem, yndella y telledh ty dhe dhoen dustuni yn Rom ynwedh.’

An Bras dhe Ladha Powl

¹² Pan dheuth an jydh an Yedhewon a wrug bras yn-dann li a vollethi, na wrens dybri nag eva kyns i dhe ladha Powl.

¹³ Yth esa moy es dew-ugens a wrug an bras ma;

¹⁴ i eth dhe'n bennoferysi ha'n henavogyon ha leverel, ‘Ni re omgolmas yn-dann li a vollethi na dhyppryn boes bys pan lytthyn Powl.

¹⁵ Lemmyn ytho hwi war-barth gans an konsel, pysewgh an tribun a'y dhri yn-nans dhywgh, kepar ha pan esowgh ow mynnes eksamnya y gen yn leunna; ha ni agan honan yw parys dh'y ladha kyns ev dhe nesa.’

¹⁶ Pan glewas mab hwoer Powl a-dro dhe'n bras ma, ev a dheuth hag entra y'n kastell ha'y dherivas dhe Powl.

¹⁷ Ha Powl a elwis dhe onan a'n bennow-kangour, ha leverel, ‘Gid an gour yowynk ma dhe'n tribun, rag ev a'n jeves neppyth dhe dherivas dhodho.’

¹⁸ Rakhenna ev a'n kemmeras ha'y ledya dhe'n tribun ha leverel, ‘An prisner Powl a elwis dhymm ha govynn orthiv dri dhis an gour yowynk ma; ev a'n jeves neppyth dhe dherivas dhis.’

¹⁹ An tribun, orth y gemmeras er an leuv a-denewen yn privedh, a wovynnas, ‘Pyth eus dhis dhe dherivas dhymm?’

²⁰ Hag yn-medh ev, ‘Unnverhes yw an Yedhewon dhe wovynn orthis dhe dhri Powl yn-nans dhe'n konsel a-vorow war skeus i dhe ervira diskudha yn leunna neppyth a-dro dhodho.

²¹ Ty ytho, na vydh toellys gansa; rag moy es dew-ugens gour anedha a vynn y gontrewaytya, neb re omgolmas yn-dann li na wrellens dybri nag eva bys pan y'n latthens, ha lemmyn parys yns i, ow kortos dha ervirans.’

²² Rakhenna an tribun a dhannvonas dhe-ves an gour yowynk, orth y erghi, ‘Na lavar dhe dhenvyth ty dhe dherivas dhymm an taklow ma.’

Powl Dannvenys dhe Feliks an Governour

²³ Ena ow kelwel dew a'n bennow-kangour, ev a leveris, ‘Darbarewgh dew kans souder, gans deg marghek ha tri-ugens, ha dew kans guwwas, mayth ellons bys yn Sesarea yn tressa eur an nos,

²⁴ ha proviewgh enyvales rag Powl dhe varghogeth, ma'n drollons yn saw dhe Feliks an governour.’

²⁵ Ev a skrifas lyther, war-lergh an patron ma:

²⁶ ‘Klawdius Lykias dhe'n moyha bryntin governour Feliks, salusyans.

²⁷ An gour ma re beu dalghennys gans an Yedhewon hag yth esens i ow pareusi y ladha, mes pan dhyskis y vos Roman, my a dheuth gans soudoryon ha'y selwel.

²⁸ Hag ow mynnes godhvos an acheson ma'n kuhudhens, my a'n dros yn-nans dh'aga honsel.

²⁹ My a gavas y vos kuhudhys a-dro dhe wovynnow a'ga lagha, mes na veu kuhudhys a dravyth a dhervynnas na'n mernans na prisonyans.

³⁰ Ha pan veu derivys dhymm bos bras erbynn an gour, a-dhistowgh my a'n dannvonas dhis, ha gorhemmynna dhe'n guhudhoryon leverel a-ragos pandr'eus gansa er y bynn.’

³¹ Rakhenna an soudoryon, herwydh aga arghadowyow, a gemmeras Powl ha'y dhri dres an nos dhe Antipatris.

³² Ha ternos i a asas an varghogyon dhe vones yn-rag ganso, hag i a dhehwelis dhe'n kastell.

³³ Pan entersons yn Sesarea i a ros an lyther dhe'n governour hag ynwedh dri Powl a-ragdho.

³⁴ Hag ow redya an lyther ev a wovynnas py rannvro y teuth anodho, ha pan dhyskas y vos a Kilikia

³⁵ ev a leveris, ‘My a wra goslowes orthis pan dheu dha guhudhoryon ynwedh.’ Ena ev a worhemmynnis may fe synsys yn pretorium Herod.