Matthew 11 - An Bibel Kernewek 20234 (Kernewek Kemmyn)

Kannasow dhiworth Yowann Besydhyer

¹ Ha pan worfennas Yesu y worhemmynnow dh'y dhewdhek dyskybel, ev a dremenas alena dhe dhyski ha dhe bregoth yn aga sitys.

² Ha pan glewas Yowann yn prison a-dro dhe oberow Krist, ev a dhannvonas dew a'y dhyskyblon

³ dhe wovynn orto, ‘Yw ty an den a dal dos po ken onan a wortyn?’

⁴ Ha Yesu a worthybis ha leverel dhedha, ‘Ewgh dhe dherivas dhe Yowann an taklow a glewowgh hag a welowgh;

⁵ dellyon a wel arta hag evredhyon a gerdh; klavorogyon yw glanhes, bodharyon a glew, ha tus varow yw drehevys, ha dhe voghosogyon an aweyl yw pregewthys;

⁶ ha gwynn y vys neb na vo sklandrys ynnov vy.’

⁷ Ha pan ens i yn-kerdh, Yesu a dhallathas kewsel orth an routhow a-dro dhe Yowann, ‘Pandra ethewgh yn-mes dhe'n gwylvos dh'y weles? Korsenn kryghyllys gans an gwyns?

⁸ Mes pandra ethewgh yn-mes dh'y weles? Den gwiskys yn dillas medhel? Otta, tus gwiskys yn dillas medhel, yn chiow myghternedh ymons.

⁹ Mes pandra ethewgh yn-mes dhe weles? Profoes? Ya, yn-medhav dhywgh, ha moy ages profoes.

¹⁰ Hemm yw neb may feu skrifys anodho, “Awotta, my a dhannvon ow hannas a-rag dha fas, neb a dharbar dha fordh a-dheragos.”

¹¹ Yn hwir y lavarav dhywgh: yn mysk an re genys a venynes ny sevis nagonan brassa ages Yowann Besydhyer; byttegyns an lyha yn gwlaskor nev yw brassa agesso ev.

¹² Mes dhiworth dydhyow Yowann Besydhyer bys lemmyn yma gwlaskor nev ow kodhevel garowder, ha tus a nell a's kemmer gans garowder.

¹³ Rag oll an brofoesi ha'n lagha a wrug profoesa bys yn termyn Yowann;

¹⁴ ha mar mynnowgh degemmeres hemma, ev yw Elias neb a dal dos.

¹⁵ Neb a'n jeves diwskovarn rag klewes, ev klewes.

¹⁶ ‘Dhe bana dra y hwrav vy hevelebi an henedh ma? Haval yw dhe fleghes esedhys yn marghasvaow, ow karma an eyl dh'y gila

¹⁷ ha leverel, “Ni a bibas dhywgh ha ny wrussowgh donsya, ni a ganas galargan ha ny wrussowgh oela.”

¹⁸ Rag Yowann a dheuth heb dybri nag eva, hag yn-medhons, “Yma dyowl ganso”.

¹⁹ Mab an den a dheuth ow tybri hag owth eva hag yn-medhons i, “Otta gargasenn ha penn-medhow, koweth tolloryon ha peghadoryon.” Mes furneth yw prevys ewn gans hy oberow.’

Go-i an Sitys na Goedhas yn Edrek

²⁰ Ena ev a dhallathas keredhi an sitys may feu gwrys ynna i an brassa rann a'y oberow galloesek drefenn na goedhsons yn edrek:

²¹ ‘Go-jy Korasin! Go-jy Bethsada! rag mar pe gwrys yn Tyr ha Sidon an oberow galloesek a veu gwrys yn agas mysk, seuladhydh i a goedhsa yn edrek, yn yskar ha lusu.

²² Mes yn-medhav dhywgh, y fydh moy perthadow rag Tyr ha Sidon dydh breus es dell vydh ragowgh hwi.

²³ Ha ty, Kapernaum, a vydhydh ughelhes bys yn nev? Ty a vydh iselhes bys yn ifarn. Rag mar pe gwrys yn Sodom an oberow galloesek a veu gwrys ynnos jy, hi a wrussa durya bys y'n jydh hedhyw.

²⁴ Byttegyns, y lavarav dhywgh, y fydh moy perthadow rag tir Sodom dydh breus es dell vydh ragos jy.’

Dewgh dhymmo Vy ha Powes

²⁵ Y'n prys na Yesu a worthybis ow leverel, ‘My a'th wormel, A Das, Arloedh nev ha nor, drefenn ty dhe gudha an taklow ma dhiworth an re fur ha skiansek ha'ga diskudha dhe fleghesigow;

²⁶ ya, A Das, rag yndella re beu dha vodh.

²⁷ Pup-tra oll a veu delivrys dhe'm charj gans ow Thas, ha denvyth ny aswonn an Mab saw an Tas, na ny aswonn denvyth an Tas saw an Mab ha neb may fynno an Mab y dhiskwedhes dhodho.

²⁸ Dewgh dhymmo vy oll hwi yw skwithys ha beghys poes, ha my a re powes dhywgh.

²⁹ Kemmerewgh ow yew warnowgh ha dyskewgh genev, rag klor yth ov hag uvel ow holonn, ha hwi a gyv powes dh'agas enev.

³⁰ Rag es yw ow yew ha skav yw ow begh.’