Matthew 16 - An Bibel Kernewek 20234 (Kernewek Kemmyn)

Hwilas Tokyn

¹ Ha'n Fariseow ha'n Sadukeow a dheuth dhodho, ha rag y brevi i a wovynnas orto may tiskwettha dhedha tokyn a nev.

² Ev a worthybis dhedha ow leverel, ‘Pan vo an gorthugher devedhys, hwi a lever, “Teg vydh an gewer, rag rudh yw an ebron”;

³ hag y'n myttin, “Hager-awel y fydh hi hedhyw rag an ebron yw rudh ha tewl.” Hwi a woer dissernya enep an ebron, mes a ny yllowgh dissernya toknys an termynyow?

⁴ Henedh drog hag avoutrek a hwila tokyn, mes ny vydh tokyn res dhodho saw tokyn Yona.’ Hag ev a's gasas ha mos yn-kerdh.

Goell an Fariseow ha'n Sadukeow

⁵ Ha pan o an dhyskyblon devedhys dhe'n tu arall, i a ankovsa dri bara.

⁶ Ha Yesu a leveris dhedha, ‘Omwithewgh ha bedhewgh war a woell an Fariseow ha'n Sadukeow.’

⁷ Hag i a resnas yntredha aga honan ha leverel, ‘Hemm yw drefenn na dhresen bara.’

⁸ Ow merkya henna, Yesu a leveris, ‘A hwi a voghes fydh, prag y hwrewgh hwi resna yntredhowgh y vos drefenn na dhresowgh bara?

⁹ A ny gonvedhowgh hwath, na perthi kov a'n pymp torth rag an pymp mil ha pygemmys kanstellas a gemmersowgh yn-bann?

¹⁰ Nag a'n seyth torth rag an peswar mil ha pygemmys kanstellas a gemmersowgh yn-bann?

¹¹ Fatell yw na gonvedhowgh na gewsis vy dhywgh a-dro dhe vara? Mes bedhewgh war a woell an Fariseow ha'n Sadukeow.’

¹² Ena i a gonvedhas na leveris ev dhedha bos war a woell bara, mes a dhyskas an Fariseow ha'n Sadukeow.

Peder a Avow Yesu dhe Vos an Krist

¹³ Pan dheuth Yesu dhe rannvro Sesarea Filippi, ev a wovynnas orth y dhyskyblon ow leverel, ‘Piw y lever tus, Mab an den dhe vos?’

¹⁴ Yn-medhons, ‘Re anedha, Yowann Besydhyer, re erell Elias, hag erell Yeremia, po onan a'n brofoesi.’

¹⁵ Yn-medh ev dhedha, ‘Mes piw y leverowgh hwi ow bos evy?’

¹⁶ Ha Simon Peder a worthybis ha leverel, ‘Ty yw an Krist, Mab an Duw bew.’

¹⁷ Ha Yesu a worthybis ha leverel dhodho, ‘Gwynn dha vys, Simon mab Yona, rag kig ha goes ny dhiskudhas henna dhis, mes ow Thas eus y'n nevow.

¹⁸ Ha my a lever dhis, ty yw Peder ha war an garrek ma y trehavav ow eglos, ha porthow ifarn ny wra hy thryghi.

¹⁹ Ha my a re dhis alhwedhow gwlaskor nev, ha pypynag oll a gelmi war an nor a vydh kelmys y'n nevow, ha pypynag oll a dhigelmi war an nor a vydh digelmys y'n nevow.’

²⁰ Ena ev a erghis dhe'n dhyskyblon na wrellens derivas dhe dhenvyth ev dhe vos an Krist.

Yesu a Dhargan y Vernans ha'y Dhasserghyans

²¹ Alena rag, Yesu a dhallathas diskwedhes dh'y dhyskyblon y fia res dhodho mones dhe Yerusalem ha godhevel lies tra dhiworth an henavogyon ha'n bennoferysi ha'n skribys, ha bos ledhys, ha bos drehevys y'n tressa dydh.

²² Ena Peder a'n kemmeras dhe denewen ha dalleth y geredhi ow leverel, ‘Bynner re bo, Arloedh! Ny hwyrvydh henna dhis!’

²³ Mes ev a dreylyas ha leverel dhe Peder, ‘Ke a-dryv dhymm, Satnas; ty a wra ow sklandra, rag ny brederydh an taklow a Dhuw, mes an taklow a dus.’

²⁴ Ena Yesu a leveris dh'y dhyskyblon, ‘Mar mynn nebonan dos war ow lergh, gwres ev nagha y honan ha kemmeres y grows yn-bann hag ow holya.

²⁵ Rag piwpynag a vynno sawya y vewnans, ev a'n kyll, ha piwpynag a gollo y vewnans a-barth dhymm, ev a'n kyv.

²⁶ Rag py les a vydh dhe dhen mar kwra ev gwaynya oll an bys mes ev a gyll y enev y honan? Po pandr'a wra den y ri yn attal rag y enev?

²⁷ Rag Mab an den a dal dos yn golewder y Das gans y eledh, hag ena attyli a wra ev dhe bubonan herwydh y ober.

²⁸ Yn hwir y lavarav dhywgh, yma re ow sevel omma na wra tastya mernans kyns i dhe weles Mab an den ow tos yn y wlaskor.’