Matthew 23 - An Bibel Kernewek 20234 (Kernewek Kemmyn)

Kuhudhans an Skribys ha'n Fariseow

¹ Ena Yesu a gewsis dhe'n routhow ha dh'y dhyskyblon

² ow leverel, ‘An skribys ha'n Fariseow re esedhas war esedh Moyses.

³ Rakhenna gwrewgh ha gwithewgh oll an taklow a leverons dhywgh, saw herwydh aga gweythresow na wrewgh: rag i a gews mes ny wrons.

⁴ I a gelm beghyow poes ha kales dhe berthi ha'ga gorra war dhiwskoedh tus, mes i aga honan ny vynnons aga remova gans aga bys.

⁵ Oll aga oberow i a wra rag bos gwelys gans tus; rag i a ledanha aga fylakteriow ha hirhe pilennow aga gwisk.

⁶ I a gar an penn-esedhow yn kevewiow ha'n penn-esedhow y'n synagys,

⁷ ha salusyansow y'n marghasow, ha bos gelwys Rabbi gans tus.

⁸ Mes hwi, na bedhewgh gelwys Rabbi; rag onan yw agas dyskador hag oll hwi yw breder.

⁹ Ha hwi na wrewgh gelwel denvyth y'n nor agas tas, rag onan yw agas Tas a nev.

¹⁰ Ha na vedhewgh gelwys dyskadoryon, rag onan yw agas dyskador, an Krist.

¹¹ An moyha ahanowgh yw agas servont.

¹² Neb a omughelha a vydh dres isel, ha neb a omuvelha a vydh ughelhes.

¹³ ‘Go-hwi, skribys ha Fariseow, falswesyon, rag hwi a dhege gwlaskor nev erbynn tus; rag nyns ewgh agas honan a-bervedh ynno na ny esowgh dhe vones a-bervedh an re a vynn entra.

¹⁴ ‘Go-hwi, skribys ha Fariseow, falswesyon, rag hwi a lenk chiow gwedhwesow, hag yn fayntys hwi a wrewgh pysadow hir; rakhenna y kevowgh breus dhe voy tynn.

¹⁵ Go-hwi, skribys ha Fariseow, falswesyon, rag hwi a dremen dres mor ha tir dhe gavoes unn dyskybel nowydh ha pan y'n kevir, hwi a'n gwra mab ifarn dewblek gweth agesowgh hwi agas honan.

¹⁶ ‘Go-hwi, kevarwoedhoryon dhall neb a lever, “Seul a wrello ti re'n tempel, ny amont mann, mes seul a wrello ti re owr an tempel, ev yw kelmys.”

¹⁷ Fellyon dhall, pyneyl ytho yw an moyha, an owr po an tempel a wra dhe'n owr bos sakrys?

¹⁸ Ha, “Seul a wrello ti re'n alter, ny amont mann, mes seul a wrello ti re'n offrynn eus warnedhi, ev yw kelmys.”

¹⁹ Tus dhall, pyneyl ytho yw an moyha, an offrynn po an alter a wra dhe'n offrynn bos sakrys?

²⁰ Rag neb a wra ti re'n alter, a de re'n alter ha re bup-tra eus warnedhi;

²¹ ha neb a de re'n tempel a de re'n tempel ha re neb a drig ynno,

²² ha neb a de re'n nev a de re dron Duw ha re neb yw esedhys warnodho.

²³ ‘Go-hwi, skribys ha Fariseow, falswesyon, rag hwi a wra degevi menta ha fenogel ha kumin ha gasa dhe goll taklow poessa an lagha, ewnder ha tregeredh ha lenduri; an re ma y koedhsa dhywgh aga gul heb dispresya an re na.

²⁴ Kevarwoedhoryon dhall, usi ow kroedra gwibesenn ha lenki kowrvargh!

²⁵ ‘Go-hwi, skribys ha Fariseow, falswesyon, rag hwi a lanha tu a-ves an hanaf ha'n skudell, mes an tu a-bervedh yw leun a arowder ha fowt omrewl.

²⁶ Ty Farise dall, kyns oll glanha tu a-bervedh an hanaf may fo glan an tu a-ves anodho.

²⁷ ‘Go-hwi, skribys ha Fariseow, falswesyon, rag hwi yw haval dhe vedhow yw gwynnhes gans lim, teg aga semlans war-ves, mes war-ji yth yns leun a eskern tus varow hag a bub plosedhes.

²⁸ Yndellma ynwedh hwi yw gwiryon agas semlans war-ves a-wel dhe dus, mes war-ji yth owgh leun a falsuri ha fara dilagha.

²⁹ ‘Go-hwi, skribys ha Fariseow, falswesyon, rag hwi a dhrehav bedhow an brofoesi ha tekhe meyn kov an re wiryon,

³⁰ ha leverel, “A kwrellen ni bewa yn dydhyow agan tasow, ny vien kevrennek gansa ow skoellya goes an brofoesi.”

³¹ Yndella yth owgh hwi dustunioryon er agas pynn agas honan, hwi dhe vos mebyon an re a ladhas an brofoesi.

³² Lenwewgh ytho musur kammweyth agas tasow.

³³ Hwi serf! Hwi askorr nadres! Fatell yllowgh diank dhiworth breus ifarn?

³⁴ Rakhenna, otta, my a dhannvon dhywgh profoesi ha tus fur ha skribys: re anedha hwi a's ladh ha'ga krowsya, ha skorjya re a wrewgh yn agas synagys ha'ga helghya a sita dhe sita;

³⁵ may teffo warnowgh an goes gwiryon oll a veu skoellys war an bys, a-dhiworth goes Abel gwiryon bys yn goes Zakaria mab Baraghia, neb a ledhsowgh ynter an tempel ha'n alter.

³⁶ Yn hwir y lavarav dhywgh, oll an taklow ma a dheu war an henedh ma.

Kynvann war Yerusalem

³⁷ ‘Yerusalem, Yerusalem neb a ladh an brofoesi ha labydha an re yw dannvenys dhis! Peskweyth y yeunis vy kuntell dha fleghes war-barth, kepar dell guntell yar hy yerigow yn-dann hy eskelli, mes hwi ny vynnsowgh.

³⁸ Awotta, agas chi yw gesys dhywgh hwi, ynyal.

³⁹ Rag my a lever dhywgh, na'm gwelowgh alemma rag, bys pan leverowgh, “Benniges yw neb a dheu yn hanow an Arloedh.” ’