Oberow 12 - An Bibel Kernewek 20234 (Kernewek Kemmyn)

Jamys Ledhys ha Peder Gorrys yn Prison

¹ Lemmyn y'n termyn na Herod an myghtern a dewlis diwla war rann a'n re a'n eglos rag aga thebeldhyghtya.

² Ev a ladhas Jamys broder Yowann gans kledha;

³ ha pan welas bos henna plegadow dhe'n Yedhewon, ev eth yn-rag dhe dhalghenna Peder ynwedh; yth esa hemma yn dydhyow an bara heb goell.

⁴ Wosa y dhalghenna, ev a'n gorras yn prison, orth y ri dhe beswar para a soudoryon rag y witha, owth mynnes y dhri a-dherag an bobel wosa an pask.

⁵ Rakhenna Peder a veu gwithys yn prison; mes pysadow diwysyk a'y wovis a veu gwrys gans an eglos dhe Dhuw.

Peder Livrys mes a'n Prison

⁶ Pan o Herod parys dh'y dhri yn-rag, y'n nos na yth esa Peder ow koska yntra dew souder, kelmys gans dew jayn, hag yth esa gwithysi dherag an daras ow kwitha an prison.

⁷ Hag otta, el an Arloedh a sevis ogas dhodho, ha golow a splannas y'n vagh; hag ow kweskel tenewen Peder ev a'n drehevis yn-bann, ow leverel, ‘Sav yn-bann, fisten.’ Ha'n chaynys a goedhas dhiworth y dhiwla.

⁸ Ena an el a leveris dhodho, ‘Omgweth, ha gwisk dha sandalyow.’ Hag ev a wrug henna. Hag ev a erghis dhodho, ‘Towl dha vantell y'th kyrghynn ha hol vy.’

⁹ Ytho ev eth yn-mes ha'y holya; ny wodhva bos gwir an pyth esa ow hwarvos der an el, mes ev a dybis ev dhe weles gwelesigeth.

¹⁰ Wosa tremena an kynsa gwithyas ha'n nessa, i a dheuth dhe'n yet a horn hag a ledyas dhe'n sita; hi a igoras hy honan dhedha, hag ow mos yn-mes i eth yn-rag der unn stret ynn, hag a-dhesempis an el a dhibarthas dhiworto.

¹¹ Ena Peder a dheuth dh'y ewn rewl ha leverel, ‘Lemmyn my a woer yn hwir y tannvonas Duw y el ha'm livra mes a leuv Herod ha mes a oll gwaytyans an bobel yedhowek.’

¹² Hag ev ow konvedhes hemma, ev a dheuth dhe ji Maria, mamm Yowann henwys Mark mayth esa lies kuntellys war-barth, hag ow pysi.

¹³ Ha pan gnoukyas ev orth daras an porth, maghteth henwys Rhoda a nesas rag gorthybi.

¹⁴ Owth aswonn lev Peder, yn joy ny igoras hi an porth, mes hi a boenyas a-ji ha leverel bos Peder ow sevel a-rag an porth.

¹⁵ Mes yn-medhons i dhedhi, ‘Mes a'th rewl osta.’ Mes yth esa hi ow synsi yn ter bos henna gwir. Ytho yn-medhons i, ‘Y el yw.’

¹⁶ Mes Peder a besyas knoukya; ha pan igorsens, i a'n gwelas ha marth bras a's teva.

¹⁷ Ev a wrug sin dhedha gans y leuv may tawens, ha derivas dhedha fatell wrug an Arloedh y hembronk mes a'n prison, ha leverel, ‘Derivewgh an taklow ma dhe Jamys ha dhe'n vreder.’ Ena ev a omdennas ha mos dhe gen tyller.

¹⁸ Ha pan dheuth an jydh, yth esa ankres na veu byghan yn mysk an soudoryon, a-dro dhe'n pyth a hwarvia dhe Peder.

¹⁹ Ha pan y'n hwilas Herod heb y gavoes, ev a hwithras an withysi ha gorhemmynna may fens gorrys dhe'n mernans; hag ev eth yn-nans dhiworth Yudi dhe Sesarea ha gortos ena.

Mernans Herod

²⁰ Lemmyn ev o fest serrys orth Tus Tyr ha Sidon; ha gans unn akord i a dheuth dhodho, ha wosa i dhe dhendil skoedhyans Blastus, chambourlen an myghtern, i a bysis kres, drefenn bos aga fow sostenys dhiworth gwlas an myghtern.

²¹ Hag yn dydh ordenys, Herod taklys yn y dhillas ryel a esedhas yn y vreusva hag arethya dhedha;

²² ha'n routh a armas, ‘Lev duw, a-der den.’

²³ Hware el an Arloedh a'n gweskis, drefenn na ros ev an gordhyans dhe Dhuw, ha devorys gans pryves ev a verwis.

²⁴ Mes ger Duw a devi ha kressya.

²⁵ Ha Barnabas ha Sowl a dhehwelis dhe Yerusalem, wosa kowlwul aga negys, ow tri gansa Yowann henwys Mark.