Matthew 4 - An Bibel Kernewek 20234 (Kernewek Kemmyn)

Temptyans Yesu

¹ Ena Yesu a veu hembrenkys yn-bann dhe'n gwylvos gans an Spyrys dhe vos temptys gans an jowl.

² Ha pan wrussa penys dew-ugens dydh ha dew-ugens nos, a-wosa ev a borthas nown.

³ Ha'n tempter a dheuth dhodho ha leverel, ‘Mars osta Mab Duw, lavar dhe'n veyn ma bos gwrys bara.’

⁴ Mes ev a worthybis ow leverel, ‘Skrifys yw, “Mab-den ny wra bewa unnsel orth bara, saw orth pub ger a dheu yn-mes a anow Duw.” ’

⁵ Ena an jowl a'n kemmeras dhe'n sita sans hag a'n settyas war bynakyl an tempel,

⁶ hag yn-medh ev dhodho, ‘Mars osta Mab Duw, omdowl dha honan yn-nans, rag skrifys yw, “Ev a worhemmynn dh'y eledh a-dro dhis, hag yn aga diwla i a'th teg yn-bann ma na weski dha droes erbynn men.” ’

⁷ Yesu a leveris dhodho, ‘Arta skrifys yw, “Ny wredh temptya an Arloedh dha Dhuw.” ’

⁸ Arta an jowl a'n kemmeras dhe venydh pur ughel ha diskwedhes dhodho oll gwlaskordhow an bys ha'ga splannder,

⁹ ha leverel dhodho, ‘Oll an re ma my a vynn ri dhis mar koedhydh dhe'n dor ha'm gordhya.’

¹⁰ Ena yn-medh Yesu dhodho, ‘Voyd alemma, Satnas; rag skrifys yw, “Ty a wra gordhya an Arloedh dha Dhuw hag ev yn unnsel ty a wra servya.” ’

¹¹ Ena an jowl a'n gasas hag otta, eledh a dheuth dh'y servya.

Dalleth an Pregoth yn Galile

¹² Ha pan glewas bos Yowann dalghennys, ev a omdennas dhe Alile.

¹³ Ha wosa gasa Nazareth ev eth dhe driga yn Kapernaum ryb an mor yn oryon Zebulun ha Naftali,

¹⁴ may fe kollenwys an dra kewsys dre Ysay an profoes, ow leverel,

¹⁵ ‘Pow Zebulun ha pow Naftali, fordh an mor a'n tu arall dhe'n Yordan, Galile an Jentilys:

¹⁶ an bobel esedhys yn tewolgow re welas golow bras, ha war an re esedhys yn tir ha skeus ankow yma golow drehevys yn-bann.’

¹⁷ Alena rag, Yesu a dhallathas pregoth ha leverel, ‘Koedhewgh yn edrek, rag gwlaskor nev re dheuth nes.’

Galow Peswar Pyskador

¹⁸ Hag ev ow kerdhes ryb mor Galile a welas dew vroder, Simon, gelwys Peder hag Androw y vroder, ow tewlel roes y'n mor; rag pyskadoryon ens i.

¹⁹ Hag ev a leveris dhedha, ‘Dewgh war ow lergh, ha my a'gas gwra pyskadoryon a dus.’

²⁰ A-dhesempis i a asas an roesow hag a'n siwyas

²¹ Hag ev ow mones yn-rag alena a welas dew vroder arall, Jamys mab Zebede ha Yowann y vroder, yn gorhel gans Zebede aga thas owth ewnhe aga roesow; hag ev a's gelwis.

²² Ha desempis i a asas an gorhel ha'ga thas hag a'n siwyas.

Menystra dhe Routh Veur

²³ Hag yth esa ow mos a-dro dres oll Galile ow tyski yn aga synagys ha pregoth aweyl an wlaskor ha sawya pub kleves ha pub dises yn mysk an bobel,

²⁴ ha'n son anodho a omlesas dres oll Syria, hag i a dhros dhodho oll an dus plagys gans lies eghenn a glevesow ha tormentys, ha'n re dalghennys gans dywolow, ha'n loerogyon ha'n balsyon, hag ev a's sawyas.

²⁵ Ha routhow bras a'n siwyas, dhiworth Galile ha Dekapolis ha Yerusalem ha Yudi, ha dhiworth an tu arall dhe'n Yordan.