Oberow 2 - An Bibel Kernewek 20234 (Kernewek Kemmyn)

Devones an Spyrys Sans

¹ Pan dhothya dy' Fenkost, yth esens i oll war-barth y'n keth tyller,

² hag a-dhesempis y teuth mes a nev tros kepar ha gwyns nerthek ha hwyflyn, hag ev a lenwis oll an chi mayth ens esedhys,

³ ha tavosow kepar ha tan a omdhiskwedhas dhedha, lesrynnys hag ow powes war bub huni anedha,

⁴ hag i oll a veu lenwys a'n Spyrys Sans ha dalleth kewsel yn yethow erell, dell ros an Spyrys dhedha galloes dhe gewsel.

⁵ Lemmyn yth esa trigys yn Yerusalem Yedhewon, gwer gryjyk a bub kenedhel yn-dann nev;

⁶ ha pan hwarva an tros ma, an routh a dheuth war-barth, ha penndegys ens drefenn pub huni dh'aga klewes ow kewsel yn y yeth y honan.

⁷ Ha sowdhenys vons, ha marth a's teva, hag i a leveris, ‘Otta, a nyns yw oll an re ma neb usi ow kewsel tus a Alile?

⁸ Ha fatell glew pub huni ahanan yn y yeth teythyek y honan?

⁹ Tus a Parthia ha Medys hag Elamitys, ha trigoryon a Mesopotamia, Yudi ha Kappadokia, Pontus hag Asia,

¹⁰ Frygia ha Pamfylia, Ejyp ha rannvroyow Libya ryb Kyrene, ha godrigoryon a Rom,

¹¹ ha Yedhewon ha proselytys, tus a Kreta hag Arabyon, ni a's klew ow kewsel yn agan yethow a oberow meur Duw.’

¹² Ha marth o gansa i oll, ha sowdhenys ens, ow leverel an eyl dh'y gila, ‘Pyth yw an styr a hemma?’

¹³ Mes re erell, ow kul ges, a leveris, ‘Lenwys a win nowydh yns.’

Areth Peder

¹⁴ Mes ow sevel gans an unnek, Peder a dhrehevis y lev hag arethya orta, ‘Gwer Yudi ha myns eus trigys yn Yerusalem, bedhes hemma godhvedhys dhywgh, ha goslowewgh orth ow lavarow.

¹⁵ Rag nyns yw an re ma medhow, dell dybowgh, rag tressa eur an jydh yw,

¹⁶ mes hemm yw an pyth a veu kewsys der an profoes Yoel,

¹⁷ “Hag y fydh y'n dydhyow diwettha, yn-medh Duw, my a dhinwa a'm Spyrys war gig oll, ha'gas mebyon ha'gas myrghes a wra profoesa ha'gas gwer yowynk a wra gweles gwelesigethow ha'gas gwer goth a wra hunrosa hunrosow;

¹⁸ war ow hethyon ha'm kethesow my a dhinwa a'm Spyrys y'n dydhyow na, ha profoesa a wrons i.

¹⁹ Ha my a dhiskwedh marthusyon y'n nev a-vann, hag toknys y'n norvys a-woeles, goes ha tan hag ethenn mog.

²⁰ An howl a vydh treylys dhe dewlder ha'n loer dhe woes kyns dos dydh meur ha splann an Arloedh;

²¹ hag ena myns a gri war hanow an Arloedh a vydh selwys.”

²² ‘Gwer Ysrael, klewewgh an geryow ma: Yesu a Nazareth, gour kommendys dhywgh gans Duw, gans oberow galloesek ha marthusyon hag toknys hag a wrug Duw dredho yn agas mysk, dell wodhowgh hwi agas honan,

²³ an keth hemma, daskorrys herwydh towl fyrv ha ragwodhvos Duw, hwi a'n kemmeras, dre dhiwla tus a-ves dhe'n lagha, ha'y ladha, orth y fastya y'n grows,

²⁴ Duw a'n drehevis, ow lowsya gloesow ankow, rag ny yllys ev dhe vos synsys ganso.

²⁵ Rag yn-medh Davydh anodho, “My a welas an Arloedh prest a-dheragov, drefenn y vos ev a'm parth dhyghow ny vydhav kryghyllys.

²⁶ Rakhenna heudhik o ow holonn hag ow thaves a lowenhas; keffrys ow hig a wra triga yn govenek;

²⁷ rag ny vynnydh gasa ow enev yn ifarn na ri dha Sans dhe weles podredhes.

²⁸ Ty re dhiskwedhas dhymm an fordhow a vewnans; ty a'm lenow a heudhder gans dha wolok.”

²⁹ ‘Breder, gans fydhyans y hallav kewsel orthowgh a-dro dhe Davydh an ugheldas, ev dhe verwel ha bos ynkleudhys, hag yma y vedh genen ni bys y'n jydh hedhyw.

³⁰ Rakhenna, ow pos profoes hag ow kodhvos y tos Duw dhodho y hwre ev settya frut y dhiwglun war y se,

³¹ ev a ragwelas ha kewsel a-dro dhe dhasserghyans Krist, “Ny veu gesys yn ifarn, ha ny wrug y gig gweles podredhes.”

³² Duw a dhrehevis an Yesu ma, ha dhe henna ni oll yw dustunioryon;

³³ rakhenna, ughelhes dhe'n barth dhyghow dhe Dhuw, pan dhegemmersa dhiworth an Tas dedhewadow an Spyrys Sans, ev a dhinewis hemma hag a welowgh hag a glewowgh.

³⁴ Rag ny yskynnas Davydh dhe'n nevow, mes yn-medh ev y honan, “An Arloedh a leveris dhe'm Arloedh vy, ‘Esedh a'm parth dhyghow

³⁵ erna worriv dha eskerens avel skavell-droes rag dha dreys.’ ”

³⁶ Rakhenna, godhvydhes oll chi Ysrael diogel, Duw re'n gwrug hag Arloedh ha Krist, an keth Yesu ma a growssowgh hwi.’

An Dus Kynsa Neb a veu Treylys

³⁷ Pan glewsons hemma, gwenys vons y'n golonn, hag i a leveris dhe Peder ha dhe'n abesteli erell, ‘Breder, pandr'a wren ni?’

³⁸ Hag yn-medh Peder dhedha, ‘Kemmerewgh edrek, ha bedhes besydhys kettep penn ahanowgh yn hanow Yesu Krist rag gevyans agas peghosow, ha hwi a wra degemmeres ro an Spyrys Sans.

³⁹ Rag yma'n dedhewadyow dhywgh hwi ha dh'agas fleghes ha dhe'n re usi pell, myns a alwo an Arloedh agan Duw dhodho.’

⁴⁰ Ha gans meur a eryow erell ev a dhug dustuni ha'ga ynnia, ow leverel, ‘Bedhewgh selwys a'n henedh gorth ma.’

⁴¹ Ytho, an re a wolkommas y er a veu besydhys, hag y'n jydh na y feu keworrys a-dro dhe dri mil a enevow;

⁴² hag yth esens ow pesya yn dyskas an abesteli hag y'n kowethyans, yn terri an bara hag yn pysadow.

⁴³ Hag own a dheuth dhe bub enev; ha meur a varthusyon hag toknys a hwarva der an abesteli.

⁴⁴ Yth esa oll an gryjygyon war-barth, ha pup-tra a's tevo yn kemmyn;

⁴⁵ hag i a wertha aga fythow ha'ga gwara, hag i a's ranna dhe beub oll, dell esa edhomm dhe nebonan.

⁴⁶ Ha pub dydh oll ow pesya yn tiwysyk ha keskolonn y'n tempel, hag ow terri bara yn aga chiow, i a gevrenna boes, heudh ha sempel aga holonnow,

⁴⁷ ow kormel Duw hag ow kavoes bodh da an bobel oll. Ha pub dydh an Arloedh a geworra dh'aga somm an re o selwys.