Niverow 31 - An Bibel Kernewek 20234 (Kernewek Kemmyn)

Bresel erbynn Midyan

¹ An Arloedh a leveris dhe Moyses,

² ‘Diell mebyon Ysrael war an Midyanysi; a-wosa ty a vydh kuntellys dhe'th pobel.’

³ Ha Moyses a leveris dhe'n bobel, ‘Ervewgh gwer ahanowgh rag an vresel, mayth ellons erbynn Midyan, dhe gowlwul dial an Arloedh war Midyan.

⁴ Hwi a wra dannvon mil a bub loeth a Ysrael dhe'n vresel.’

⁵ Ytho proviys veu, yn-mes a'n milyow a Ysrael, mil a bub loeth, dewdhek mil ervys rag bresel.

⁶ Ha Moyses a's dannvonas dhe'n vresel, mil a bub loeth, war-barth gans Finehas mab Eleazar an oferyas, gans lestri an sentri ha'n hirgern rag gwarnyans yn y dhorn.

⁷ I a werryas erbynn Midyan, dell worhemmynnis an Arloedh dhe Moyses, hag i a ladhas pub gorreydh.

⁸ I a ladhas myghternedh Midyan, gans an re erell anedha a veu ledhys – Evi, Rekem, Sur, Hur, ha Reba, an pymp myghtern a Midyan; hag ynwedh i a ladhas Balaam mab Beor gans an kledha.

⁹ Ha mebyon Ysrael a gemmeras benynes Midyan yn kethneth ha'ga re vyghan; hag i a gemmeras yn preydh oll aga gwarthek, aga greow, hag oll aga gwara.

¹⁰ Oll aga sitys y'n tylleryow mayth esens trigys, hag oll aga hampow, i a loskas gans tan,

¹¹ ha kemmeres oll an preydh ha'n pyth a veu pyllys, hag a dhen hag a vest.

¹² Ena i a dhros an gethyon ha'n pyth a veu pyllys ha'n preydh dhe Moyses, ha dhe Eleazar an oferyas, ha dhe guntelles mebyon Ysrael, dhe'n kamp yn plenys Moab ryb Yordan a-dal Yeriko.

¹³ Moyses, hag Eleazar an oferyas, ha hembrenkysi oll an kuntelles, eth yn-rag dhe vetya gansa yn-mes a'n kamp.

¹⁴ Ha Moyses o serrys orth soedhogyon an lu, kaptenyon milyow ha kaptenyon kansow, re dhothya a servis y'n vresel.

¹⁵ Ha Moyses a leveris dhedha, ‘A essowgh oll an benynes dhe vewa?

¹⁶ Otta, an re ma a wrug dhe vebyon Ysrael, dre gusul Balaam, omdhegi yn tislel erbynn an Arloedh yn negys Peor, hag y teuth an pla yn mysk kuntelles an Arloedh.

¹⁷ Lemmyn ytho, ledhewgh pub gorreydh yn mysk an re vyghan, ha ledhewgh pub benyn re aswonnis gour dre goska ganso.

¹⁸ Mes oll an mowesi yowynk na aswonnis gour dre goska ganso, gwithewgh yn few dh'agas honan.

¹⁹ Kampyewgh yn-mes a'n kamp seyth dydh; pubonan re ladhas den ha pubonan re dochyas den ledhys, omlanhewgh y'n tressa dydh hag y'n seythves dydh, hwi ha'gas kethyon.

²⁰ Hwi a wra purhe pub dillasenn, pup-tra a groghen, pub gweyth a vlew gaver, pup-tra a brenn.’

²¹ Hag Eleazar an oferyas a leveris dhe'n wer a vresel galsa dhe'n vatel: ‘Hemm yw ordenans an lagha re worhemmynnis an Arloedh dhe Moyses:

²² Mes an owr, an arghans, an brons, an horn, an sten, ha'n plomm,

²³ pup-tra a yll sevel erbynn an tan, hwi a wra passya der an tan, hag y fydh glan. Byttegyns y fydh purhes ynwedh gans an dowr a lanheans; ha pyth pynag na yll sevel erbynn an tan, hwi a wra passya dre dhowr.

²⁴ Res yw dhywgh golghi agas dillas y'n seythves dydh, ha hwi a vydh glan; hag a-wosa hwi a wra dos a-ji dhe'n kamp.’

Ranna an Gethyon ha'n Preydh

²⁵ An Arloedh a leveris dhe Moyses,

²⁶ ‘Gwra rekna an pyth a veu pyllys, hag a dhen hag a vest, ty hag Eleazar an oferyas ha pennow chiow tasow an kuntelles;

²⁷ ha ranna an pyth a veu pyllys yn diw rann, ynter an vreselyoryon neb a gemmeras rann y'n vresel – neb eth y'n vatel, ha'n kuntelles oll.

²⁸ Ha gwra tolli rag an Arloedh trubyt a-dhiworth an wer a vresel neb eth yn batel, onan yn-mes a bymp kans, a'n dus ha'n oghen ha'n asenes ha'n deves;

²⁹ kemmer e a'ga hanter, ha'y ri dhe Eleazar an oferyas avel offrynn dhe'n Arloedh.

³⁰ Hag a-dhiworth an hanter a vebyon Ysrael ty a gemmer onan tennys yn-mes a bub hanter-kans, a'n dus ha'n oghen ha'n asenes ha'n deves, a'n gwarthek oll, ha'ga ri dhe'n Levysi a's teves charj a dabernakel an Arloedh.’

³¹ Ha Moyses hag Eleazar a wrug dell worhemmynnis an Arloedh dhe Moyses.

³² Lemmyn an taklow pyllys gesys a'n preydh a gemmeras an wer a vresel o: hwegh kans, pymthek ha tri-ugens a vilyow a dheves,

³³ dewdhek ha tri-ugens a vilyow a warthek,

³⁴ onan ha tri-ugens a vilyow a asenes,

³⁵ ha dewdhek warn ugens a vilyow a dus a'n benynes na aswonnsa gour dre goska ganso.

³⁶ Ha'n hanter, an rann a'n re neb eth dhe vresel, o yn niver tri hans, seytek warn ugens a vilyow, pymp kans a dheves,

³⁷ ha trubyt deves an Arloedh o hwegh kans ha pymthek ha tri-ugens.

³⁸ An gwarthek o hwetek mil warn ugens, hag anedha trubyt an Arloedh o dewdhek ha tri-ugens.

³⁹ An asenes o deg warn ugens a vilyow, pymp kans, hag anedha trubyt an Arloedh o onan ha tri-ugens.

⁴⁰ An dus o hwetek mil, hag anedha trubyt an Arloedh o dewdhek den warn ugens.

⁴¹ Ha Moyses a ros an trubyt, hag o offrynn drehevys an Arloedh, dhe Eleazar an oferyas, dell worhemmynnis an Arloedh dhe Moyses.

⁴² A-dhiworth an hanter rann dhe vebyon Ysrael, hag a veu rynnys gans Moyses dhiworth an pyth esa dhe'n wer galsa dhe vresel –

⁴³ lemmyn an hanter dhe'n kuntelles o trihans, seytek warn ugens a vilyow, pymp kans a dheves,

⁴⁴ hwetek warn ugens a vilyow a warthek,

⁴⁵ ha deg warn ugens a vilyow, pymp kans a asenes,

⁴⁶ ha hwetek mil dhen –

⁴⁷ a-dhiworth an hanter dhe vebyon Ysrael Moyses a gemmeras onan yn pub hanter-kans, hag a dus hag a vestes, ha'ga ri dhe'n Levysi a's tevo charj a dabernakel an Arloedh; dell worhemmynnis an Arloedh dhe Moyses.

⁴⁸ Ena an soedhogyon esa a-ugh an milyow a'n lu, kaptenyon milyow ha kaptenyon kansow, a dheuth nes dhe Moyses,

⁴⁹ ha leverel dhe Moyses, ‘Dha servysi re niveras an wer a vresel usi yn-dann agan galloes, ha ny fyll gour vyth a-dhiworthyn.

⁵⁰ Ha ni re dhros offrynn an Arloedh, an pyth a gavas pub gour, taklow yn owr, breghwisk ha breghelligow, bysowyer sel, skinennow, ha paderennow, dhe wul prenedh ragon a-rag an Arloedh.’

⁵¹ Ha Moyses hag Eleazar an oferyas a dhegemmeras anedha an owr, pup-tra wonedhys.

⁵² Hag oll an owr a'n offrynn drehevys a offrynnsons dhe'n Arloedh, a-dhiworth kaptenyon milyow ha kaptenyon kansow, o hwetek mil, seyth kans ha hanter-kans a shekalim.

⁵³ (Gwer an vresel re gemmersa preydh, pub gour ragdho ev y honan.)

⁵⁴ Ha Moyses hag Eleazar an oferyas a gemmeras an owr a-dhiworth kaptenyon milyow ha kansow ha'y dhri a-ji dhe dylda an kuntelles, avel kovheans rag mebyon Ysrael a-rag an Arloedh.