Oberow 17 - An Bibel Kernewek 20234 (Kernewek Kemmyn)

An Deray yn Thessalonika

¹ Hag ow tremena der Amfipolis hag Apollonia, i a dheuth dhe Thessalonika mayth esa synaga a'n Yedhewon.

² Ha herwydh usadow Powl, ev a entras ena, ha tri dydh sabot ev a dhadhlas gansa dhiworth an skryptors,

³ owth igeri hag ow tiskwedhes dhedha bos res dhe'n Krist godhav ha dastrehevel dhiworth an re varow, ow leverel, ‘Hemm o an Krist, Yesu neb a bregowthav dhywgh.’

⁴ Ha re anedha a veu treylys, hag i a junyas gans Powl ha Silas, keffrys ha routh vras a'n Grekys kryjyk ha meur a venynes a roweth.

⁵ Mes an Yedhewon eth ha bos leun a avi hag ow tri gansa drogwesyon a'n losels yn plen an varghas, i a guntellas routh ha gul deray y'n sita, hag ow fyski dhe ji Yason i a's hwilas rag aga dri a-rag kuntelles an bobel;

⁶ mes pan na's kavas i a dennas Yason ha re a'n vreder dhe soedhogyon an sita, ow kria, ‘An dus ma neb re dreylyas an nor war y benn re dheuth omma ynwedh,

⁷ ha Yason re's degemmeras; hag oll an re ma a far erbynn arghadowyow Sesar, ow leverel bos ken myghtern, Yesu.’

⁸ An routh ha'n soedhogyon a veu troblys pan glewsons an taklow ma,

⁹ ha wosa kemmeres mewgh dhiworth Yason ha'n re erell, i a's livras.

Powl ha Silas yn Berea

¹⁰ Hag a-dhistowgh, yn termyn nos, an vreder a dhannvonas yn-rag ha Powl ha Silas dhe Berea. Pan dheuthons di, i eth yn synaga an Yedhewon;

¹¹ ha'n dus ma o gwell yn aga gnas ages an re na yn Thessalonika, rag i a dhegemmeras an ger gans mall meur, ow hwithra an skryptors pub dydh, dhe weles mar pe gwir an taklow ma.

¹² Rakhenna meur anedha a grysis, ha niver da a'n benynes Grek hag a'n wer.

¹³ Mes pan wodhva an Yedhewon a Thessalonika bos ger Duw pregewthys gans Powl yn Berea ynwedh, i a dheuth di ynwedh ow kryghylli hag ow korra an routhow yn deray.

¹⁴ Ytho, an vreder a dhannvonas Powl dhe-ves, rag mos dhe'n mor; mes Silas ha Timothi a wortas ena.

¹⁵ Ha'n re esa ow ledya Powl a'n dros bys yn Athenys, ha wosa degemmeres arghadow dhe Silas ha Timothi may teffens dhodho skonna gyllens, i eth dhe-ves.

Powl yn Athenys

¹⁶ Hag yn Athenys, ha Powl orth aga gortos, grevys veu y spyrys ynno pan welas an sita leun a idolys.

¹⁷ Rakhenna ev a dhadhlas y'n synaga gans an Yedhewon ha gans an wordhyoryon, ha pub dydh yn plen an varghas gans an re esa ena par happ.

¹⁸ Mes re a'n filosoforyon Epikurek ha Stoik a geskewsi ganso, ha re a leveris, ‘Pandr'a vynn an klappyer diskians ma dhe leverel?’ Hag yn-medh re erell, ‘Dell hevel, pregowther a dhywolow astranj yw ev’; rag ev dhe bregoth Yesu ha'n dasserghyans.

¹⁹ Hag orth y synsi i a'n ledyas dhe'n Areopagus, ow leverel, ‘A yllyn ni godhvos pyth yw an dyskas nowydh ma hag a dherivydh?

²⁰ Rag ty a dhre dh'agan diwskovarn taklow marthys koynt; rakhenna ervirys on ni godhvos styr an taklow ma.’

²¹ Lemmyn oll tus Athenys ha'n estrenyon trigys ena ny's tevo termyn marnas dhe leverel po klewes neppyth nowydh.

²² Hag ow sevel yn kres an Areopagus, yn-medh Powl, ‘Gwer a Athenys, my a wel fatell owgh hwi fest kryjyk yn pub fordh.

²³ Rag, ha my ow tremena hag ow hwithra taklow agas gordhyans, my a gavas ynwedh alter mayth o skrifys “Dhe dhuw anwodhvos.” Ytho, an pyth a wordhyowgh yn tiskians, hemma my a iger dhywgh.

²⁴ An Duw neb a formyas an bys ha pup-tra ynno, neb yw Arloedh nev ha nor, ny drig yn templow gwrys gans diwla den,

²⁵ na nyns yw servys gans diwla den kepar ha pan ve dhodho edhomm a neppyth, rag ev a re bewnans hag anall ha pup-tra dhe bub den oll;

²⁶ hag ev a wrug a unn den pub kenedhel a dus mayth annetthens enep kowal an nor, hag ev a apoyntyas aga oesow destnys hag oryon aga annedhow,

²⁷ may hwillens Duw, martesen orth y hwila yn-dann dava ha'y gavoes, kyn nag yw ev pell dhiworth pub huni ahanan.

²⁸ Rag “Ynno ev ni a vew ha gwaya ha kavoes agan bosva.” Par dell leveris re a'gas berdh, “Rag ni ynwedh yw y askorr.”

²⁹ A-ban on ni askorr Duw, ny goedh dhyn tybi bos an Duwsys kepar hag owr po arghans po men, imaj gwrys dre sleyghneth ha dysmygyans denel.

³⁰ Ytho, ny wrug Duw vri a'n oesow a dhiskians, ha lemmyn ev a worhemmynn dhe boblow oll yn pub le may kemmerrons edrek,

³¹ drefenn ev dhe settya dydh may hwra breusi an bys yn ewnder, dre wour neb re apoyntyas, ow profya mewgh dhe oll, orth y dhrehevel dhiworth an re varow.’

³² Pan glewsons a dhasserghyans an re varow, re a skornyas, mes re erell a leveris, ‘Ni a vynn goslowes orthis arta a-dro dhe hemma.’

³³ Gans henna, Powl a omdennas dhiworta.

³⁴ Mes niver a wer a junyas ganso ha krysi, yn aga mysk Dionysius an Areopagit, ha benyn henwys Damaris, ha gansa re erell.