Niverow 23 - An Bibel Kernewek 20234 (Kernewek Kemmyn)

Kynsa Dargan Balaam

¹ Ha Balaam a leveris dhe Balak, ‘Drehav dhymm omma seyth alter, ha provia ragov omma seyth lodhen ha seyth hordh.’

² Balak a wrug dell lavarsa Balaam; ha Balak ha Balaam a offrynnas war bub alter lodhen ha hordh.

³ Ha Balaam a leveris dhe Balak, ‘Sav ryb dha offrynn leskys, ha my a wra mos; martesen an Arloedh a dheu dhe vetya genev; ha pypynag y tispleg dhymm my a lever dhis.’ Hag ev eth dhe ugheldir moel.

⁴ Ha Duw a vetyas gans Balaam; neb a leveris dhodho, ‘My re arayas an seyth alter, ha my re offrynnas war bub alter lodhen ha hordh.’

⁵ Ha'n Arloedh a worras ger yn ganow Balaam, ha leverel, ‘Dehwel dhe Balak, hag yndellma y kewsydh.’

⁶ Hag ev a dhehwelis dhodho, hag otta, yth esa ev ha pennsevigyon Moab oll ow sevel ryb y offrynn leskys.

⁷ Ha Balaam a gemmeras yn-bann y gows, ha leverel, ‘A-dhiworth Aram Balak re'm dros, myghtern Moab a venydhyow an howldrevel: Deus, molleth Yakob ragov, ha deus, kuhudh Ysrael!

⁸ Fatell allav mollethi neb na wrug Duw y vollethi? Fatell allav kuhudha neb na guhudhas an Arloedh?

⁹ Rag a-dhiworth penn an karregi my a's gwel, a-dhiworth an breow my a's aspi; otta pobel ow triga aga honan, ha heb omrekna yn mysk an kenedhlow!

¹⁰ Piw a yll nivera doust Yakob, po rekna an peswora rann a Ysrael? Gas vy dhe verwel mernans an re wiryon, ha bedhes ow diwedh avel aga diwedh i!’

¹¹ Ha Balak a leveris dhe Balaam, ‘Pandr'a wrussys dhymm? My a'th kemmeras dhe vollethi ow eskerens, mes yn le henna ty re wrug aga benniga.’

¹² Hag ev a worthybis, ‘A ny dal dhymm gwaytyas leverel an pyth a worr an Arloedh y'm ganow?’

Nessa Dargan Balaam

¹³ Ha Balak a leveris dhodho, ‘Deus genev dhe gen tyller, alena may hyllydh aga gweles; ny welydh marnas an rann ogassa, ha ny's welydh oll; ena gwra aga mollethi ragov alena.’

¹⁴ Hag ev a'n kemmeras dhe wel Sofim, dhe benn Pisga, ha drehevel seyth alter, hag offrynna lodhen ha hordh war bub alter.

¹⁵ Balaam a leveris dhe Balak, ‘Sav omma ryb dha offrynn leskys, ha my ow metya gans an Arloedh yn-hons.’

¹⁶ Ha'n Arloedh a vetyas gans Balaam, ha gorra ger yn y anow, ha leverel, ‘Dehwel dhe Balak, hag yndellma y kewsydh.’

¹⁷ Hag ev a dheuth dhodho, hag otta, yth esa ow sevel ryb y offrynn leskys, ha pennsevigyon Moab ganso. Ha Balak a leveris dhodho, ‘Pandr'a leveris an Arloedh?’

¹⁸ Ha Balaam a gemmeras yn-bann y gows ha leverel, ‘Sav, Balak, ha klew; goslow orthiv, A vab Sippor:

¹⁹ Nyns yw Duw gour, may wowleverro, na mab-den, may koettho yn edrek. A wrug ev leverel, ha ny'n gwra? Po a gewsis, ha ny'n kowlwra?

²⁰ Otta, my a dhegemmeras gorhemmynn dhe venniga: ev re bennigas, ha ny allav y dhaskelwel.

²¹ Ny welir anewnder yn Yakob; na ny welas ahwer yn Ysrael. Yma an Arloedh aga Duw gansa, hag yma garm myghtern yn aga mysk.

²² Duw a's dre yn-mes a Ejyp; i a's teves, dell hevel, kern an ojyon gwyls.

²³ Rag nyns eus dewinieth erbynn Yakob, na koel erbynn Ysrael. Lemmyn y fydh leverys a Yakob, hag a Ysrael, “Pandr'a wrug Duw!”

²⁴ Awotta pobel a sev avel lewes, hag a omdhrehav avel lew; ny wrowedh bys pan dhevor an preydh, hag eva goes an re ledhys.’

²⁵ Ha Balak a leveris dhe Balaam, ‘Na wra aga mollethi vytholl, na'ga benniga vytholl.’

²⁶ Mes Balaam a worthybis ow leverel dhe Balak, ‘A ny leveris dhis, “Pup-tra a lever an Arloedh, henna y tal dhymm y wul”?’

²⁷ Ha Balak a leveris dhe Balaam, ‘Deus lemmyn, my a'th kemmer dhe gen tyller; martesen y fydh plegadow dhe Dhuw ma's molletthi ragov alena.’

²⁸ Ytho Balak a gemmeras Balaam dhe wartha Peor, hag a vir war-woeles war an gwylvos.

²⁹ Ha Balaam a leveris dhe Balak, ‘Drehav dhymmo omma seyth alter, ha provia dhymm omma seyth lodhen ha seyth hordh.’

³⁰ Ha Balak a wrug dell lavarsa Balaam, hag offrynna lodhen ha hordh war bub alter.