Mark 9 - An Bibel Kernewek 20234 (Kernewek Kemmyn)

Treusfigurans Krist

¹ Hag ev a leveris dhedha, ‘Yn hwir y lavarav dhywgh, bos rann an re usi ow sevel omma, na vydhons ow tastya mernans, kyns i dhe weles gwlaskor Duw devedhys gans nerth.’

² Ha wosa hwegh dydh, Yesu a gemmeras ganso Peder, ha Jamys ha Yowann, ha'ga hembronk yn-bann yn menydh ughel, yn priva, aga honan; hag y feu treusfigurys a-ragdha.

³ Ha'y dhillas a dhewynnyas yn pur wynn, yn fordh ma na ylli troghyer vyth war an nor aga hanna.

⁴ Hag yth omdhiskwedhas dhedha Elias gans Moyses, hag yth esens ow keskewsel gans Yesu.

⁵ Ha Peder a worthybis ha leverel dhe Yesu, ‘Mester, da yw ni dhe vos omma; ha gwren ni gul teyr skovva, onan dhiso jy, hag onan dhe Moyses, hag onan dhe Elias.’

⁶ Rag ny wodhva pandra dhe leverel, rag own bras a's teva.

⁷ Hag y teuth kommolenn ha tewlel skeus warnedha; ha lev a dheuth yn-mes a'n gommolenn, ‘Hemm yw ow Mab karadow: klewewgh ev.’

⁸ Ha desempis, wosa i dhe vires a-derdro, ny welsons denvyth namoy, saw unnsel Yesu gansa.

⁹ Ha pan esens ow tos yn-nans a'n menydh, ev a erghis dhedha ma na wrellens derivas dhe dhenvyth an taklow a welsens, bys pan ve Mab an den dasserghys a'n re varow.

¹⁰ Hag i a withas an lavar dhedha aga honan, ow kovynn an eyl orth y gila pandra ve styr dasserghyans a'n re varow.

¹¹ Hag i a wovynnas orto ow leverel, ‘Prag y lever an skribys bos res dhe Elias dos kynsa?’

¹² Mes ev a leveris dhedha, ‘Elias dhe wir a dheu kynsa ha restorya pub tra; fatell ytho yw skrifys a Vab an den ev dhe wodhevel lies tra ha bos dispresys?

¹³ Mes my a lever dhywgh, bos Elias dhe wir devedhys, hag i re wrug dhodho pypynag oll a vynnens, kepar dell yw skrifys anodho.’

Yaghheans Mab gans Spyrys Avlan

¹⁴ Ha pan dheuthons dhe'n dhyskyblon, i a welas routh veur yn aga hyrghynn, ha skribys ow tisputya orta.

¹⁵ Hag a-dhesempis oll an routh, pan y'n gwelsons, o sowdhenys meur, ha poenya a wrussons bys dhodho ha'y salusi.

¹⁶ Hag ev a wovynnas orta, ‘Pandr'a dhisputyowgh hwi orta?’

¹⁷ Ha nebonan a'n routh a worthybis dhodho, ‘Mester, my re dhros dhis ow mab, hag ynno spyrys avlavar,

¹⁸ ha plepynag y talghenn ynno, ev a'n deghes dhe'n dor, hag ev a ewyn, ha deskerni gans y dhyns ha dos ha bos diwedhyn; ha my a leveris dhe'th tyskyblon ma'n towllens mes, ha ny allsons.’

¹⁹ Mes ev a worthybis dhedha ha leverel, ‘A henedh diskryjyk, pes termyn y fydhav vy genowgh? Pes termyn y hwrav agas perthi? Drewgh e dhymm.’

²⁰ Hag i a'n dros dhodho. Ha pan y'n gwelas, desempis an spyrys a ros dhodho shora hag ev a goedhas dhe'n dor, ha rolya a-dro, owth ewyni.

²¹ Hag ev a wovynnas orth y das, ‘Pes termyn yth yw a-ban dheuth hemma dhodho?’ Hag ev a leveris, ‘A-dhia y flogholeth;

²² ha lieskweyth ev re'n tewlis yn tan hag yn dowrow rag y dhistrui; mes ty, mar kyllydh gul neppyth, kemmer truedh ahanan, ha gweres dhyn ni.’

²³ Ha Yesu a leveris dhodho, ‘Mar kyllydh? Pup-tra yw possybyl dhe neb a grysso.’

²⁴ Hag a-dhesempis tas an flogh a grias gans dagrow ha leverel, ‘Arloedh, my a grys: ty gweres ow diskryjyans.’

²⁵ Mes pan welas Yesu routh dhe boenya war-barth, ev a rebukyas an spyrys avlan, ow leverel dhodho, ‘Ty spyrys avlavar ha bodhar, my a ergh dhis, deus yn-mes anodho, ha na wra mos ynno namoy.’

²⁶ Ha'n spyrys a grias, hag a ros dhodho lies shora, hag a dheuth yn-mes; hag y feu avel onan marow, may hwrug lies leverel, ‘Marow ywa.’

²⁷ Mes Yesu a'n kemmeras er an leuv ha'y dhrehevel, hag ev a sevis yn-bann.

²⁸ Ha pan ova devedhys y'n chi, y dhyskyblon a wovynnas orto yn priva ‘Prag na yllsyn ni y dewlel yn-mes?’

²⁹ Hag ev a leveris dhedha, ‘Kammenn na yll an eghenn ma dos yn-mes marnas dre bysi ha penys.’

Yesu a Dhargan Arta y Vernans ha'y Dhasserghyans

³⁰ Hag i eth alena ha tremena dre Alile; hag ev ny vynna denvyth dhe wodhvos henna.

³¹ Rag ev a dhyski y dhyskyblon ha leverel dhedha, ‘Mab an den a vydh daskorrys yntra diwla tus, hag y hwrons y ladha, ha wosa bos ledhys, ev a dhassergh wosa trydydh.’

³² Mes ny gonvedhens an lavar, hag own a's teva a wovynn orto.

Piw Yw an Brassa?

³³ Hag ev a dheuth dhe Kapernaum; ha pan esa y'n chi ev a wovynnas orta, ‘Pyth esewgh orth y dhisputya war an fordh?’

³⁴ Mes i a dewis; rag war an fordh i re bia ow tisputya yntredha piw a vedha moyha.

³⁵ Hag ev a esedhas ha gelwel an dewdhek ha leverel dhedha, ‘Mara mynn neb den bos kynsa, ev a vydh an diwettha oll, ha servont dhe bub den oll.’

³⁶ Hag ev a gemmeras flogh ha'y settya yn aga mysk, ha wosa y gemmeres ev yn y dhiwvregh, ev a leveris dhedha,

³⁷ ‘Piwpynag a dhegemmerro onan a'n fleghes a'n par ma yn ow hanow vy, a'm degemmer vy, ha piwpynag a'm degemmerro, ny'm degemmer vy, saw ev neb a'm dannvonas.’

Neb na Vo er agan Pynn, ragon Ni yth Yw

³⁸ Yowann a leveris dhodho, ‘Mester, ni a welas nebonan ow tewlel mes dywolow y'th hanow jy; ha ni a'n lettyas drefenn na wre agan holya.’

³⁹ Mes Yesu a leveris, ‘Na'n lettyewgh ev; rag nyns eus denvyth a wra marthusyon yn ow hanow vy hag a yll a verr spys kewsel drog ahanav.

⁴⁰ Rag neb na vo er agan pynn ni, ragon ni yth yw.

⁴¹ Rag piwpynag a rollo dhywgh hanafas a dhowr dhe eva y'm hanow vy, drefenn agas bos dhe Grist, yn hwir y lavarav dhywgh, kammenn na gyll y wober.

Temptyans dhe Begh

⁴² ‘Ha piwpynag a wrello dhe onan a'n re vyghan ma trebuchya, neb a grys ynnov vy, gwell via dhodho mar pe kregys men-melin meur a-dro dh'y gonna, ha'y vos tewlys y'n mor.

⁴³ Ha'th leuv mar kwra dhis trebuchya, trogh hi mes; gwell yw dhis entra mans dhe vewnans, ages mos yn ifarn ha genes diw leuv, y'n tan nevra na vydh difeudhys,

⁴⁴ le na verow aga fryv i, ha ny vydh an tan difeudhys.

⁴⁵ Ha'th troes mar kwra dhis trebuchya, trogh ev mes; gwell yw dhis entra dhe vewnans evredhek, ages bos tewlys yn ifarn, ha genes dew droes, y'n tan nevra na vydh difeudhys,

⁴⁶ le na verow aga fryv i, ha'n tan ny vydh difeudhys.

⁴⁷ Ha'th lagas mar kwra dha sklandra, tenn ev mes; gwell yw dhis entra dhe wlaskor Duw unnlagasek, ages bos tewlys yn tan ifarn ha genes dew lagas,

⁴⁸ le na verow aga fryv, ha'n tan ny vydh difeudhys.

⁴⁹ ‘Rag pub den a vydh sellys gans tan, ha pub sakrifis a vydh sellys gans hoelan.

⁵⁰ Hoelan yw da; mes mar teu an hoelan ha bos heb blas, gans pandra y fydh ev sawrys? Bedhes genowgh hoelan ynnowgh agas honan, ha bedhes genowgh kres, an eyl gans y gila.’