Niverow 3 - An Bibel Kernewek 20234 (Kernewek Kemmyn)

Mebyon Aron

¹ An re ma yw henedhow Aron ha Moyses y'n termyn may kewsis an Arloedh gans Moyses war venydh Sinay.

² An re ma yw henwyn mebyon Aron: Nadab an kynsa-genys, hag Abihu, Eleazar, hag Ithamar;

³ an re ma yw henwyn mebyon Aron, an oferysi untys, a ordenas dhe servya avel oferysi.

⁴ Mes Nadab hag Abihu a verwis a-dherag an Arloedh pan offrynnsons tan astranj a-dherag an Arloedh yn gwylvos Sinay; ha ny's tevo fleghes. Ytho Eleazar hag Ithamar a servyas avel oferysi gans Aron aga thas.

Deverow an Levysi

⁵ Ha'n Arloedh a leveris dhe Moyses,

⁶ Doro loeth Levi yn ogas, ha'ga gorra a-rag Aron an oferyas, may fenystro dhodho.

⁷ I a with y dheverow ev ha deverow an kuntelles kowal a-rag tylda an kuntelles, dell venystrons dhe'n tabernakel;

⁸ i a with daffar oll tylda an kuntelles, ha'n deverow rag mebyon Ysrael dell venystrons dhe'n tabernakel.

⁹ Ha ty a re an Levysi dhe Aron ha'y vebyon; i yw res oll yn tien dhodho yn sur a-dhiworth mebyon Ysrael.

¹⁰ Ha ty a wra charjya Aron ha'y vebyon dhe witha aga dever oferyasek; mes mar teffo neb estren yn ogas, ev a vydh gorrys dhe'n mernans.

¹¹ Ha'n Arloedh a leveris dhe Moyses,

¹² ‘Otta, my re gemmeras an Levysi yn-mes a vebyon Ysrael yn le pub kynsa-genys a iger an brys yn mysk mebyon Ysrael. An Levysi a vydh dhymm,

¹³ rag pub kynsa-genys yw dhymm; y'n jydh may ledhis pub kynsa-genys yn pow Ejyp, my a sakras dhymm ow honan pub kynsa-genys yn Ysrael, hag a vab-den hag a vest; i a vydh dhymm: my yw an Arloedh.’

Niveryans an Levysi

¹⁴ Ha'n Arloedh a leveris dhe Moyses yn gwylvos Sinay,

¹⁵ ‘Gwra nivera mebyon Levi, herwydh chiow aga thasow, herwydh aga theyluyow; pub gorreydh a unn mis y oes ha moy ty a wra nivera.’

¹⁶ Ytho Moyses a's niveras herwydh ger an Arloedh, dell veu gorhemmynnys dhodho.

¹⁷ Ha'n re ma o mebyon Levi herwydh aga henwyn: Gershon ha Kohath ha Merari.

¹⁸ Ha'n re ma yw henwyn mebyon Gershon herwydh aga theyluyow: Libni ha Shimei.

¹⁹ Ha mebyon Kohath herwydh aga theyluyow: Amram, Yshar, Hebron, hag Uzziel.

²⁰ Ha mebyon Merari herwydh aga theyluyow: Mahli ha Mushi. An re ma yw teyluyow an Levysi, herwydh chiow aga thasow.

²¹ A Gershon y feu teylu an Libnysi ha teylu an Shimeysi; an re ma o teyluyow an Gershonysi.

²² Aga niver herwydh niver pub gorreydh a unn mis y oes ha moy o seyth mil ha pymp kans.

²³ Teyluyow an Gershonysi a wra kampya a-dryv an tabernakel troha'n howlsedhes,

²⁴ gans Eliasaf mab Lael, avel penn chi tasek an Gershonysi.

²⁵ Ha charj mebyon Gershon yn tylda an kuntelles yw an tabernakel, an tylda ha'y gudhans, ha'n groglenn dhe dharas tylda an kuntelles,

²⁶ ha kroglennow an klos, ha kroglenn daras an klos usi a-dro dhe'n tabernakel ha'n alter, ha'y gerdyn, dh'y wonis oll.

²⁷ A Kohath y feu teylu an Amramysi, ha teylu an Ysharysi, ha teylu an Hebronysi, ha teylu an Uzzielysi; an re ma o teyluyow an Kohathysi.

²⁸ Aga niver herwydh niver pub gorreydh a unn mis y oes ha moy o eth mil ha hwegh kans, ow kwitha deverow an sentri.

²⁹ Teyluyow mebyon Kohath a wra kampya a'n dhyghowbarth dhe'n tabernakel,

³⁰ gans Elisafan mab Uzziel avel penn chi tasek teyluyow an Kohathysi.

³¹ Ha'ga charj yw an argh, an voes, an kantoler, an alteryow, lestri an sentri dredha may fenystro an oferysi, ha'n groglenn, dh'y wonis oll.

³² Hag Eleazar mab Aron an oferyas yw penn war hembrenkysi an Levysi; ev a worwel an re a attend deverow an sentri.

³³ A Merari y feu teylu an Mahlysi ha teylu an Mushysi: an re ma yw teyluyow an Merarysi.

³⁴ Aga niver herwydh niver pub gorreydh a unn mis y oes ha moy o hwegh mil ha dew kans.

³⁵ Ha penn chi tasek teyluyow an Merarysi o Suriel mab Abihayl; i yw dhe gampya a'n gledhbarth dhe'n tabernakel.

³⁶ Ha'n charj apoyntys dhe vebyon Merari yw framyow an tabernakel, an barrys, an kolovenyow, an selyow, hag oll aga daffar, dh'y wonis oll;

³⁷ ynwedh kolovenyow an klos a-dro, ha'ga selyow ha'ga ebilyer ha'ga herdyn.

³⁸ Ha'n re ow kampya a-rag an tabernakel dhe'n est, a-rag tylda an kuntelles war-tu ha'n howldrehevel, yw Moyses hag Aron ha'y vebyon, neb a with deverow an sentri, pypynag a dal bos gwrys rag mebyon Ysrael; ha mar teffo estren yn ogas, ev a vydh gorrys dhe'n mernans.

³⁹ Oll a veu niverys a'n Levysi, a wrug Moyses hag Aron aga nivera orth gorhemmynna an Arloedh, herwydh aga theyluyow, pub gorreydh a unn mis y oes ha moy, o dew vil warn ugens.

Daspren an Re Gynsa-genys

⁴⁰ Ha'n Arloedh a leveris dhe Moyses, ‘Kemmer niveryans a bub gorreydh kynsa-genys a vebyon Ysrael, a unn mis y oes ha moy, ow kemmeres aga niver herwydh aga henwyn.

⁴¹ Ha ty a gemmer an Levysi ragov – my yw an Arloedh – yn le pub kynsa-genys yn mysk mebyon Ysrael, ha chatel an Levysi yn le oll an chatel kynsa-genys a vebyon Ysrael.’

⁴² Ytho Moyses a niveras pub kynsa-genys yn mysk mebyon Ysrael, dell worhemmynnis an Arloedh dhodho.

⁴³ Ha pub kynsa-genys gorow, herwydh niver an henwyn a unn mis aga oes ha moy dell veu niverys, o dew warn ugens a vilyow, dew kans, trydhek ha tri-ugens.

⁴⁴ Ha'n Arloedh a leveris dhe Moyses,

⁴⁵ ‘Kemmer an Levysi yn le pub kynsa-genys yn mysk mebyon Ysrael, ha chatel an Levysi yn le aga chatel; ha'n Levysi a vydh dhymm: my yw an Arloedh.

⁴⁶ Ha rag daspren an dhew kans ha trydhek ha tri-ugens a'n re gynsa-genys a vebyon Ysrael, yw moy aga niver es an Levysi,

⁴⁷ ty a gemmer pymp shekel pub huni, ow rekna herwydh shekel an sentri (an shekel ma yw ugens gera),

⁴⁸ ha ri an arghans dhe Aron ha'y vebyon rag daspren an re a vo aga niver moy ages niver an Levysi.’

⁴⁹ Ytho Moyses a gemmeras arghans an daspren a-dhiworth an re o moy aga niver ages an re dasprenys gans an Levysi;

⁵⁰ a-dhiworth an re gynsa-genys a vebyon Ysrael ev a gemmeras an arghans, mil, trihans, pymp ha tri-ugens a shekalim, reknys war-lergh shekel an sentri;

⁵¹ ha Moyses a ros arghans an daspren dhe Aron ha'y vebyon, herwydh ger an Arloedh, dell worhemmynnis an Arloedh dhe Moyses.