Niverow 1 - An Bibel Kernewek 20234 (Kernewek Kemmyn)

An Kynsa Niveryans

¹ An Arloedh a gewsis orth Moyses yn gwylvos Sinay, yn tylda an kuntelles, yn kynsa dydh an nessa mis, y'n nessa blydhen wosa i dhe dhos yn-mes a Ejyp, ow leverel,

² Gwra niveryans a'n kuntelles oll a vebyon Ysrael, herwydh aga theyluyow, herwydh chiow aga thasow, herwydh an niver a henwyn, pub gorreydh penn ha penn;

³ a-dhia ugens bloedh ha moy, peub yn Ysrael a yll mos yn-rag dhe vresel, ty hag Aron a wra aga nivera, lu ha lu.

⁴ Hag y fydh genowgh gour a bub loeth, pubonan ow pos penn y deylu.

⁵ Ha'n re ma yw henwyn an wer a wra sevel genowgh. A Rewben: Elisur mab Shedeur;

⁶ a Simeon: Shelumiel mab Surishadday;

⁷ a Yuda: Nahshon mab Amminadab;

⁸ a Yssakar: Nethaneel mab Suar;

⁹ a Zebulun: Eliab mab Helon;

¹⁰ a vebyon Yosep: a Efraym, Elishama mab Ammihud; hag a Manasse, Gamaliel mab Pedahsur;

¹¹ a Benyamin: Abidan mab Gideoni;

¹² a Dan: Ahiezer mab Ammishadday;

¹³ a Asher: Pagiel mab Okran;

¹⁴ a Gad: Eliasaf mab Deuel;

¹⁵ a Naftali: Ahira mab Enan.

¹⁶ An re ma o an re apoyntys yn-mes a'n kuntelles, hembrenkysi loethow aga thasow, pennow kordhow Ysrael.

¹⁷ Moyses hag Aron a gemmeras an wer ma re bia merkys aga henwyn,

¹⁸ hag yn kynsa dydh an nessa mis, i a geskorras war-barth an kuntelles oll, hag a omgovskrifas herwydh aga theyluyow, herwydh chiow aga thasow, herwydh an niver a henwyn, a-dhia ugens bloedh ha moy, penn ha penn,

¹⁹ dell worhemmynnis an Arloedh dhe Moyses. Yndella ev a's niveras yn gwylvos Sinay.

²⁰ Mebyon Rewben, kynsa-genys Ysrael, aga linyeth, herwydh aga theyluyow, herwydh chiow aga thasow, herwydh niver an henwyn, penn ha penn, pub gorreydh a-dhia ugens bloedh ha moy, peub a ylli mos war-rag dhe vresel:

²¹ an re niverys a loeth Rewben o hwegh ha dew-ugens a vilyow, pymp kans.

²² A vebyon Simeon, aga henedh, herwydh aga theyluyow, herwydh chiow aga thasow, an re anedha a veu niverys, herwydh niver an henwyn, penn ha penn, pub gorreydh a-dhia ugens bloedh ha moy, peub a ylli mos yn-rag dhe vresel:

²³ an re niverys a loeth Simeon o nownsek ha dew-ugens a vilyow, trihans.

²⁴ A vebyon Gad, aga linyeth, herwydh aga theyluyow, herwydh chiow aga thasow, herwydh niver an henwyn, a-dhia ugens bloedh ha moy, peub a ylli mos yn-rag dhe vresel:

²⁵ an re niverys a loeth Gad o pymp ha dew-ugens a vilyow, hwegh kans ha hanterkans.

²⁶ A vebyon Yuda, aga linyeth, herwydh aga theyluyow, herwydh chiow aga thasow, herwydh niver an henwyn, a-dhia ugens bloedh ha moy, peub a ylli mos yn-rag dhe vresel:

²⁷ an re niverys a loeth Yuda o peswardhek ha tri-ugens a vilyow, hwegh kans.

²⁸ A vebyon Yssakar, aga linyeth, herwydh aga theyluyow, herwydh chiow aga thasow, herwydh niver an henwyn, a-dhia ugens bloedh ha moy, peub a ylli mos yn-rag dhe vresel:

²⁹ an re niverys a loeth Yssakar o peswardhek ha dew-ugens a vilyow, peswar kans.

³⁰ A vebyon Zebulun, aga linyeth, herwydh aga theyluyow, herwydh chiow aga thasow, herwydh niver an henwyn, a-dhia ugens bloedh ha moy, peub a ylli mos yn-rag dhe vresel:

³¹ an re niverys a loeth Zebulun o seytek ha dew-ugens a vilyow, peswar kans.

³² A vebyon Yosep: mebyon Efraym, aga linyeth herwydh aga theyluyow, herwydh chiow aga thasow, herwydh niver an henwyn, a-dhia ugens bloedh ha moy, peub a ylli mos yn-rag dhe vresel:

³³ an re niverys a loeth Efraym o dew-ugens mil, pymp kans.

³⁴ A vebyon Manasse, aga linyeth, herwydh aga theyluyow, herwydh chiow aga thasow, herwydh niver an henwyn, a-dhia ugens bloedh ha moy, peub a ylli mos yn-rag dhe vresel:

³⁵ an re niverys a loeth Manasse o dewdhek warn ugens a vilyow, dew kans.

³⁶ A vebyon Benyamin, aga linyeth, herwydh aga theyluyow, herwydh chiow aga thasow, herwydh niver an henwyn, a-dhia ugens bloedh ha moy, peub a ylli mos yn-rag dhe vresel:

³⁷ an re niverys a loeth Benyamin o pymthek warn ugens a vilyow, peswar kans.

³⁸ A vebyon Dan, aga linyeth, herwydh aga theyluyow, herwydh chiow aga thasow, herwydh niver an henwyn, a-dhia ugens bloedh ha moy, peub a ylli mos yn-rag dhe vresel:

³⁹ an re niverys a loeth Dan o dew ha tri-ugens a vilyow, seyth kans.

⁴⁰ A vebyon Asher, aga linyeth, herwydh aga theyluyow, herwydh chiow aga thasow, herwydh niver an henwyn, a-dhia ugens bloedh ha moy, peub a ylli mos yn-rag dhe vresel:

⁴¹ an re niverys a loeth Asher o onan ha dew-ugens a vilyow, pymp kans.

⁴² Mebyon Naftali, aga linyeth, herwydh aga theyluyow, herwydh chiow aga thasow, herwydh niver an henwyn, a-dhia ugens bloedh ha moy, peub a ylli mos yn-rag dhe vresel:

⁴³ an re niverys a loeth Naftali o trydhek ha dew-ugens a vilyow, peswar kans.

⁴⁴ An re ma o an re niverys, neb a wrug Moyses hag Aron aga nivera gans gweres an hembrenkysi a Ysrael, dewdhek gour, pubonan rag chi y das.

⁴⁵ Ytho niver kowal mebyon Ysrael, herwydh chiow aga thasow, a-dhia ugens bloedh ha moy, peub a ylli mos yn-rag dhe vresel:

⁴⁶ aga niver kowal o hwegh kans ha tri a vilyow, pymp kans ha hanter-kans.

⁴⁷ Mes ny veu niverys an Levysi gans loeth aga thasow yn aga mysk.

⁴⁸ Rag an Arloedh a leveris dhe Moyses,

⁴⁹ ‘Unnsel loeth an Levysi ny wredh nivera, na ny's niverydh yn mysk mebyon Ysrael erell;

⁵⁰ mes sett an Levysi war dabernakel an dustuni, ha war oll y dhaffar, ha war bup-tra eus dhodho; i a dheg an tabernakel hag oll y dhaffar, hag i a'n serv, ha kampya a-dro dhe'n tabernakel.

⁵¹ Pan wra an tabernakel mos yn-rag, an Levysi a wra y dhisevel; ha pan dheu an tylda dhe vos settys yn-bann, an Levysi a wra y sevel. Ha mar teffo estren yn ogas, ev a vydh gorrys dhe'n mernans.

⁵² Mebyon Ysrael a wra settya aga thyldow, pub gour ryb y gamp y honan ha pub gour ryb y vaner y honan, herwydh aga luyow;

⁵³ mes an Levysi a wra kampya a-dro dhe dylda an dustuni, ma na vo sorr war guntelles mebyon Ysrael; ha'n Levysi a with charj tabernakel an dustuni.’

⁵⁴ Ytho mebyon Ysrael a wrug war-lergh pup-tra a worhemmynnis an Arloedh dhe Moyses; yndella y hwrussons.