Mika 5 - An Bibel Kernewek 20234 (Kernewek Kemmyn)

¹ Lemmyn kuntell dha vagasow a soudoryon, ty vyrgh a vagasow; omsettya a-dro dhyn a wrussons; gans gwelenn y hweskons bogh rewler Ysrael.

Messia dhiworth Bethlehem Ambosys

² Ha ty, Bethlehem Efratha, byghan kynth os yn mysk teyluyow Yuda, yn-mes ahanas y teu dhymm nebonan a vydh rewler yn Ysrael, may feu y dhalleth a'n termyn koth, a dhydhyow pell tremenys.

³ Rakhenna ev a vynn aga forsakya, bys pan wra an venyn yn lavur dineythi; ena remenant y vreder a dhehwel dhe vebyon Ysrael.

⁴ Hag ev a sev, ha bugelya yn nerth an Arloedh, yn braster hanow an Arloedh y Dhuw. Hag i a drig yn sawder, rag lemmyn ev a vydh meur bys yn finweth an norvys.

⁵ Ha'n den ma a vydh kres. Pan dheffo Asshur yn agan tir ha trettya war agan gweres, ni a dhrehav er y bynn seyth bugel hag eth penntern a dus;

⁶ Bugelya a wrons an tir a Assyria dre gledha, ha'n tir a Nimrod dre gledha noeth; hag i a'gan delirv dhiworth Asshur pan dheffo yn agan tir ha trettya a-berth yn agan or.

Ober an Remenant y'n Termyn a Dheu

⁷ Ena remenant Yakob yn mysk lies pobel, a vydh avel gluth a'n Arloedh, avel kowasow war an gwels, na's teves govenek yn gour na ny wortons mebyon den.

⁸ Ha remenant Yakob yn mysk an kenedhlow yn mysk lies pobel, a vydh avel lew yowynk yn mysk bestes an goeswik, avel lewik yn mysk greow deves; pan boen ev dresta, ev a wra stankya ha skwardya, ha nyns eus denvyth dhe dhelivra.

⁹ Dha dhorn a vydh drehevys a-ugh dha eskerens, ha dha envi oll a vydh distruys.

¹⁰ Hag y'n jydh na, yn-medh an Arloedh, my a dregh dha vergh a-dhiworthis ha shyndya dha jarettow;

¹¹ ha my a dregh dhe-ves an sitys a'th tir ha domhwel oll dha gastylli;

¹² ha my a vynn defendya pystriow mes a dha dhorn, ha ty ny' fydh koelyogyon namoy;

¹³ ha my a dregh dhe-ves dha imajys gravys ha'th peulveyn a-dhiworthis, ha ny wredh omblegya namoy a-rag ober dha dhiwdhorn;

¹⁴ ha my a dhiwreydh dha Asherim a-dhiworthis, ha diswul dha sitys.

¹⁵ Hag yn sorr hag yn konnar y talvydhav dial war an kenedhlow na obayas.