Mika 3 - An Bibel Kernewek 20234 (Kernewek Kemmyn)

Rewloryon Dhrog ha Fals Profoesi

¹ Hag y leveris vy: Klewyewgh, hwi bennow a Yakob, ha rewloryon chi Ysrael! A nyns yw ragowgh hwi dhe aswonn gwirvreus? –

² hwi neb a gas dader ha kara drogedh, neb a skward an groghen dhiworta, ha'ga hig dhiworth aga eskern;

³ neb a dheber kig ow fobel, ha pilya aga kroghen dhiworta, ha terri aga eskern yn temmigow ha'ga nadha avel kig yn chek, avel kig yn kalter.

⁴ Ena, i a gri dhe'n Arloedh mes ny wra ev gorthybi dhedha; ev a gudh y fas a-dhiworta an prys na, drefenn i dhe wul aga drog weythresow.

⁵ Yndella yn-medh an Arloedh a-dro dhe'n brofoesi neb a hembronk ow fobel yn sowdhan, neb a gri ‘Kres’ pan y's teves neppyth dhe dhybri, mes i a wra gwerrya orth seul na worr travyth yn aga ganow.

⁶ Rakhenna, y fydh nos dhywgh, heb gwelesigeth, ha tewlder dhywgh, heb dewinieth. An howl a wra sedhi war an brofoesi, ha'n jydh a vydh du a-ughta;

⁷ an dhargenysi a vydh diskrassyes, ha'n goelyogyon shamys; i oll a wra kudha aga diwweus, rag nyns eus gorthyp a Dhuw.

⁸ Saw my, lenwys a alloes ov vy, a spyrys an Arloedh, a wirvreus ha nerth, rag disklerya dhe Yakob y gammweythres ha dhe Ysrael y beghadow.

⁹ Klewyewgh hemma, hwi bennow a ji Yakob ha rewloryon chi Ysrael, neb a gas gwirvreus ha kamma pup-tra yw ewn,

¹⁰ neb a dhrehav Sion gans goes ha Yerusalem gans kammhynseth.

¹¹ Hy fennow a re breus rag falswober, hy oferysi a dhysk rag arveth, hy frofoesi a dhargan rag arghans; hag i ow poesa war an Arloedh, ow leverel, ‘A nyns usi an Arloedh yn agan mysk? Ny wra drog vyth dos warnan.’

¹² Rakhenna, a-barth dhywgh hwi, Sion a vydh erys par ha gwel; Yerusalem a dheu ha bos bern a vagoryow, Arloedh ha menydh an chi a vydh drumm gwydhyel.