Niverow 9 - An Bibel Kernewek 20234 (Kernewek Kemmyn)

An Pask yn Gwylvos Sinay

¹ Ha'n Arloedh a gewsis dhe Moyses yn gwylvos Sinay, y'n kynsa mis a'n nessa blydhen wosa i dhe dhos yn-mes a bow Ejyp, ow leverel:

² Gas mebyon Ysrael dhe witha an pask y'n termyn apoyntys.

³ Yn peswardhegves dydh an mis ma, gorthugherweyth, ty a wra y witha y'n termyn apoyntys; war-lergh oll y reythennow ha'y ordenansow ty a wra y witha.

⁴ Ytho Moyses a leveris dhe vebyon Ysrael may tela dhedha gwitha an pask.

⁵ Hag i a withas an pask y'n kynsa mis, y'n peswardhegves dydh, gorthugherweyth, yn gwylvos Sinay; war-lergh pup-tra re worhemmynnis an Arloedh dhe Moyses, yndella mebyon Ysrael a wrug.

⁶ Hag yth esa gwer avlan dre dava korf marow den, ma na allsons gwitha an pask an jydh na; hag i a dheuth a-rag Moyses hag a-rag Aron an jydh na;

⁷ ha'n wer na a leveris dhodho, ‘Avlan on dre dochya korf marow den; prag yth yw difennys orthyn offrynna offrynn an Arloedh y'n termyn apoyntys yn mysk mebyon Ysrael?’

⁸ Ha Moyses a leveris dhedha, ‘Gortewgh, may klewiv an pyth a worhemmynn an Arloedh a-dro dhywgh.’

⁹ An Arloedh a leveris dhe Moyses,

¹⁰ Lavar dhe vebyon Ysrael: Mar pydh avlan gour ahanowgh po a'gas diyskynnysi dre dochya korf marow, po pell war vyaj, hwath ev a with pask dhe'n Arloedh.

¹¹ Y'n nessa mis y'n peswardhegves dydh gorthugherweyth i a'n gwith; i a wra y dhybri gans bara heb goell hag erbys hwerow.

¹² Ny wrons i gasa travyth anodho bys y'n myttin, na terri askorn anodho; war-lergh oll an ordenans rag an pask i a'n gwith.

¹³ Mes an gour yw glan ha heb bos ow vyajya, mes hwath a omwith rag gwitha an pask, an den na a vydh treghys a'y bobel, rag ny offrynnas offrynn an Arloedh yn y dermyn apoyntys; an gour na a berth y begh.

¹⁴ Ha mar kodrik alyon yn agas mysk, hag a with an pask dhe'n Arloedh, war-lergh ordenans an pask ha war-lergh y rewlys, yndellma y hwra; hwi a'gas bydh unn ordenans, ha dhe'n alyon ha dhe'n genesik.

An Gommolenn ha'n Tan

¹⁵ Y'n jydh may feu sevys an tabernakel, an gommolenn a gudhas an tabernakel, tylda an dustuni; ha dhe'n gorthugher yth esa a-ugh an tabernakel kepar ha semlans tan bys y'n myttin.

¹⁶ Hag yndella prest yth o; an gommolenn a'n kudha dydhweyth, ha semlans an tan nosweyth.

¹⁷ Ha peskweyth may feu an gommolenn kemmerys yn-bann a-dhiworth an tylda, wosa henna mebyon Ysrael e yn-kerdh; hag y'n tyller mayth esa an gommolenn ow sevel stag, ena mebyon Ysrael a gampya.

¹⁸ Orth gorhemmynna an Arloedh mebyon Ysrael e yn-kerdh, hag orth gorhemmynna an Arloedh i a gampya; kettell wre an gommolenn sevel stag a-ugh an tabernakel, i a gampya.

¹⁹ Hwath pan wre an gommolenn tarya a-ugh an tabernakel lies dydh, mebyon Ysrael a witha charj an Arloedh, ha nyns ens yn-kerdh.

²⁰ Treweythyow yth esa an gommolenn niver a dhydhyow a-ugh an tabernakel, ha war-lergh gorhemmynna an Arloedh yth esens trigys y'n kamp; ena war-lergh gorhemmynna an Arloedh yth ens yn-kerdh.

²¹ Ha treweythyow an gommolenn esa ena a'n gorthugher bys vyttin; ha pan vedha kemmerys an gommolenn myttinweyth, yth ens yn-kerdh; dydhweyth po nosweyth, mar pe an gommolenn kemmerys yn-bann, yth ens yn-kerdh.

²² Mar pe dew dhydh, po mis, po termyn pella, mayth esa an gommolenn ow tarya a-ugh an tabernakel, ow kortos ena, mebyon Ysrael esens trigys y'n kamp ha nyns ens yn-kerdh; mes pan ve kemmerys yn-bann, yth ens yn-kerdh.

²³ Orth gorhemmynna an Arloedh i a gampya, hag orth gorhemmynna an Arloedh yth ens yn-kerdh; i a withas charj an Arloedh, orth gorhemmynna an Arloedh dre leuv Moyses.