Mark 16 - An Bibel Kernewek 20234 (Kernewek Kemmyn)

Dasserghyans Yesu

¹ Ha'n sabot pan o tremenys, Maria Magdalena, ha Maria mamm Jamys, ha Salome a brenas spisys mayth ellens dh'y ura.

² Ha myttin pur a-varr, y'n kynsa dydh a'n seythun, y teuthons dhe'n bedh, ha'n howl ow trehevel.

³ Hag i a leveri an eyl dh'y ben, ‘Piw a yll rolya an men ragon dhe-ves a dharas an bedh?’

⁴ Ha pan virsons yn-bann, i a welas an men dhe vos rolys dhe-ves; rag yth o pur vras.

⁵ Ha pan dheuthons a-berth y'n bedh i a welas den yowynk esedhys a'n barth dhyghow gwiskys yn pows wynn; hag own a's teva.

⁶ Mes ev a leveris dhedha, ‘Na berthewgh own; hwi a hwila Yesu a Nazareth neb a veu krowsys; drehevys yw, nyns usi omma; awotta'n tyller ma'n gorrsons.

⁷ Mes ewgh yn-rag, leverewgh dh'y dhyskyblon ha dhe Peder, “Yth a ev a-ragowgh dhe Alile; ena hwi a'n gwelvydh, dell leveris ev dhywgh.” ’

⁸ Hag i eth yn-mes hag a fias dhiworth an bedh; rag yth esons ow krena, ha marth a's teva; ha ny lavarsons tra dhe dhenvyth, rag i a's teva own.

An Omdhiskwedhyans dhe Varia Magdalena

⁹ Ha pan o ev dasserghys a-varr y'n kynsa dydh a'n seythun, yth omdhiskwedhas yn kynsa dhe Varia Magdalena, may hwrussa tewlel seyth dyowl yn-mes anedhi.

¹⁰ Hi eth dhe dherivas dhe'n re neb re bia ganso ev, hag i ow kyni hag owth oela.

¹¹ Hag i pan glewsons y vos yn few, ha dhe vos gwelys gensi, ny wrussons krysi.

¹² Wosa henna omdhiskwedhes a wrug yn ken furv dhe dhew anedha, pan esens ow kerdhes, hag i ow mos dhe'n pow;

¹³ hag yth ethons ha derivas dhe'n re erell; na byth moy i ny gryssons dhedha.

Gorhemmynn dhe'n Dhyskyblon

¹⁴ Wosa henna ev a omdhiskwedhas dhe'n unnek hag i esedhys dhe dhybri, hag a's keredhis a'ga diskryjyans ha kaletter aga holonn, drefenn na wrussons krysi dhe'n re a'n gwelsa, hag ev dasserghys.

¹⁵ Hag ev a leveris dhedha, ‘Ewgh hwi yn oll an bys, ha pregewthewgh an aweyl dhe bub kreatur.

¹⁶ Piwpynag a grysso hag a vo besydhys a vydh selwys, mes neb na vynno krysi a vydh dampnys.

¹⁷ Ha'n toknys ma a wra holya an re a grys: yn ow hanow vy i a dewl yn-mes dywolow; dre davosow nowydh y hwrons kewsel;

¹⁸ hag i a gemmer serf yn-bann yn aga diwla, ha mar evons gwenon marwel, ny wra henna aga fystiga; i a worr diwla war an glevyon hag y fydhons yagh.’

Assenshyon Yesu dhe Nev

¹⁹ Hag ytho an Arloedh Yesu, wosa ev dhe gewsel orta, a veu degemmerys yn-bann dhe nev, hag a esedhas a'n barth dhyghow dhe Dhuw.

²⁰ Hag yth ethons yn-mes ha pregoth yn pub le, ha'n Arloedh ow kesoberi gansa hag ow fastya an ger der an toknys a wre holya. Amen.