Matthew 20 - An Bibel Kernewek 20234 (Kernewek Kemmyn)

An Wonisysi y'n Winlann

¹ ‘Haval yw gwlaskor nev dhe berghennek tir neb eth yn-mes a-varr myttin rag arveth oberwesyon rag y winlann.

² Ha wosa ev dhe vos unnverhes gans an oberwesyon rag unn diner orth an jydh, ev a's dannvonas yn y winlann.

³ Hag ow mos yn-mes a-dro dhe'n tressa eur, ev a welas re erell esa ow sevel diweyth y'n marghasla,

⁴ hag yn-medh ev dhedha, “Ewgh hwi ynwedh y'n winlann ha pypynag oll a vo ewn my a'n re dhywgh hwi.”

⁵ Hag yth ethons. Arta ev eth yn-mes a-dro dhe'n hweghves ha'n nawves eur, hag a wrug y'n keth vaner na.

⁶ Ha pan eth yn-mes a-dro dhe'n unnegves eur, ev a gavas re erell ow sevel diweyth hag ev a leveris dhedha, “Prag y hwrussowgh sevel omma oll an jydh diweyth?”

⁷ Yn-medhons dhodho, “Drefenn na wrug denvyth agan arveth.” Yn-medh ev dhedha, “Ewgh hwi ynwedh y'n winlann.”

⁸ Ha devedhys an gorthugher, arloedh an winlann a leveris dh'y vayli, “Galw an oberwesyon ha ro dhedha aga gober, ow talleth gans an re dhiwettha hag ena mos dhe'n re gynsa.”

⁹ Pan dheuth an re a dhallathsa dhe'n unnegves eur, i a gavas pubonan unn diner.

¹⁰ Ha'n re gynsa pan dheuthons a dybis y kaffens moy, hag i ynwedh a gavas pubonan unn diner.

¹¹ Ha wosa i dh'y gemmeres, i a grodhvolas war an perghennek

¹² ow leverel, “An re dhiwettha ma a wonedhas unn our ha ty a's gwrug kehaval dhyn ni neb re borthas begh an jydh ha'n toemmder.”

¹³ Mes ev a worthybis dhe onan anedha ha leverel, “Koweth, ny wrav kamm dhis. A ny veusta unnverhes genev rag unn diner?

¹⁴ Kemmer an pyth eus dhis, ha ke. My a vynn ri dhe'n diwettha ma avel dhiso jy.

¹⁵ A ny'm beus kummyas dhe wul kepar dell vynnav gans ow fyth ow honan? Po yw dha lagas jy drog drefenn my dhe vos hel?”

¹⁶ Yndellna an re dhiwettha a vydh kynsa, ha'n re gynsa diwettha.’

An Tressa Gweyth Yesu a Dhargan y Vernans ha'y Dhasserghyans

¹⁷ Ha pan esa Yesu ow mos yn-bann dhe Yerusalem, ev a gemmeras an dewdhek a'n eyl tu, ha war an fordh ev a leveris dhedha,

¹⁸ ‘Otta, ni a yn-bann dhe Yerusalem, ha Mab an den a vydh daskorrys dhe'n bennoferysi ha dhe'n skribys, hag i a wra y dhampnya dhe'n mernans,

¹⁹ ha'y dhaskorr dhe'n Jentilys dhe vos skornys ha skorjys ha krowsys, hag y'n tressa dydh ev a wra dasserghi.’

Govenek Jamys ha Yowann

²⁰ Ena y teuth dhodho mamm mebyon Zebede gans hy mebyon ha plegya dhe'n dor a-ragdho, ow hwilas neppyth dhiworto.

²¹ Yn-medh ev dhedhi, ‘Pandr'a vynnydh?’ Yn-medh hi dhodho, ‘Gront mayth esettho ow dew vab evy, an eyl a'th parth dhyghow ha'y gila a'th parth kledh y'th wlaskor.’

²² Yesu a worthybis ha leverel, ‘Ny wodhowgh pandr'a wovynnowgh. A yllowgh hwi eva a'n hanaf a wrav vy eva anodho?’ Yn-medhons dhodho, ‘Gyllyn.’

²³ Yn-medh ev dhedha, ‘Hwi a wra eva a'm hanaf, mes esedha a'm parth dhyghow ha'm parth kledh, nyns eus dhymmo y ri, mes yma dhe seul a vo darbarys dhedha gans ow Thas.’

²⁴ Henna pan glewsons an deg, serrys ens i orth an dhew vroder.

²⁵ Mes Yesu a's gelwis hag yn-medh ev, ‘Hwi a woer bos rewloryon an kenedhlow ow lordya warnedha, ha'n re vras ow kul maystri warnedha.

²⁶ Yndella ny vydh hi yn agas mysk hwi; mes piwpynag a vynno bos meur yn agas mysk, ev bedhes agas servont,

²⁷ ha piwpynag a vynno bos kynsa, ev a vydh agas kethwas,

²⁸ kepar dell na dheuth Mab an den dhe vos servys mes dhe servya, ha dhe ri y vewnans avel daspren rag lies.’

Dew Dhen Dhall

²⁹ Ha pan esens ow mos yn-mes a Yeriko, routh veur a'n siwyas.

³⁰ Hag awotta, dew dhen dhall a'ga esedh ryb an fordh; pan glewsons bos Yesu ow tremena, a armas, ow leverel, ‘Arloedh, kemmer truedh ahanan, ty Vab Davydh.’

³¹ Ha'n routh a's koskas may hwrellens tewel, mes i a armas dhe voy ow leverel, ‘Arloedh, kemmer truedh ahanan, ty Vab Davydh.’

³² Ena Yesu a sevis hag a elwis dhedha ha leverel, ‘Pandr'a vynnowgh orthiv dhe wul dhywgh?’

³³ Yn-medhons dhodho, ‘Arloedh, agan dewlagas dhe vos igerys.’

³⁴ Yesu a gemmeras truedh hag a dochyas aga dewlagas, ha desempis i a dhaskavas aga gweles hag a'n holyas.