Nehemia 3 - An Bibel Kernewek 20234 (Kernewek Kemmyn)

Henwyn an Weythoryon

¹ Ena Elyashib an arghoferyas ha'y vreder an oferysi a dhallathas oberi hag i a dhrehevis Yet an Deves. I a's sakras hag a dhesedhas hy darasow; ha bys yn Tour an Kans, i a's sakras, bys yn Tour Hananel.

² Ha nessa dhodho, gwer Yeriko a dhrehevis. Ha nessa dhodho, Zakkur mab Imri a dhrehevis.

³ Yet an Puskes a veu dastrehevys gans mebyon Hassenaa a worras ynwedh hy jistys ha desedha hy darasow, hy ebilyer, ha'y barrys.

⁴ Nessa dhedha Meremoth mab Uria mab Hakkos a wrug ewnheansow. Ha nessa dhedha Meshullam mab Berekia mab Meshezabel a wrug ewnheansow. Ha nessa dhodho Sadok mab Baana a wrug ewnheansow.

⁵ Nessa dhedha an Tekoysi a wrug ewnheansow; mes ny worras aga ugheloryon aga diwskoedh dhe ober aga mestrysi.

⁶ An Yet Koth a veu ewnhes gans Yoyada mab Paseagh ha Meshullam mab Besodia. I a worras hy jistys ha desedha hy darasow, hy ebilyer, ha'y barrys.

⁷ Nessa dhedha ewnheansow a veu gwrys gans Melatia an Gibeonyas ha Yadon an Meronothyas war-barth ha gwer Gibeon ha gwer Mispa, esa yn-dann arloettys governour an rannvro Dres-an-Avon.

⁸ Nessa dhodho Uzziel mab Harhaya, onan a'n owroryon, ha nessa dhodho Hanania, onan a gemmyskoryon oynment, a wrug ewnheansow. I a dhaswrug Yerusalem bys y'n Fos Ledan.

⁹ Nessa dhedha Refaya mab Hur, rewler a hanter-ranndir a Yerusalem, a wrug ewnheansow.

¹⁰ Ha nessa dhodho, Yedaya, mab Harumaf, a wrug ewnheansow a-dal y ji; ha Hattush mab Hashabneya a wrug ewnheansow nessa dhodho.

¹¹ Malkia mab Harim ha Hasshub mab Pahath-moab a ewnhas tregh arall ha Tour an Fornow.

¹² Nessa dhodho, Shallum mab Hallohesh, rewler a hanter ranndir Yerusalem, a wrug ewnheansow gans gweres y vyrghes.

¹³ Yet an Nans a veu ewnhes gans Hanun ha trigoryon Zanoagh. I a's dastrehevis ha desedha hy darasow, hy ebilyer, ha'y barrys. Ynwedh i a ewnhas mil gevelin a'n fos bys yn Yet an Kawgh.

¹⁴ Yet an Kawgh a veu ewnhes gans Malkia, mab Rekab, an rewler a ranndir Beth-hakkerem. Ev a's dastrehevis ha desedha hy darasow, hy ebilyer, ha'y barrys.

¹⁵ Yet an Fenten a veu ewnhes gans Shallun mab Kol-hoze, an rewler a ranndir Mispa. Ev a's dastrehevis, hy hudha, ha desedha hy darasow, hy ebilyer, ha'y barrys. Ynwedh ev a ewnhas an fos a boll Shelagh ryb lowarth an myghtern, bys y'n grisyow a dheu yn-nans dhiworth Sita Davydh.

¹⁶ War y lergh, Nehemia mab Azbuk, an rewler a hanter ranndir Beth-sur, a wrug ewnheansow bys yn tyller a-dal bedhow Davydh, bys y'n poll gwrys dre leuv ha chi an gasoryon.

¹⁷ War y lergh, an Levysi a wrug ewnheansow: Rehum mab Bani, ha nessa dhodho Hashabia an rewler a hanter ranndir Keila, a wrug ewnheansow rag y ranndir.

¹⁸ War y lergh an ewnheansow a veu gwrys gans aga breder: Binnuy mab Henadad, rewler a'n hanter ranndir arall a Keila.

¹⁹ Nessa dhodho, Ezer mab Yeshua, rewler Mispa, a ewnhas tregh arall, dhiworth an tyller a-dal an fordh-yskynna dhe'n withva-arvow orth an elin.

²⁰ War y lergh Baruk mab Zabbay a ewnhas tregh arall dhiworth an elin dhe entrans chi Elyashib an arghoferyas.

²¹ War y lergh Meremoth mab Uria mab Hakkos a ewnhas tregh arall dhiworth entrans chi Elyashib, ha bys yn diwedh chi Elyashib.

²² War y lergh an ewnheansow a veu gwrys gans an oferysi dhiworth an pow a-derdro.

²³ War y lergh Benyamin ha Hasshub a wrug ewnheansow a-dal aga chi; ha war y lergh Azaria mab Maaseya mab Anania a wrug ewnheansow ryb y ji.

²⁴ War y lergh Binnuy mab Henadad a ewnhas tregh arall, dhiworth chi Azaria dhe'n elin ha dhe'n gornell,

²⁵ ha Palal mab Uzay a oberis dhiworth an tyller a-dal an elin ha'n tour a valek mes a ji gwartha an myghtern ogas dhe glos an gwithysi. War y lergh Pedaya mab Parosh,

²⁶ ha'n Nethinim, trigys yn Ofel, a ewnhas bys yn tyller a-dal Yet an Dowr troha'n howldrevel, ha'n tour balek.

²⁷ War aga lergh an Tekoysi a ewnhas tregh arall dhiworth an tyller a-dal an tour balek meur bys yn fos Ofel.

²⁸ Dhiworth tyller a-ugh Yet an Margh, an oferysi a wrug ewnheansow, pub huni a-dal y ji y honan.

²⁹ War aga lergh Sadok mab Immer a wrug ewnheansow a-dal y ji y honan. War y lergh Shemaia mab Shekania, an gwithyas orth Yet an Est a wrug ewnheansow.

³⁰ War y lergh Hanania mab Shelemia ha Hanun, hweghves mab Salaf a ewnhas tregh arall. War y lergh Meshullam mab Berekia a wrug ewnheansow a-dal y roum.

³¹ War y lergh, Malkia, onan a'n owroryon a wrug ewnheansow bys yn chi an Nethinim ha'n wikoryon, a-dal Yet an Kuntellyans, ha bys y'n chambour a-ugh an gornell.

³² Hag yntra an chambour a-ugh an gornell ha Yet an Deves an owroryon ha'n wikoryon a wrug ewnheansow.