Obadia 1 - An Bibel Kernewek 20234 (Kernewek Kemmyn)

Breus Duw erbynn Edom

¹ Gwelesigeth Obadia. Yndellma y lever an Arloedh Duw a-dro dhe Edom: Ni re glewas nowodhow dhiworth an Arloedh, ha kannas re beu dannvenys yn mysk an kenedhlow: ‘Sevewgh hwi, ha sevyn ni er hy fynn rag an gas.’

² Otta, my a'th wrug byghan yn mysk an kenedhlow; dispresys yn feur osta.

³ Goeth dha golonn re'th toellas, ty neb eus trigys ughel yn savnow an garrek, y drigva y'n ughelder, ow leverel y'th kolonn, ‘Piw a'm dre yn-nans dhe'n dor?’

⁴ Kyn nijydh ughel kepar ha'n er, ha kyn settydh dha neyth yn mysk an ster, my a'th tre yn-nans alena, yn-medh an Arloedh.

⁵ Mar teffa robbyoryon dhis, po ladron yn nos, fatell allses bos distruys? A ny wrussens ladra unnweyth an pyth a ve lowr ragdha i aga honan? Mar teffa kuntelloryon grappys dhis, a ny wrussens gasa rann a'n grappys?

⁶ Mes assa vydh Esaw leun hwithrys, pyllys y dresoryow kudh!

⁷ Oll dha geffrysysi a'th chasyas dhe'n oryon; an re yn kres genes re'th toellas, i re brevaylyas warnas; an re a dheber bara genes a sett maglenn yn-dannos, heb ty dh'y gonvedhes.

⁸ Y'n jydh na, yn-medh an Arloedh, a ny wrav vy distrui tus fur yn-mes a Edom, ha konvedhes yn-mes a venydh Esaw?

⁹ Dha gasoryon a berth own, Teman, rag bos pub den oll a venydh Esaw treghys dhe-ves.

¹⁰ Drefenn an ladhva ha'n garowder gwrys erbynn dha vroder Yakob, meth a wra dha gudha, ha ty a vydh treghys dhe-ves bynitha.

¹¹ Y'n jydh may sevsys a-denewen, y'n jydh may hwrug alyons kemmeres y lu yn keth, hag estrenyon a dheuth bys dh'y yetys, ha tewlel prenn war Yerusalem, ty ynwedh o kepar hag onan anedha.

¹² Mes ny dalvia, ty dhe vires yn heudh war dhydh dha vroder yn dydh y anfeusi, na lowenhe war vebyon Yuda yn dydh aga diswrians; na kewsel yn howtyn yn dydh aga diswrians.

¹³ Ny dalvia, ty dhe dhos a-ji dhe yet ow fobel yn dydh aga therroes, na mires, ty ynwedh, yn heudh war y anken yn dydh y derroes, na settya dalghenn yn y bythow yn dydh y derroes.

¹⁴ Ny dalvia, ty dhe sevel orth an growsfordh may hylli treghi yn-nans y fowesigyon, na dhaskorr an re a fi alena yn dydh anken.

¹⁵ Rag ogas yw dydh an Arloedh rag oll an kenedhlow. Kepar dell wrussys, yndellma y fydh gwrys dhiso jy; dha attal a dheu war dha benn dha honan.

¹⁶ Rag kepar dell wrussowgh eva war ow menydh sans, yn kettella y hwra an kenedhlow oll eva heb hedhi. Eva a wrons, ha lenki, hag y fydhons kepar ha pan nag esens bythkweth yn few.

¹⁷ Mes war venydh Sion y fydh remenant a'n re a dhienk, hag y fydh tyller sans. Ha chi Yakob a dhaskemmer eretons an dus a gemmersa aga eretons i.

¹⁸ Chi Yakob a vydh tan, ha chi Yosep a vydh flamm; chi Esaw a vydh sowl, hag i a worr tan ynna ha'ga devorya. Ny vydh denvyth gesys a ji Esaw, rag an Arloedh re gewsis.

¹⁹ Tus an Negeb a gemmer menydh Esaw yn perghennogeth, ha tus an Shefela a gemmer pow an Filistysi. I a gemmer tiredh Efraym ha tiredh Samaria, ha Benyamin a gemmer Gilead yn perghennogeth.

²⁰ Divresow an lu ma a vebyon Ysrael a gemmer tiredh an Kananysi bys yn Sarefath, ha divresow Yerusalem usi yn Sefarad a gemmer sitys an dhyghowbarth.

²¹ Ha tus delivrys a yn-bann dhe venydh Sion dhe rewlya menydh Esaw; ha'n myghternsys a vydh dhe'n Arloedh.