Niverow 27 - An Bibel Kernewek 20234 (Kernewek Kemmyn)

Myrghes Selofehad

¹ Ena y hwrug nesa myrghes Selofehad mab Hefer, mab Gilead, mab Makir, mab Manasse, a deyluyow Manasse mab Yosep. Henwyn y vyrghes o: Mahla, Noa, Hogla, Milka ha Tirsa.

² Hag i a sevis a-rag Moyses, hag a-rag Eleazar an oferyas, hag a-rag an hembrenkysi ha'n kuntelles oll, dhe dharas tylda an kuntelles, ow leverel,

³ ‘Agan tas a verwis y'n gwylvos; nyns esa ev yn mysk kowethas an re a omguntellas war-barth erbynn an Arloedh yn kowethas Koragh, mes ev a verwis a'y begh y honan; ha ny'n jevo mebyon.

⁴ Prag y tal bos hanow agan tas kemmerys dhe-ves a'y deylu, drefenn na'n jevo mab? Ro dhyn perghennogeth yn mysk breder agan tas.’

⁵ Moyses a dhros an kas a-rag an Arloedh.

⁶ Ha'n Arloedh a leveris dhe Moyses:

⁷ Myrghes Selofehad yw ewn; ty a re dhedha perghennogeth a eretons yn mysk breder aga thas ha gul dhe eretons aga thas tremena dhedha.

⁸ Ha ty a lever dhe vebyon Ysrael, ‘Mar marow gour, ha ny'n jeves mab, ena ty a wra dh'y eretons tremena dh'y vyrgh.

⁹ Ha mar ny'n jeves myrgh, ena ty a re an eretons dh'y vreder.

¹⁰ Ha mar ny'n jeves breder, ena ty a re y eretons dhe vreder y das.

¹¹ Ha mar ny'n jeves y das breder, ena ty a re y eretons dh'y neskar yw nes dhodho a'y deylu, hag ev a'n pew. Hag y fydh dhe vebyon Ysrael ordenans ha rewl, dell worhemmynnis an Arloedh dhe Moyses.’

Yoshua dhe Siwya Moyses avel Hembrenkyas

¹² Ha'n Arloedh a leveris dhe Moyses, ‘Yskynn y'n menydh ma Abarim, hag aspi an tir re res dhe vebyon Ysrael.

¹³ Ha pan y'n gwelsys, ty ynwedh a vydh kuntellys dhe'th pobel, dell veu kuntellys dha vroder Aron,

¹⁴ rag ty dhe rebellya erbynn ow ger yn gwylvos Sin dres strif an kuntelles, dhe'm sanshe der an dowrow a-rag aga lagasow.’ (An re ma yw dowrow Meriba a Kadesh yn gwylvos Sin.)

¹⁵ Moyses a leveris dhe'n Arloedh,

¹⁶ ‘Gas an Arloedh, Duw spyrysyon oll kig, dhe ordena gour a-ugh an kuntelles,

¹⁷ neb a wra mos a-dheragdha ha dos a-ji a-ragdha, neb a's hembronk yn-mes ha'ga dri a-ji; ma na vo kuntelles an Arloedh avel deves na's teves bugel.’

¹⁸ Ha'n Arloedh a leveris dhe Moyses, ‘Kemmer Yoshua mab Nun, gour ynno may ma an spyrys, ha gorra dha leuv warnodho;

¹⁹ gwra dhodho sevel a-rag Eleazar an oferyas ha'n kuntelles oll, ha ro dhodho charj yn aga golok.

²⁰ Ty a wra gorra ynno nebes a'th awtorita, may fo gostydh an kuntelles oll a vebyon Ysrael.

²¹ Hag ev a wra sevel a-rag Eleazar an oferyas, neb a wra govynn ragdho herwydh breus Urim a-rag an Arloedh; orth y er i a wra mos yn-mes, hag orth y er i a wra dos a-ji, hag ev ha mebyon Ysrael oll ganso, an kuntelles oll.’

²² Ha Moyses a wrug dell worhemmynnis dhodho an Arloedh; ev a gemmeras Yoshua ha gul dhodho sevel a-rag Eleazar an oferyas hag a-rag an kuntelles oll,

²³ hag ev a worras y dhiwleuv warnodho, hag a ros dhodho charj, dell worhemmynnis an Arloedh dhodho dre leuv Moyses.