Matthew 7 - An Bibel Kernewek 20234 (Kernewek Kemmyn)

Breusi Tus Erell

¹ ‘Na wrewgh breusi ma na vewgh hwi breusys;

² rag gans an vreus may hwrewgh hwi breusi dredhi, hwi a vydh breusys, ha gans an musur may fusurowgh hwi ganso, y fydh musurys dhy'hwi.

³ Ha prag y hwre'ta mires orth an motta usi yn lagas dha vroder, mes ny verkydh an geber usi yn dha lagas dha honan?

⁴ Po fatell yll'ta jy leverel dhe'th vroder, “Gas vy dhe denna an motta yn-mes a'th lagas”, hag awotta'n geber y'th lagas dha honan?

⁵ Ty falswas! Kyns oll towl an geber yn-mes dhiworth dha lagas tejy hag ena y hwelydh diblans rag tewlel an motta yn-mes a lagas dha vroder.

⁶ Na rewgh dhe'n keun an pyth yw sans, ha na dewlewgh agas perlys a-rag mogh, rag own i dh'aga threttya yn-dann dreys ha treylya dh'agas skwardya hwi.

Govynn, Hwila, Knouk

⁷ ‘Govynnewgh hag y fydh res dhywgh, hwilewgh ha hwi a gyv, knoukyewgh hag y fydh igerys dhywgh;

⁸ rag peub neb a wovynn a dhegemmer, ha neb a hwila a gyv, ha dhe neb a gnouk y fydh igerys.

⁹ Po py den eus ahanowgh, orto mar kovynn y vab bara, a re dhodho men?

¹⁰ Po mar kovynn ev pysk, a re dhodho sarf?

¹¹ Hwi, ytho, ow pos drog, mar kodhowgh ri rohow da dh'agas fleghes, pygemmys moy y re agas Tas y'n nevow dhe'n re a wovynn orto!

¹² Kekemmys ytho a vynnowgh orth tus gul ragowgh hwi, henna gwrewgh ragdha i; rag hemm yw an lagha ha'n brofoesi.

An Porth Kul

¹³ ‘Ewgh a-bervedh der an porth kul; rag ledan yw an porth hag efan yw an fordh a led dhe dhiswrians ha lies yw an re a wra entra dredhi;

¹⁴ mes kul yw an porth hag ynn yw an fordh a led dhe vewnans, ha tanow yw an re a's kyv.

Gwydhenn Godhvedhys dre hy Frut

¹⁵ ‘Bedhewgh war a fals profoesi, neb a dheu dhywgh yn gwisk deves, mes war-ji yth yns i bleydhi ow ravna.

¹⁶ Hwi a wra aga aswonn der aga frut. A guntellir grappys dhiworth spern po figys dhiworth askall?

¹⁷ Yn kettella pub gwydhenn dha a dheg frut da, mes gwydhenn bodrek a dheg drog frut.

¹⁸ Ny yll gwydhenn dha doen drog frut, na byth moy ny yll gwydhenn bodrek doen frut da.

¹⁹ Pub gwydhenn na dheg frut da a vydh treghys dhe'n dor ha tewlys y'n tan.

²⁰ Herwydh aga frut ytho hwi a's aswonn.

Bythkweth ny'gas Aswonnis

²¹ ‘Nyns a a-bervedh yn gwlaskor nev pubonan a lever dhymm, “Arloedh, Arloedh”, mes ev neb a wra bodh ow Thas eus yn nevow.

²² Lies huni a lever dhymm y'n jydh na, “Arloedh, Arloedh, a ny wrussyn profoesa yn dha hanow jy, hag yn dha hanow tewlel yn-mes dywolow, hag yn dha hanow gul meur a oberow galloesek?”

²³ Hag ena my a dheklar dhedha, “Bythkweth ny'gas aswonnis; diberthewgh dhiworthiv, hwi dhrogoberoryon!”

An Re a Woslow ha'n Re a Ober

²⁴ ‘Pubonan ytho a woslow ow geryow ma hag a's gwra, a vydh hevelebys dhe wour fur neb a dhrehevis y ji war an garrek;

²⁵ ha'n glaw a goedhas ha'n livow a dheuth ha'n gwynsow a hwythas ha deghesi war an chi na mes ev ny goedhas, rag y vos selys war garrek.

²⁶ Ha pubonan a woslow ow geryow ma mes heb aga gul a vydh hevelebys dhe wour foll neb a dhrehevis y ji war dir tewesek;

²⁷ ha'n glaw a goedhas hag y teuth an livow, ha'n gwynsow a hwythas ha deghesi war an chi na, hag ev a goedhas, ha meur o an terroes anodho.’

²⁸ Ha pan worfennas Yesu an lavarow ma, an bobel a's tevo marth a'y dhyskas;

²⁹ rag yth esa ev orth aga dyski kepar hag onan a'n jevo galloes ha na kammenn vyth avel aga skribys.