Mark 8 - An Bibel Kernewek 20234 (Kernewek Kemmyn)

Maga an Peswar Mil

¹ Y'n dydhyow na, pan esa routh vras arta heb travyth dhe dhybri, ev a elwis y dhyskyblon dhodho, ha leverel dhedha,

² ‘Truedh a'm beus a'n routh, drefenn i dhe vos genev nans yw tri dydh, ha nyns eus gansa travyth dhe dhybri;

³ ha mara's dannvonav dhe-ves heb boes dh'aga chiow, i a glamder ryb an fordh, rag y teuth re anedha a bellder.’

⁴ Ha'y dhyskyblon a'n gorthybis, ‘A-ble haller kavoes bara lowr ragdha omma y'n gwylvos?’

⁵ Ev a wovynnas orta, ‘Py lies torth eus genowgh?’ hag yn-medhons, ‘Seyth.’

⁶ Hag ev a erghis dhe'n routh esedha war an dor; hag ow kemmeres an seyth torth, ev a ros gras, ha'ga therri ha'ga ri dh'y dhyskyblon dhe settya a-ragdha; hag i a's settyas a-rag an routh.

⁷ Hag yth esa gansa nebes puskes byghan; ha wosa aga benniga, ev a erghis i ynwedh dhe vos settys a-ragdha.

⁸ Ytho i a dhybris, ha lenwys vons; hag a'n brewyon o gesys i a gemmeras yn-bann seyth kanstellas.

⁹ Ha'n re a dhybris o a-dro dhe beswar mil. Hag ev a's dannvonas yn-kerdh.

¹⁰ Hware ev eth a-bervedh y'n gorhel gans y dhyskyblon, ha dos dhe rannvro Dalmanutha.

An Fariseow a Hwila Tokyn

¹¹ Ha'n Fariseow a dheuth yn-mes, ha dalleth disputya orto, ow kovynn orto neb tokyn a nev, rag y brevi.

¹² Hag owth hanasa down yn y spyrys, yn-medh ev, ‘Prag y hwila an henedh ma tokyn? Yn hwir y lavarav dhywgh, ny vydh res tokyn dhe'n henedh ma.’

¹³ Hag ev a's gasas, hag ow mos a-bervedh y'n gorhel arta, ev a omdennas dhe'n tu arall.

Goell an Fariseow ha Herod

¹⁴ Hag i a wrussa ankevi dri bara, ha nyns esa gansa y'n gorhel saw unn dorth.

¹⁵ Hag ev a erghis dhedha, ‘Omwithewgh, bedhewgh war a woell an Fariseow hag a woell Herod.’

¹⁶ Hag i a resnas yntredha aga honan, ow leverel, ‘Hemm yw drefenn nag eus genen bara.’

¹⁷ Hag ow kodhvos henna, yn-medh ev dhedha, ‘Prag y hwrewgh hwi resna, rag nag eus genowgh bara? A ny wrewgh hwi gweles hwath, na konvedhes? Yw agas kolonn kaleshes?

¹⁸ Eus dhywgh dewlagas, ha ny welowgh? ha dhywgh diwskovarn, ha ny glewowgh? Hag a ny wrewgh perthi kov?

¹⁹ Pan derris an seyth torth rag an pymp mil, py lies kanstellas leun a vrewyon a gemmersowgh yn-bann?’ Yn-medhons dhodho, ‘Dewdhek.’

²⁰ ‘Ha'n seyth rag an peswar mil, py lies kanstellas leun a vrewyon a gemmersowgh yn-bann?’ Yn-medhons, ‘Seyth.’

²¹ Hag ev a leveris dhedha, ‘Hwath ny wrewgh hwi konvedhes?’

Yaghheans Den Dall yn Bethsaida

²² Ena i a dheuth dhe Bethsaida; hag i a dhros dhodho den dall, ha'y bysi ma'n tocchya.

²³ Hag ev a gemmeras an den dall er an leuv, ha'y hembronk mes a'n dre; ha wosa ev dhe drewa war y dhewlagas, ha gorra y dhiwla warnodho, ev a wovynnas orto, ‘A welydh tra?’

²⁴ Hag ev a viras war-vann ha leverel, ‘My a wel tus, avel gwydh, ow kerdhes.’

²⁵ Ena ev a worras y dhiwla arta war y dhewlagas, hag ev a welas yn kler, ha restorys veu, hag ev a welas pup-tra yn tiblans.

²⁶ Hag ev a'n dannvonas yn-kerdh dh'y ji, ow leverel, ‘Na wra mos hwath a-bervedh y'n dre, ha na wra y dherivas dhe dhenvyth y'n dre.’

Peder a Avow Yesu dhe Vos an Krist

²⁷ Ha Yesu eth yn-mes, ha'y dhyskyblon, yn trevow Sesarea Filippi: ha war an fordh ev a wovynnas orth y dhyskyblon, ow leverel dhedha, ‘Piw y lever tus, my dhe vos?’

²⁸ Hag i a worthybis, ‘Yowann Besydhyer, ha re erell Elias, mes re erell, onan a'n brofoesi.’

²⁹ Hag ev a wovynnas orta, ‘Mes piw y leverowgh hwi, my dhe vos?’ Peder a worthybis ha leverel dhodho, ‘Ty yw an Krist.’

³⁰ Hag ev a erghis dhedha na gowssens anodho orth denvyth.

Yesu a Dhargan y Vernans ha'y Dhasserghyans

³¹ Hag ev a dhallathas aga dyski, bos res dhe Vab an den godhevel lies tra, ha bos neghys gans an henavogyon ha gans an bennoferysi ha'n skribys, ha bos ledhys, ha wosa trydydh dasserghi.

³² Hag ev a gewsi an lavar na apert. Ha Peder a'n kemmeras dhe denewen, ha dalleth y geredhi.

³³ Mes wosa ev dhe dreylya ha mires war y dhyskyblon, ev a geredhis Peder, ow leverel, ‘Ke a-dryv dhymm, Satnas; rag ny brederydh an taklow a Dhuw, mes an taklow a dus.’

³⁴ Ha wosa gelwel an routh dhodho gans y dhyskyblon, ev a leveris dhedha, ‘Neb a vynno holya war ow lergh, gwres ev omdhenagha y honan, ha kemmeres yn-bann y grows, ha'm holya vy.

³⁵ Rag piwpynag a vynno sawya y vewnans, a'n kyll; mes piwpynag a gollo y vewnans a-barth dhymmo vy ha'n aweyl, ev a wra y sawya.

³⁶ Pana les a vydh dhe dhen, mar kwra ev gwaynya oll an bys, ha kelli y enev?

³⁷ Rag pandr'a wra den y ri yn attal rag y enev?

³⁸ Piwpynag, ytho, a'n jeffo meth ahanav vy ha'm lavarow y'n henedh ma, leun a avoutri ha pegh, anodho ev ynwedh Mab an den a'n jevydh meth pan dheffo yn glori y Das gans an eledh sans.’