Nahum 3 - An Bibel Kernewek 20234 (Kernewek Kemmyn)

Galar Nineve

¹ Go-hi an sita woesek! Hi oll yw leun a wowyow hag a breydh; ny hedh an pylla.

² Son an hwypp, ha son klattra an rosow; mergh ow poenya, ha charettow ow lamma;

³ an marghek ow kodros, an kledha ow lughesi, an guw ow terlentri; niver bras a dus ledhys, ha kals a garynyes, korfow diniver; i a drebuch war aga horfow marow.

⁴ Drefenn myns fornikasyon an hora teg hy semlans, mestres pystri, neb a werth kenedhlow gans hy fornikasyon, ha teyluyow gans hy fystri, –

⁵ mir, yth esov er dha bynn, yn-medh Arloedh an luyow, ha my a dhrehav dha lostennow dres dha fas; my a dhiskwa dha noethedh dhe'n kenedhlow, ha'th tisenor dhe'n gwlaskordhow.

⁶ My a dewl mostedhes warnas, ha'th tespitya, ha gul ensampel ahanas.

⁷ Hag y hwyrvydh, kemmys neb a vir warnas a blynch dhiworthis, ha leverel, ‘Nineve yw gwastys: piw a wra kyni warnedhi? A-ble hwilav konfortoryon rygdhi?’

Dysk dhiworth Tenkys No-amon

⁸ Osta gwell ages No-amon, esa desedhys yn mysk an goverow, gans an dowrow a-dro dhedhi: neb o an mor hy gwall, ha'n dowrow hy fos?

⁹ Ethiopia o hy krevder, hag Ejyp ynwedh, heb diwedh; Put ha Lybia o dha weresoryon.

¹⁰ Byttegyns hi ynwedh eth yn divroedh, hi eth yn kethneth: ynwedh hy fleghes a veu terrys dhe demmyn dhe benn an stretys oll: i a dewlis prenn rag hy thus wordhi, ha'y thus vras oll a veu kelmys yn kargharow.

¹¹ Ty ynwedh a vydh medhow, ty a omgudh; ty ynwedh a hwila skovva dhiworth an eskar.

Euver yw Darbari

¹² Dha geryow oll a vydh avel figbrennyer gans aga figys kynsa adhves; mars yns i shakys, i a goedh a-berth yn ganow neb a vynn aga dybri.

¹³ Awotta, dha dus a-berth ynnos yw benynes; igerys a-les dhe'th eskerens yw porthow dha dir, tan a dhevor barrys dha yetys.

¹⁴ Tenn dhis dowr rag an omsettyans, krevha dha geryow; ke a-bervedh y'n leys, ha stankya an pri, krevhe an kowynnow-brykk.

An Lokustes a Nij dhe-ves

¹⁵ Ena tan a wra dha lenki, an kledha a wra dha dreghi yn-nans, ev a'th lenk avel an lokust diaskell. Bydh niverus kepar ha'n lokust diaskell, palsha kepar ha'n hes a lokustes!

¹⁶ Ty re ynkressyas dha varchons dres ster an nev: an lokust diaskell a dhiwisk y groghen goth, ha nija dhe-ves.

¹⁷ Dha withysi yw avel an lokust askellek, ha dha skrifennysi avel hes a lokustes a gamp y'n keow yn dydh yeyn, mes pan vo an howl ow splanna i a nij dhe-ves, ha denvyth ny woer ple'mons.

¹⁸ Dha vugeledh a gosk, A vyghtern Assyria, hunya a wra dha dus vryntin; skoellys yw dha bobel war an menydhyow, ha nyns eus nagonan dh'aga huntell.

¹⁹ Nyns eus sawment dhe'th pystik, heb eli yw dha vrew; myns a glew dha nowodhow a dak diwla dresos; rag piw eus, ma na dremenas warnodho dha dhroktra pub eur oll?