Mark 7 - An Bibel Kernewek 20234 (Kernewek Kemmyn)

Hengov an Henavogyon

¹ Hag y teuth war-barth dhodho an Fariseow, ha re a'n skribys, devedhys a Yerusalem.

² Hag i a welas re a'y dhyskyblon ow tybri bara gans diwla defolys, henn yw, heb aga golghi

³ – rag an Fariseow hag oll an Yedhewon, marnas i a wolgh aga diwla dour, ny dhebrons, ow kwitha hengov an henavogyon;

⁴ ha pan dheffons a'n varghasla, marnas i a omwolgh, ny dhebrons; ha lies tra arall yma, re dhegemmersons ha gwitha: golghi hanafow ha pychers ha lestri a vrest ha gweliow.

⁵ Ha'n Fariseow ha'n skribys a wovynnas orto, ‘Prag na wra dha dhyskyblon kerdhes war-lergh hengov an henavogyon, mes dybri bara, defolys aga diwla?’

⁶ Mes ev a worthybis dhedha, ‘Yn ta y profoesas Ysay ahanowgh hwi, an falswesyon, dell yw skrifys: “An bobel ma a'm enor gans aga diwweus, mes pell yw aga holonn a-dhiworthiv;

⁷ yn euver i a'm gordh, ow tyski avel dyskas gorhemmynnow tus.”

⁸ Ha hwi, ow korra dhe denewen gorhemmynn Duw, a with hengov tus.’

⁹ Hag ev a leveris dhedha, ‘Yn ta y hwrewgh nagha gorhemmynn Duw, may hyllowgh gwitha agas hengov agas honan!

¹⁰ Rag Moyses a leveris, “Enor dha das ha'th vamm”; ha, “Neb a villikko y das po y vamm, bedhes gorrys dhe'n mernans.”

¹¹ Mes hwi a lever, mar lever den dh'y das po dh'y vamm, “Korban (henn yw, ro sakrys) yw pypynag a gaffes dhiworthiv”,

¹² ena ny'n gesowgh dhe wruthyl tra vytholl rag y das na'y vamm,

¹³ ha hwi a dhile ger Duw der agas hengov re resowgh; ha hwi a wra lies tra a'n par na.’

¹⁴ Ha wosa ev dhe elwel an routh dhodho arta, yn-medh ev dhedha, ‘Goslowewgh orthiv yn kettep penn, ha konvedhewgh.

¹⁵ Nyns eus tra a'n tu a-ves dhe dhen, owth entra dhodho, a yll y dhefola, mes yth yw an taklow a dheu yn-mes anodho hag a wra defola an den.

¹⁶ Seul a'n jeffo diwskovarn rag klewes, ev klewes.’

¹⁷ Ha pan dheuth a-bervedh y'n chi a-dhiworth an routh, y dhyskyblon a wovynnas orto a-dro dhe'n barabolenn.

¹⁸ Hag yn-medh ev dhedha, ‘Owgh hwi yndella heb konvedhes, hwi ynwedh? A ny gonvedhowgh, na yll defola den travyth a enter dhodho a'n tu a-ves,

¹⁹ rag ny enter dh'y golonn, mes dh'y golodhyon, ha mos yn-mes y'n kawghti?’ Yndella ev a dheklaryas oll an boesow dhe vos glan.

²⁰ Hag yn-medh ev, ‘An pyth a dheu yn-mes a'n den, henna a wra defola an den.

²¹ Rag a'n tu a-bervedh, yn-mes a golonn tus, y teu drokprederow: fornikasyon, ladrans, denladh:

²² avoutri, krefni, sherewneth, falsuri, drokhwans direwl, tebel-lagas, blasfemi, goeth, follneth;

²³ oll an drogow ma a dheu a'n tu a-bervedh, hag a dhefol an den.’

Fydh an Venyn a Syrofenikia

²⁴ Hag ev a sevis a'n tyller na ha mos yn oryon Tyr ha Sidon, hag entra dhe ji, ha ny vynnsa bos godhvedhys henna gans denvyth oll; mes ny ylli pesya kudhys;

²⁵ rag dison unn venyn, ma's teva hy myrgh vyghan spyrys avlan, a glewas son anodho, hag a dheuth ha koedha orth y dreys.

²⁶ An venyn o Grek, Syrofenikek hy henedhel; ha hi a'n pysis may hwrella tewlel yn-mes an jowl a'y myrgh.

²⁷ Mes ev a leveris dhedhi, ‘Gas an fleghes dhe vos lenwys kynsa, rag nyns yw da kemmeres bara an fleghes, ha'y dewlel dhe'n keun.’

²⁸ Ha hi a worthybis ha leverel dhodho, ‘Ya, Arloedh; hwath an keun yn-dann an voes a dheber brewyon an fleghes.’

²⁹ Hag ev a leveris dhedhi, ‘Rag an lavar ma ke war dha hyns; gallas an jowl yn-mes a'th vyrgh.’

³⁰ Ha hi pan o devedhys dh'y chi, a gavas hy myrgh a'y growedh war an gweli, ha'n jowl gyllys mes.

Yaghheans Den Bodhar hag Avlavar

³¹ Ha mos a wrug arta dhiworth oryon Tyr, ha dos dre Sidon dhe vor Galile, bys yn oryon Dekapolis.

³² Hag i a dhros dhodho onan o bodhar hag avlavar; hag i a'n pysis a worra y leuv warnodho.

³³ Hag ev a'n kemmeras a-denewen yn-mes a'n routh, hag a worras y vysies yn y dhiwskovarn, hag a drewas, ha tochya y daves;

³⁴ hag ow mires war-vann troha nev, ev a hanasas, ha leverel dhodho, ‘Effatha’, henn yw, ‘Bydh igerys.’

³⁵ Ha dihwans y dhiwskovarn a veu igerys, ha kolm y daves a veu digelmys, hag ev a gewsis yn ewn.

³⁶ Hag ev a erghis dhedha na lavarrens dhe dhenvyth; mes seul voy yth esa owth erghi dhedha dhe voy hwath i a'n dylli.

³⁷ Hag yth o dhedha marth dres eghenn, hag yn-medhons, ‘Ev re wrug pup-tra yn fas; ev a wra dhe'n re vodhar klewes, ha dhe'n re avlavar kewsel.’