Mika 2 - An Bibel Kernewek 20234 (Kernewek Kemmyn)

Tenkys an Re a Arwask an Voghosogyon

¹ Go-i neb a dhevis drogedh ha gul sherewynsi war aga gweliow! Orth dydh-tardh i a'n gwra, drefenn y vos yn galloes aga diwleuv.

² I a hwans parkow, ha settya dalghenn ynna; ha chiow, ha'ga kemmeres dhe-ves; i a arwask gour ha'y ji, gour ha'y eretons.

³ Rakhenna, yndellma y lever an Arloedh: Otta, erbynn an teylu ma yth esov vy ow tevisya drogedh, ma na yllowgh hwi kildenna agas konna anodho; ha ny gerdhowgh howtyn, rag y fydh termyn a dhroktra.

⁴ Y'n jydh na tus a wra ges ahanowgh, galari gans kynvann trist, ha leverel, ‘Kowldhiswrys on ni; ev re janjyas eretons ow fobel; ass wra ev y gemmeres dhiworthiv! Ev a rann agan gwelyow dhe'n trygher.’

⁵ Rakhenna ny' fydh nagonan a dowllo an lovan-vusura war-lergh an koelbrenn yn kuntelles an Arloedh.

Kesstrif gans an Fals Profoesi

⁶ ‘Na brofoesewgh yn transyek’ yn-medhons i yn transyek. ‘Ny dhegoedh profoesa a'n taklow ma; ny dheu disenor warnan.’

⁷ Yw chi Yakob milliges? Yw spyrys an Arloedh berrhes? Yw hemma y wriansow ev? A ny wra ow geryow gul da dhe seul a gerdh yn ewnhynsek?

⁸ Mes hwi a sev avel eskar erbynn ow fobel; hwi a dhiwisk an vantell keffrys ha'n gwisk a'n re a dremen yn sawder kepar ha tus ow tehweles dhiworth an gas.

⁹ Gwragedh ow fobel a fesyowgh a'ga chiow plesont; dhiworth aga fleghesigow hwi a gemmer dhe-ves ow golewder bynitha.

¹⁰ Sevewgh ha kewgh dhe-ves, rag nyns yw homma agas powesva; drefenn agas defolans hi a vydh distruys, ha'n terroes a vydh tynn.

¹¹ Mar kertha gour a-dro ow kowleverel gans gwyns ha gowegneth, ‘My a brofoes dhis a win hag a gorev’, ev a via an profoes rag an bobel ma!

Ambos dhe Remenant Ysrael

¹² My a'th kuntell, A Yakob, oll yn tien, my a guntell remenant Ysrael; my a's gorr war-barth avel deves Bosra, avel flokk yn kres y beurva; dasseni a wra gans tus.

¹³ Ev neb a derr an aswa, yskynna a-dheragdha a wra; i a derr der an aswa ha tremena der an yet, ha mos yn-mes dredhi. Aga myghtern a dremen a-dheragdha, an Arloedh orth aga fenn.