Niverow 2 - An Bibel Kernewek 20234 (Kernewek Kemmyn)

Towlow rag an Kampow ha'n Kerdhow

¹ An Arloedh a leveris dhe Moyses hag Aron,

² ‘Mebyon Ysrael a wra kampya peub ryb y vaner y honan, gans toknys chiow aga thasow; i a wra kampya a-dal tylda an kuntelles a bub tu.

³ An re ow kampya war denewen an est war-tu ha'n howldrehevel a vydh a vaner an kamp a Yuda herwydh aga luyow; ha hembrenkyas mebyon Yuda a vydh Nahshon mab Amminadab.

⁴ Y lu dell veu niverys a veu peswardhek ha tri-ugens a vilyow, hwegh kans.

⁵ An re a gamp rybdho a vydh loeth Yssakar; ha hembrenkyas mebyon Yssakar a vydh Nethanel mab Suar;

⁶ ha'y lu dell veu niverys a veu peswardhek ha dew-ugens a vilyow, peswar kans.

⁷ Ena loeth Zebulun; ha hembrenkyas mebyon Zebulun a vydh Eliab mab Helon.

⁸ Y lu dell veu niverys a veu seytek ha dew-ugens a vilyow, peswar kans.

⁹ Niver kowal kamp Yuda, herwydh aga luyow, yw kans, hwegh ha peswar-ugens a vilyow, peswar kans. I a wra mos yn kynsa war an kerdh.

¹⁰ ‘Dhe'n barth dhyghow y fydh baner kamp Rewben, herwydh aga luyow; ha hembrenkyas mebyon Rewben a vydh Elisur mab Shedeur.

¹¹ Y lu dell veu niverys a veu hwegh ha dew-ugens a vilyow, pymp kans.

¹² Ha'n re ow kampya rybdho a vydh loeth Simeon; ha hembrenkyas mebyon Simeon a vydh Shelumiel mab Surishadday.

¹³ Y lu dell veu niverys a veu nownsek ha dew-ugens a vilyow, trihans.

¹⁴ Ena loeth Gad; hembrenkyas mebyon Gad a vydh Eliasaf mab Reuel.

¹⁵ Y lu dell veu niverys a veu pymp ha dew-ugens a vilyow, hwegh kans ha hanter-kans.

¹⁶ Niver kowal kamp Rewben herwydh aga luyow, yw kans, unnek ha dew-ugens a vilyow, peswar kans ha hanter-kans. I a wra mos yn nessa war an kerdh.

¹⁷ ‘Ena tylda an kuntelles a wra mos war an kerdh, gans kamp an Levysi yn mysk an kampow; dell gampyons, yndellma i a wra mos war an kerdh, peub yn y le, ryb y vaner.

¹⁸ ‘War-tu ha'n howlsedhes y fydh baner kamp Efraym herwydh aga luyow; ha hembrenkyas mebyon Efraym a vydh Elishama mab Ammihud,

¹⁹ Y lu dell veu niverys a veu dew-ugens mil ha pymp kans.

²⁰ Ha rybdho y fydh loeth Manasse; ha hembrenkyas mebyon Manasse a vydh Gamaliel mab Pedahsur.

²¹ Y lu dell veu niverys a veu dewdhek warn ugens a vilyow, dew kans.

²² Ena loeth Benyamin; hembrenkyas mebyon Benyamin a vydh Abidan mab Gideoni.

²³ Y lu dell veu niverys a veu pymthek warn ugens a vilyow, peswar kans.

²⁴ Niver kowal kamp Efraym, herwydh aga luyow, yw kans hag eth a vilyow, kans. I a wra mos yn tressa war an kerdh.

²⁵ ‘War-tu ha'n gledhbarth y fydh baner kamp Dan herwydh aga luyow; ha hembrenkyas mebyon Dan a vydh Ahiezer mab Ammishadday.

²⁶ Y lu dell veu niverys a veu dew ha tri-ugens a vilyow, seyth kans.

²⁷ Ha'n re a gamp rybdho a vydh loeth Asher; ha hembrenkyas mebyon Asher a vydh Pagiel mab Okran.

²⁸ Y lu dell veu niverys a veu onan ha dew-ugens a vilyow, pymp kans.

²⁹ Ena loeth Naftali; hembrenkyas mebyon Naftali a vydh Ahira mab Enan.

³⁰ Y lu dell veu niverys a veu trydhek mil ha dew-ugens ha peswar kans.

³¹ Niver kowal kamp Dan yw kans, seytek ha dew-ugens a vilyow, hwegh kans. I a wra mos yn tiwettha, ryb aga baneryow.’

³² An re ma yw mebyon Ysrael dell vons niverys herwydh chiow aga thasow; peub y'n kampow a veu niverys herwydh aga luyow o hwegh kans ha tri a vilyow, pymp kans ha hanter-kans.

³³ Mes ny veu niverys an Levysi yn mysk mebyon Ysrael, dell worhemmynnis an Arloedh dhe Moyses.

³⁴ Ytho mebyon Ysrael a wrug war-lergh pup-tra a worhemmynnis an Arloedh dhe Moyses; yndellma I a gampyas ryb aga baneryow, hag yndellma i a dhallathas war an kerdh, pubonan gans y deylu, herwydh chi y das.