Mark 15 - An Bibel Kernewek 20234 (Kernewek Kemmyn)

Yesu a-rag Pilat

¹ Ha desempis y'n myttin an bennoferysi a wrug omgusulyans gans an henavogyon ha'n skribys hag oll an Sanhedrin; hag i a golmas Yesu, ha'y dhoen yn-kerdh ha'y dhaskorr dhe Pilat.

² Ha Pilat a wovynnas orto, ‘Ty yw Myghtern an Yedhewon?’ Hag ev a worthybis ha leverel dhodho, ‘Ty a'n lever.’

³ Ha'n bennoferysi a'n kuhudhas a lies tra.

⁴ Ha Pilat a wovynnas orto arta, ow leverel, ‘A ny worthybydh travyth? Mir py lies tra a guhudhons er dha bynn.’

⁵ Mes Yesu hwath ny worthybis travyth, mayth o marth dhe Pilat.

Yesu Dampnys dhe'n Mernans

⁶ Lemmyn y'n goel ev a wre delivra dhedha unn prisner, piwpynag a vynnens i.

⁷ Hag yth esa onan, Barabbas henwys, o prisonys gans an omsevysi neb re wrussa denladh y'n rebellyans.

⁸ Ha'n routh ow karma a dhallathas govynn orto gul kepar dell wre dhedha a'y us.

⁹ Mes Pilat a's gorthybis ow leverel, ‘A vynnowgh orthiv delivra dhywgh myghtern an Yedhewon?’

¹⁰ Rag ev a wodhya y hwrug an bennoferysi y ri dhodho der atti.

¹¹ Mes an bennoferysi a vovyas an routh, may hwrella ev yn le henna delivra dhedha Barabbas.

¹² Ha Pilat a worthybis ha leverel dhedha arta, ‘Pandr'a vynnowgh, ytho, my dhe wul dhe neb a henwowgh myghtern an Yedhewon?’

¹³ Hag arta i a armas, ‘Krowsy e!’

¹⁴ Ena Pilat a leveris dhedha, ‘Ytho, pana dhrog re wrug ev?’ Mes i a armas hwath dhe voy, ‘Krowsy e!’

¹⁵ Ytho Pilat, ha hwans dhodho a blesya an routh, a dhelivras Barabbas dhedha; hag a ros Yesu, wosa y skorjya, dhe vos krowsys.

An Soudoryon a Skorn Yesu

¹⁶ Ha'n soudoryon a'n hembronkas yn-kerdh a-bervedh y'n palys, henn yw an pretorium, hag i a elwis war-barth oll an bagas a soudoryon.

¹⁷ Hag i a'n gwiskas gans purpur hag a blethas kurun a spern, hag a's gorras warnodho.

¹⁸ Hag i a dhallathas y salusi, ‘Hayl, Myghtern an Yedhewon!’

¹⁹ Hag yth esens orth y weskel war an penn gans korsenn ha trewa warnodho; hag ow mos dhe benn-dewlin yth esens orth y wordhya.

²⁰ Ha wosa i dh'y skornya, i a dhi'skas an purpur dhiworto ha'y wiska yn y dhillas y honan. Hag i a'n dug yn-mes rag y growsya.

Krowsyans Yesu

²¹ Hag i a gonstrynas unn Simon a Kyrene esa ow tremena, ow tos dhiworth an pow, tas Aleksander ha Rufus, dhe dhoen y grows.

²² Hag i a'n dros bys y'n tyller Golgotha, dhe styrya yw, Tyller Krogen.

²³ Hag i a ros dhodho dhe eva gwin kemmyskys gans myrr; mes ny'n kemmeras.

²⁴ Hag i a'n krowsyas, ha ranna y dhillas, ow tewlel prenn warnedha, pandr'a gemmerra pubonan.

²⁵ Hag yth o an tressa eur, hag i a'n krowsyas.

²⁶ Ha pennskrifa y guhudhans o skrifys a-ughto, ‘Myghtern an Yedhewon.’

²⁷ Ha ganso i a growsyas dew lader, an eyl a'n barth dhyghow dhodho, ha'y gila a'n barth kledh.

²⁸ Ha'n skryptor a veu kollenwys a lever, ‘Hag ev a veu reknys yn mysk drogoberoryon.’

²⁹ Ha'n dremenysi a'n kablas, ow shakya aga fenn, hag ow leverel, ‘Aha! ty, neb a dhistru an tempel hag a'n drehav kyns penn trydydh,

³⁰ omsaw dha honan ha diyskynn dhiworth an grows!’

³¹ Kekeffrys an bennoferysi ynwedh, gans an skribys, a'n skornyas yntredha aga honan ha leverel, ‘Ev a sawyas re erell; ny yll y omsawya y honan;

³² Krist Myghtern Ysrael, diyskynnes lemmyn a'n grows, may hyllyn gweles ha krysi.’ Hag yth esa an re a veu krowsys ganso orth y dhespitya.

Mernans Yesu

³³ Ha pan dheuth an hweghves eur, yth esa tewolgow dres oll an tir bys y'n nawves eur.

³⁴ Hag y'n nawves eur Yesu a grias gans lev ughel, ‘Eloi, Eloi, lema sabaghthani?’, dhe styrya yw, ‘Ow Duw, ow Duw, prag y'm forsaksys?’

³⁵ Ha re ow sevel ena pan y'n klewsons a leveris, ‘Otta, yma ow kelwel Elias.’

³⁶ Ha nebonan a boenyas dhe lenwel spong a aysel, ha'y worra war gorsenn, ha'y ri dhodho dhe eva, ow leverel, ‘Gesewgh ni gweles mar teu Elias dh'y dhoen yn-nans!’

³⁷ Ha Yesu a grias gans lev ughel hag anella y spyrys yn-mes.

³⁸ Ha vayl an tempel a veu skwardys yntra diw rann a'n penn dhe'n goeles.

³⁹ Ha pan welas an penn-kangour, esa ow sevel a-dal dhodho, ev dhe gria yndella hag anella y spyrys yn-mes, ev a leveris, ‘Yn gwiryonedh, an den ma o Mab Duw.’

⁴⁰ Yth esa ynwedh benynes ow mires a-bell, hag yntredha Maria Magdalena, ha Maria mamm Jamys an byghan hag a Yoses, ha Salome,

⁴¹ neb a wre y holya ha'y servya pan esa yn Galile, ha lies benyn arall neb a dheuth yn-bann dhe Yerusalem ganso.

Ynkleudhyans Yesu

⁴² Ha gorthugher lemmyn devedhys, rag y vos an darbar, henn yw, an jydh kyns an sabot,

⁴³ y teuth Yosep a Arimathea, konseler bryntin, neb ynwedh esa ow kortos gwlaskor Duw, hag ev eth hardh a-ji bys yn Pilat hag a wovynnas korf Yesu.

⁴⁴ Ha marth o gans Pilat ev dhe vos marow seulabrys, ha wosa gelwel an penn-kangour dhodho, ev a wovynnas orto mars o pol'ta marow,

⁴⁵ ha pan y'n klewas dhiworth an penn-kangour, ev a ros an korf dhe Yosep.

⁴⁶ Hag ev a brenas lien hag a'n dug yn-nans, ha'y vaylya y'n lien hag a'n gorras ev yn bedh o treghys yn-mes a'n garrek; hag a rolyas men orth daras an bedh.

⁴⁷ Hag yth esa Maria Magdalena ha Maria mamm Yoses ow mires, ple feuva gorrys.