Matthew 27 - An Bibel Kernewek 20234 (Kernewek Kemmyn)

Yesu Dres a-rag Pilat

¹ Ha ternos vyttin, oll an bennoferysi ha henavogyon an bobel a wrug omgusulyans erbynn Yesu rag y worra dhe'n mernans;

² ha wosa i dh'y gelmi, i a'n dug yn-kerdh ha'y dhaskorr dhe Pilat an governour.

Mernans Yudas

³ Ena Yudas neb a'n traytas pan welas ev dhe vos dampnys a goedhas yn edrek hag a dhros an deg bath warn ugens a arghans arta dhe'n bennoferysi ha'n henavogyon,

⁴ ow leverel, ‘My re beghas a-ban draytis goes gwiryon.’ Yn-medhons i, ‘Pandr'yw henna dhyn ni? Ty dha honan preder anodho.’

⁵ Ha wosa tewlel an mona y'n tempel, ev a omdennas ha mones dh'y omgregi.

⁶ An bennoferysi a gemmeras an mona ha leverel, ‘Nyns yw lafyl y worra y'n arghow, rag y vos pris goes.’

⁷ Ha wosa omgusulya i a brenas ganso gwel an weythoryon pri avel ynkleudhva rag estrenyon.

⁸ Rakhenna an gwel na yw henwys Gwel an Goes bys y'n jydh hedhyw.

⁹ Ena y feu kollenwys an dra kewsys dre Yeremia an profoes, ow leverel, Hag i a gemmeras an deg bath warn ugens a arghans, pris an den talvesys, neb a veu talvesys gans mebyon Ysrael,

¹⁰ hag i a's ros rag gwel an gweythor pri, dell ordenas an Arloedh dhymm.

Yesu Apposys gans Pilat

¹¹ Ha Yesu a sevis a-rag an governour; ha'n governour a wovynnas orto, ow leverel, ‘Ty yw myghtern an Yedhewon?’ Yn-medh Yesu, ‘Ty a'n lever.’

¹² Ha pan ova kuhudhys gans an bennoferysi ha'n henavogyon, ny worthybis travyth.

¹³ Ena yn-medh Pilat dhodho, ‘A ny glewydh py lies tra y tustunions er dha bynn?’

¹⁴ Hag ev ny worthybis dhodho unn ger vytholl, mayth o marth meur dhe'n governour.

Yesu Dampnys dhe'n Mernans

¹⁵ Hag yth o dhe'n governour us y'n goel dhe dhelivra unn prisner dhe'n routh, piwpynag a vynnens.

¹⁶ Hag y'n eur na yth esa dhedha prisner drog-gerys gelwys Barabbas.

¹⁷ Ytho pan ens i kuntellys war-barth, Pilat a leveris dhedha, ‘Pyneyl a vynnowgh may hwrylliv y dhelivra dhywgh, Barabbas, po Yesu yw henwys Krist?’

¹⁸ Rag ev a wodhya i dh'y dhaskorr der atti.

¹⁹ Ha pan ova esedhys yn barr an vreus, y wreg a dhannvonas dhodho, ow leverel, ‘Ty na wra mellya gans an den gwiryon na, rag my a wodhevis lower hedhyw yn hunros a'y wovis ev.’

²⁰ Mes an bennoferysi ha'n henavogyon a dhynyas an routhow dhe wovynn Barabbas dhe vos delivrys, ha distrui Yesu.

²¹ Ena y hworthybis an governour ha leverel dhedha, ‘Pyneyl a'n dhew y fynnowgh orthiv delivra dhywgh?’ Yn-medhons, ‘Barabbas.’

²² Yn-medh Pilat dhedha, ‘Pandr'a wrav vy orth Yesu yw gelwys Krist?’ I oll a leveris, ‘Bedhes krowsys!’

²³ Yn-medh ev, ‘Pana dhrog ytho a wruga?’ Mes i a armas dhe voy ow leverel, ‘Bedhes krowsys!’

²⁴ Ha Pilat, pan welas na ylli gwaynya travyth, mes yth esa freudh ow talleth, a gemmeras dowr ha golghi y dhiwla a-rag an routh ow leverel, ‘Glan yth o'ma a woes an den gwiryon ma. Hwi omgemmerewgh.’

²⁵ Ha'n bobel oll a worthybis ow leverel, ‘Re bo y woes warnan ni ha war agan fleghes.’

²⁶ Ena ev a dhelivras Barabbas dhedha, mes Yesu ev a skorjyas ha'y ri dhe vos krowsys.

An Soudoryon a Skorn Yesu

²⁷ Ena soudoryon an governour a worras Yesu dhe'n pretorium hag a guntellas oll an bagas a soudoryon a-dro dhodho.

²⁸ Ha wosa y dhestryppya, i a worras mantell gogh a-dro dhodho,

²⁹ hag a blethas kurun a spern ha'y gorra war y benn ha korsenn yn y leuv dhyghow, hag ow koedha war benn-dewlin a-dheragdho, i a wrug ges anodho ow leverel, ‘Hayl, Myghtern an Yedhewon!’

³⁰ Hag i a drewas warnodho ha kemmeres an gorsenn hag yth esens orth y weskel war y benn.

³¹ Ha wosa gul ges anodho, i a dhi'skas an vantell ha'y wiska gans y dhillas y honan ha'y dhoen yn-kerdh dhe vos krowsys.

Krowsyans Yesu

³² Hag ow mos yn-mes, i a gavas den a Kyrene, henwys Simon; i a wrug y gonstryna dhe dhoen y grows.

³³ Ha pan ens devedhys dhe dyller henwys Golgotha (henn yw Tyller Krogen),

³⁴ i a ros dhodho dhe eva gwin kemmyskys gans bystel; mes wosa ev dh'y dastya, ny vynnas y eva.

³⁵ Ha pan y'n krowssons i a rannas y dhillas ow tewlel prenn.

³⁶ Ena i a esedhas, ha'y witha ena.

³⁷ Hag a-ugh y benn i a worras skrif an kuhudhans er y bynn, ‘Hemm yw Yesu, Myghtern an Yedhewon.’

³⁸ Ena y feu krowsys ganso dew lader, an eyl a'y barth dhyghow, ha'y gila a'y barth kledh.

³⁹ Ha'n dremenysi a'n kablas, ow shakya aga fenn,

⁴⁰ ha leverel, ‘A ty, neb a dhistru an tempel ha'y dhrehevel kyns penn trydydh, omsaw dha honan mars os Mab Duw, ha diyskynn a'n grows.’

⁴¹ Yn keth vaner an bennoferysi gans an skribys ha'n henavogyon ow kul ges a leveris,

⁴² ‘Tus erell ev a's sawyas, ev y honan ny yll omsawya; Myghtern Ysrael ywa, diyskynnes lemmyn a'n grows ha ni a grys dhodho;

⁴³ ev a fydhyas yn Duw, re'n deliffro lemmyn mara'n mynn; rag ev a leveris, “My yw Mab Duw.” ’

⁴⁴ Yn kepar maner ynwedh yth esa an ladron neb o krowsys ganso orth y dhespitya.

Mernans Yesu

⁴⁵ Ha dhiworth an hweghves eur yth esa tewolgow war oll an nor bys y'n nawves eur.

⁴⁶ Hag a-dro dhe'n nawves eur, Yesu a armas gans lev ughel ow leverel, ‘Eli, Eli, lema sabaghthani?’ henn yw: ‘Ow Duw, Ow Duw, prag y'm forsaksys?’

⁴⁷ Re an dus a sevi ena, pan y'n klewsons a leveris, ‘Yma an den ma ow karma war Elias.’

⁴⁸ Ha dihwans onan anedha a boenyas dhe gavoes spong hag a'n lenwis a aysel ha'y worra war welenn ha'y ri dhodho dhe eva.

⁴⁹ Mes an re erell a leveris, ‘Gesewgh ni dhe weles mar teu Elias rag y sawya.’

⁵⁰ Ena Yesu a armas arta gans lev ughel hag a dhaskorras an enev.

⁵¹ Hag otta, vayl an tempel a veu skwardys yntra diw rann, a'n penn a-wartha bys y'n goeles, hag y feu dorgrys ha'n karregi a veu folsys,

⁵² ha'n bedhow a veu igerys ha meur a gorfow a'n syns koedhys yn kosk a veu drehevys;

⁵³ hag i a dheuth yn-mes a'n bedhow wosa y dhasserghyans, ha mos y'n sita sans hag omdhiskwedhes dhe lies huni.

⁵⁴ Ha'n penn-kangour ha'n re esa ganso ow kwitha Yesu, pan welsons an dorgrys hag oll a hwarva, a borthas own meur, ow leverel, ‘Yn tevri hemma o Mab Duw.’

⁵⁵ Hag yth esa ena lies benyn ow mires a-bell, neb a holyas Yesu dhiworth Galile, orth y servya.

⁵⁶ Yn aga mysk yth esa Maria Magdalena, ha Maria mamm Jamys ha Yoses, ha mamm mebyon Zebede.

Ynkleudhyans Yesu

⁵⁷ Ha devedhys an gorthugher, den rych a Arimathea, henwys Yosep, a dheuth, neb y honan ynwedh o dyskybel dhe Yesu.

⁵⁸ Ev eth dhe Pilat ha govynn orto korf Yesu. Ena Pilat a erghis may fe res dhodho.

⁵⁹ Ha wosa ev dhe gemmeres an korf, Yosep a'n maylyas yn lien glan

⁶⁰ hag a'n gorras yn y vedh nowydh a wrussa y dreghi y'n garrek, ha wosa ev dhe rolya men bras a-dreus dhe dharas an bedh, yth eth yn-kerdh.

⁶¹ Hag yth esa ena Maria Magdalena ha'n Varia arall, esedhys a-dal an bedh.

An Withysi orth an Bedh

⁶² Ha ternos, an jydh wosa Darbar an Goel, an bennoferysi ha'n Fariseow a omguntellas war-barth ha mos dhe Pilat,

⁶³ ow leverel, ‘Arloedh, yma kov dhyn an toeller na, pan o hwath yn few, dhe gewsel, “Wosa trydydh y hwrav dasserghi.”

⁶⁴ Argh, ytho, may fo an bedh gwithys gans rach bys y'n tressa dydh rag na dheffo y dhyskyblon yn nos ha'y ladra ha leverel dhe'n bobel, “Drehevys veu dhiworth an re varow”, hag yndella an toell diwettha a vydh gweth ages an kynsa.’

⁶⁵ Yn-medh Pilat dhedha, ‘Yma gwithysi genowgh, kewgh, ha'y witha dell wodhowgh.’

⁶⁶ Hag yth ethons ha gwitha an bedh, ow selya an men ha gorra gwithysi warnodho.