Nehemia 6 - An Bibel Kernewek 20234 (Kernewek Kemmyn)

Brasow Eskerens Lettys

¹ Pan veu derivys dhe Sanballat ha Tobia ha Geshem an Arab ha remenant agan eskerens y tastrehavsen vy an fos ha nag esa torrva vyth gesys ynni (kyn na settsen vy an darasow yn-bann y'n yetow y'n eur na),

² Sanballat ha Geshem a dhannvonas dhymm, ow leverel, ‘Deus hag omvetyn ni orth tyller yn plen Ono.’ Mes i a vynnas gul dregynn dhymm.

³ Ha my a dhannvonas kannasow dhedha, ow leverel, ‘Yth esov ow kul ober meur ha ny allav dos yn-nans. Prag y hedh an ober ha my orth y asa hag ow tos yn-nans dhywgh?’

⁴ Hwath i a dhannvonas dhymm peder gweyth y'n fordh ma, ha my a worthybis dhedha y'n keth vaner.

⁵ Ena Sanballat a dhannvonas y servont dhymm yn kepar maner rag an pympes gweyth gans lyther igor yn y leuv.

⁶ Ynno y feu skrifys, ‘Derivys yw yn mysk an kenedhlow – ha Gashmu a'n lever ynwedh – ty ha'n Yedhewon dhe vynnes rebellya; henn yw prag yth es'ta ow tastrehevel an fos; may fi aga myghtern, war-lergh an geryow ma.

⁷ Hag ynwedh ty re apoyntyas profoesi dhe dhisklerya hemma a-dro dhis yn Yerusalem, ow leverel, “Yma myghtern yn Yuda!” Ha lemmyn an geryow ma a vydh derivys dhe'n myghtern. Deus lemmyn ytho hag omgusulyn war-barth.’

⁸ Ena my a dhannvonas dhodho, ow leverel, ‘Nyns eus ow hwarvos taklow a'n par ma dell leverydh; yth esos orth aga dysmygi mes a'th vrys dha honan.’

⁹ Rag i oll a vynnas agan ownekhe, ow prederi, ‘Aga diwla a vydh re wann rag an ober, ha ny vydh kollenwys.’ Lemmyn ytho, A Dhuw, krevha ow diwla.

¹⁰ A-wosa my a dheuth yn chi Shemaia, mab Delaya, mab Mehetabel, neb a veu deges yn y ji, hag ev a leveris, ‘Omvetyn ni yn chi Duw, a-berth y'n tempel, ha gwren ni degea darasow an tempel, rag ymons i ow tos dhe'th ladha; haneth ymons ow tos dhe'th ladha.’

¹¹ Mes yn-medhav, ‘A dal fia gour kepar ha my? Ha piw, kepar ha my, a allsa mos y'n tempel ha bewa? Nyns av vy a-bervedh.’

¹² My a gonvedhas na'n dannvonas Duw, mes ev re leveris an profoesans ma er ow fynn drefenn Tobia ha Sanballat a wrug y arveth.

¹³ Ev a veu arvethys, may porthen vy own ha gul yndella ha pegha, hag ytho i a allsa ri dhymm drog hanow rag ow skornya.

¹⁴ Porth kov a Tobia ha Sanballat, ow Duw, war-lergh an taklow ma a wrussons, hag ynwedh an brofoeses Noadia ha'n brofoesi erell hag a vynnas ow ownekhe.

An Fos Kowlwrys

¹⁵ Ytho an fos a veu kowlwrys y'n pympes dydh warn ugens a vis Elul, y'n dewdhek dydh ha dew-ugens.

¹⁶ Pan glewas oll agan eskerens anodho, oll an kenedhlow a-dro dhyn a gemmeras own, hag i a gollas omfydhyans, rag i a gonvedhas y fia an ober ma gwrys dre weres agan Duw.

¹⁷ Gans henna, y'n dydhyow na ugheloryon Yuda a dhannvonas lies lyther dhe Tobia ha lytherow Tobia a dheuth dhedha.

¹⁸ Rag yth esa lies yn Yuda neb o kelmys dhodho gans ti, drefenn y vos deuv Shekania mab Aragh; ha'y vab Yehohanan re gemmeras myrgh Meshullam mab Berekia avel y wreg.

¹⁹ Ynwedh yth esens ow kewsel a'y oberow da y'm lok, ha derivas ow geryow dhodho. Ha Tobia a dhannvonas lytherow rag ow ownekhe.