Matthew 14 - An Bibel Kernewek 20234 (Kernewek Kemmyn)

Mernans Yowann Besydhyer

¹ Y'n prys na Herod an tetrargh a glewas derivas a-dro dhe er-da Yesu,

² hag ev a leveris dh'y wesyon, ‘Hemm yw Yowann Besydhyer; drehevys yw a'n re varow ha rakhenna yma oberow barthusek owth oberi ynno ev.’

³ Rag Herod re dhalghennsa Yowann ha'y gelmi ha'y worra yn prison drefenn Herodias, gwreg y vroder Felip;

⁴ rag Yowann a leveris dhodho, ‘Nyns yw lafyl ty dh'y havoes.’

⁵ Ha pan vynnas y ladha, ev a borthas own a'n routh, rag i dh'y synsi avel profoes.

⁶ Mes pan dheuth penn-bloedh Herod, myrgh Herodias a dhonsyas a-dheragdha ha plesya Herod;

⁷ mayth ambosas dre li dhe ri dhedhi pypynag a vynna hi govynn.

⁸ Mes hi, ynniys gans hy mamm, a leveris, ‘Ro dhymm omma penn Yowann Besydhyer war dallyour.’

⁹ Ha grevys o an myghtern, mes drefenn an li, ha'n re esedhys ganso orth an voes, ev a erghis may fe res dhedhi,

¹⁰ hag ev a dhannvonas dhe dhibenna Yowann y'n prison.

¹¹ Ha'y benn a veu degys war dallyour hag a veu res dhe'n vowes ha hi a'n dug dh'y mamm.

¹² Ha'y dhyskyblon a dheuth ha doen y gorf ha'y ynkleudhyas, ha dos dhe ri derivas dhe Yesu.

Maga an Pymp Mil

¹³ Ha Yesu pan y'n klewas a omdennas alena yn gorhel dhe dyller difeyth, yn priva; ha'n routhow a glewas henna hag a'n siwyas a-droes dhiworth an sitys.

¹⁴ Ha pan diras, ev a welas routh veur, hag ev a veu movyes gans truedh ragdha, hag ev a yaghhas aga klevyon.

¹⁵ Ha devedhys an gorthugher, y dhyskyblon a dheuth dhodho ha leverel, ‘An tyller ma yw difeyth ha seulabrys diwedhes yw an eur; gas an routhow dhe vos, mayth ellons dhe'n trevow dhe brena boes ragdha aga honan.’

¹⁶ Mes yn-medh Yesu dhedha, ‘Ny res dhedha mos yn-kerdh; hwi rewgh dhedha dhe dhybri.’

¹⁷ Yn-medhons dhodho, ‘Nyns eus dhyn omma saw pymp torth ha dew bysk.’

¹⁸ Yn-medh ev, ‘Gwrewgh aga dri dhymm omma.’

¹⁹ Ena yth erghis dhe'n routhow esedha war an glaswels ha wosa ev dhe gemmeres an pymp torth ha'n dhew bysk ha mires yn-bann dhe nev, ev a vennigas ha terri, ha ri an torthow dhe'n dhyskyblon, ha'n dhyskyblon a's ros dhe'n routhow.

²⁰ Ha pub huni a dhybris ha lenwys vons, hag i a guntellas an brewyon a veu gesys, dewdhek kanstellas leun.

²¹ Ha'n re a dhybris o neb pymp mil wour, heb rekna benynes ha fleghes.

Kerdhes war an Dowr

²² Ha hware, Yesu a wrug dh'y dhyskyblon mos a-bervedh y'n gorhel ha mos a-ragdho dhe'n tu arall, hag ev ow tannvon an routhow yn-kerdh.

²³ Ha wosa dannvon an routhow dhe-ves, ev eth yn-bann dhe'n menydh rag pysi yn priva. Ha pan o devedhys an gorthugher, yth esa ev ena, y honan.

²⁴ Hag yth esa an gorhel yn kres an mor, tewlys yn harow gans an tonnow, rag an gwyns o er y bynn.

²⁵ Hag yn peswora goel an nos ev a dheuth dhedha ow kerdhes war an mor.

²⁶ Ha'n dhyskyblon, pan y'n gwelsons ow kerdhes war an mor, broweghys vons, hag yn-medhons, ‘Tarosvann yw’, hag i a armas rag own.

²⁷ Mes a-dhesempis Yesu a gewsis dhedha, ‘Gwellhewgh agas cher, my yw; na berthewgh own.’

²⁸ Ha Peder a worthybis dhodho ow leverel, ‘Arloedh, mars yw ty, gwra erghi dhymm a dhos dhiso war an dowrow.’

²⁹ Ev a leveris, ‘Deus!’ Ha Peder a dhiyskynnas a'n gorhel ha kerdhes war an dowrow ha dos troha Yesu.

³⁰ Mes pan welas an gwyns dhe vos krev, own a'n kemmeras, ha pan dhallathas sedhi, ev a armas ow leverel, ‘Arloedh, gwr a ow sawya!’

³¹ Hag a-dhesempis Yesu a ystynnas y leuv ha'y dhalghenna, ha leverel dhodho, ‘A ty a voghes fydh, prag y hwrussys doutya?’

³² Ha pan dhothyens a-bervedh y'n gorhel an gwyns a hedhis.

³³ Ha'n re esa y'n gorhel a'n gordhyas, ow leverel, ‘Yn hwir ty yw Mab Duw.’

Yaghheans an Glevyon yn Gennesaret

³⁴ Ha pan ens i tremenys, i a dheuth dhe'n tir yn Gennesaret.

³⁵ Ha gwer an tyller na, pan y'n aswonnsons, a dhannvonas derivas dhe oll an pow a-dro ha doen dhodho oll an glevyon,

³⁶ ha'y bysi may tocchyens unnsel pilenn y vantell; ha seul a's tochyas a veu sawys.