Niverow 4 - An Bibel Kernewek 20234 (Kernewek Kemmyn)

An Kohathysi

¹ An Arloedh a leveris dhe Moyses ha dhe Aron,

² ‘Kemmer niveryans mebyon Kohath a-dhiworth mebyon Levi, herwydh aga theyluyow ha chiow aga thasow,

³ a dheg bloedh warn ugens dhe dheg bloedh ha dew-ugens, peub a yll entra servis an lu, dhe wul an ober yn tylda an kuntelles.

⁴ Hemm yw servis mebyon Kohath yn tylda an kuntelles: an taklow an moyha sans.

⁵ Pan wra an kamp mos yn-rag, Aron ha'y vebyon a wra entra ha diswul vayl an groglenn, ha kudha argh an dustuni ganso;

⁶ ena i a wra gorra warnedhi kudhans a greghyn morhoghes, ha lesa warnedhi kweth dhien a las, ha settya hy gwelynni.

⁷ Ha war voes bara an wolok i a wra lesa kweth las ha gorra warnedhi an platyow, an skudellow, an bollow, an kostrels rag offrynn an diwes; ha'n bara usi ena pup-prys a vydh warnedhi.

⁸ Ena i a wra lesa dresti pann kogh, ha kudha henna gans kudhans a greghyn morhoghes, ha settya hy gwelynni.

⁹ Hag i a gemmer pann glas, ha kudha an kantoler rag an golow, gans y lugern, y evelyow, y badellow, ha'n lestri oll rag an oyl yw proviys dhodho:

¹⁰ hag i a wra y worra gans oll y dhaffar yn kudhans a greghyn morhoghes ha'y worra war an framweyth degans.

¹¹ Ha war an alter owrek i a wra lesa pann glas, ha'y hudha gans kudhans a greghyn morhoghes, ha settya hy gwelynni.

¹² Hag i a wra kemmeres oll an lestri a'n servis hag yw devnydhys y'n sentri ha'ga gorra yn kweth las, ha'ga hudha gans kudhans a greghyn morhoghes, ha'ga gorra war an framweyth degans.

¹³ Hag i a gemmer dhe-ves an lusu ha lesa kweth a burpur warnedhi;

¹⁴ hag i a worr warnedhi oll an daffar yw devnydhys rag an servis ena, an padellow tan, an kigveryow, an reuvow, ha'n bollow, oll daffar an alter; hag i a wra lesa warnedhi kudhans a greghyn morhoghes, ha gorra ynni hy gwelynni.

¹⁵ Ha pan vydh Aron ha'y vebyon gorfennys ow kudha an sentri hag oll daffar an sentri, dell dhalleth an kamp war an fordh, wosa henna mebyon Kohath a wra dos dhe dhoen an re ma, mes ny goedh dhedha tochya an taklow sans, ma na varwons. An re ma yw taklow tylda an kuntelles a vydh degys gans mebyon Kohath.

¹⁶ ‘Hag Eleazar mab Aron an oferyas a'n jevydh charj a'n oyl rag an golow, an ynkys hweg, an offrynn greun pub-dydhyek, hag oyl an untyans, gans gorwel oll an tabernakel ha pup-tra eus ynno, an sentri ha'y lestri.’

¹⁷ An Arloedh a leveris dhe Moyses hag Aron,

¹⁸ ‘Na as loeth teyluyow an Kohathysi dhe vos distruys yn mysk an Levysi;

¹⁹ mes gwra aga dyghtya yndellma, may fewons, ha ma na varwons pan dhons ogas dhe'n taklow an moyha sans: Aron ha'y vebyon a wra mos ha'ga ordena peub dh'y oberenn ha dh'y vegh;

²⁰ mes nyns ons dhe vires war an taklow sans hwath rag pols, ma na varwons.’

An Gershonysi ha'n Merarysi

²¹ An Arloedh a leveris dhe Moyses,

²² ‘Kemmer niveryans a vebyon Gershon ynwedh, herwydh chiow aga thasow ha'ga theyluyow;

²³ a dheg bloedh warn ugens aga oes bys yn deg ha dew-ugens bloedh, ty a wra aga nivera, peub a yll entra an servis, dhe wul an ober yn tylda an kuntelles.

²⁴ Hemm yw gonis teyluyow an Gershonysi, dhe servya ha dhe dhoen beghyow:

²⁵ i a wra doen kroglennow an tabernakel, ha tylda an kuntelles gans y gudhans, ha'n kudhans a greghyn morhoghes usi warnodho, ha'n groglenn rag porth tylda an kuntelles,

²⁶ ha kroglennow an klos, ha kroglenn daras yet an klos usi a-dro dhe'n sentri ha'n alter, ha'ga herdyn, ha pub daffar rag aga servis; hag i a wra pup-tra hag yw res dhe vos gwrys yn aga govis.

²⁷ Oll an servis a vebyon an Gershonysi war-lergh ger Aron ha'y vebyon, rag oll aga ober a dhegans, yn oll aga servis; ha ty a's charj gans oll aga ober a dhegans.

²⁸ Hemm yw servis teyluyow mebyon an Gershonysi yn tylda an kuntelles, ha'ga charj a vydh yn-dann leuv Ithamar mab Aron an oferyas.

²⁹ ‘Ha mebyon Merari: ty a wra aga nivera herwydh aga theyluyow ha chiow aga thasow;

³⁰ a dheg bloedh warn ugens aga oes bys yn deg ha dew-ugens bloedh, ty a wra aga nivera, peub a yll entra an servis, dhe wul an ober yn tylda an kuntelles.

³¹ Ha hemm yw an pyth mayth yns charjys dh'y dhoen, yn oll aga servis yn tylda an kuntelles: framyow an tabernakel, gans y varrys, y golovenyow ha selyow,

³² ha kolovenyow an klos a-dro gans aga selyow, aga ebilyer ha'ga herdyn, gans oll aga daffar hag oll aga darbar; ha der aga henwyn ty a reken an taklow mayth yns charjys dh'aga doen.

³³ Hemm yw servis teyluyow mebyon Merari, yn oll aga servis yn tylda an kuntelles, yn-dann leuv Ithamar mab Aron an Oferyas.’

Niveryans an Levysi

³⁴ Ha Moyses hag Aron ha hembrenkysi an kuntelles a niveras mebyon an Kohathysi, herwydh aga theyluyow ha chiow aga thasow,

³⁵ a dheg bloedh warn ugens aga oes bys yn deg ha dew-ugens bloedh, peub a ylli entra an servis, dhe oberi yn tylda an kuntelles.

³⁶ Ha'ga niver herwydh aga theyluyow o dew vil seyth kans ha hanter-kans.

³⁷ Hemm o niver teyluyow an Kohathysi, oll an re esa ow servya yn tylda an kuntelles, a wrug Moyses hag Aron aga nivera herwydh gorhemmynna an Arloedh dre leuv Moyses.

³⁸ Niver mebyon Gershon, herwydh aga theyluyow ha chiow aga thasow,

³⁹ a dheg bloedh warn ugens aga oes bys yn deg ha dew-ugens bloedh, peub a yll entra an servis dhe oberi yn tylda an kuntelles:

⁴⁰ aga niver herwydh aga theyluyow ha chiow aga thasow o dew vil hwegh kans ha deg warn ugens.

⁴¹ Hemm o niver teyluyow mebyon Gershon, oll an re esa ow servya yn tylda an kuntelles, a wrug Moyses hag Aron aga nivera herwydh gorhemmynna an Arloedh.

⁴² Niver teyluyow mebyon Merari, herwydh aga theyluyow ha chiow aga thasow,

⁴³ a dheg bloedh warn ugens aga oes bys yn deg ha dew-ugens bloedh, peub a ylli entra an servis, rag ober yn tylda an kuntelles:

⁴⁴ aga niver herwydh aga theyluyow o tri mil ha dew kans.

⁴⁵ An re ma yw an re a veu niverys a deyluyow mebyon Merari, a wrug Moyses hag Aron aga nivera herwydh gorhemmynna an Arloedh dre leuv Moyses.

⁴⁶ Oll an re a veu niverys a'n Levysi, a wrug Moyses hag Aron ha hembrenkysi Ysrael aga nivera, herwydh aga theyluyow ha chiow aga thasow,

⁴⁷ a dheg bloedh warn ugens aga oes bys yn deg ha dew-ugens bloedh, peub a ylli entra yn ober an servis hag yn ober a dhoen beghyow yn tylda an kuntelles,

⁴⁸ an re anedha a veu niverys o eth mil pymp kans ha peswar-ugens.

⁴⁹ Herwydh gorhemmynna an Arloedh i a veu niverys dre leuv Moyses, peub dh'y oberenn a servya po a dhoen; yndellma i a veu niverys ganso, dell worhemmynnis an Arloedh dhe Moyses.