Mark 1 - An Bibel Kernewek 20234 (Kernewek Kemmyn)

Pregoth Yowann Besydhyer

¹ Dalleth aweyl Yesu Krist, Mab Duw.

² Kepar dell yw skrifys yn Ysay an profoes, ‘Awotta, my a dhannvon ow hannas a-rag dha fas, neb a dharbar dha fordh;

³ lev onan ow kria y'n gwylvos: Pareusewgh fordh an Arloedh, gwrewgh kompes y hynsyow ev.’

⁴ Yth esa Yowann ow pesydhya y'n gwylvos, hag ow pregoth besydh a edrek yn dehwelyans peghosow.

⁵ Hag yth e yn-mes bys dhodho oll an pow a Yudi, hag oll tus Yerusalem, hag yth esens besydhys ganso y'n avon Yordan, ow yes aga feghosow.

⁶ Ha Yowann o gwiskys yn blew kowrvargh, ha gans grogys a groghen a-dro dh'y dhiwglun; hag ev a wre dybri lokustes ha mel gwyls.

⁷ Hag yth esa ow pregoth, ow leverel, ‘Y teu war ow lergh onan yw moy galloesek agesov vy, ha ma nag o'ma gwiw, owth omblegya, dhe dhigelmi kroen y eskisyow.

⁸ My re'gas besydhyas gans dowr; mes ev a wra agas besydhya gans an Spyrys Sans.’

Besydh Yesu

⁹ Hag y hwarva y'n dydhyow na, y teuth Yesu a Nazareth yn Galile, hag ev a veu besydhys y'n Yordan gans Yowann.

¹⁰ Ha kettell dheuth yn-bann yn-mes a'n dowr, ev a welas an nevow terrys igor, ha'n Spyrys kepar ha kolomm ow tiyskynna warnodho;

¹¹ ha lev a dheuth a'n nevow, ‘Ty yw ow Mab karadow; ynnos yma ow delit.’

Temptyans Yesu

¹² Hag a-dhesempis an Spyrys a'n helghyas yn-mes bys y'n gwylvos.

¹³ Hag yth esa y'n gwylvos dew-ugens dydh temptys gans Satnas, hag yth esa gans an bestes gwyls, ha'n eledh a venystra dhodho.

Yesu ow Pregoth yn Galile

¹⁴ Ha wosa Yowann dhe vos dalghennys, Yesu a dheuth dhe Alile, ow pregoth aweyl Duw,

¹⁵ hag ow leverel, ‘Kollenwys yw an termyn, ha gwlaskor Duw re dheuth nes; koedhewgh yn edrek, ha krysewgh y'n aweyl.’

Galow an Kynsa Dyskyblon

¹⁶ Hag ow kerdhes ryb mor Galile, ev a welas Simon hag Androw broder Simon ow tewlel roes y'n mor; rag pyskadoryon ens i.

¹⁷ Hag yn-medh Yesu dhedha, ‘Dewgh war ow lergh, ha my a wra dhywgh bos pyskadoryon a dus.’

¹⁸ Ha distowgh i a asas aga roesow, hag a'n holyas ev.

¹⁹ Hag ow mos pols alena, ev a welas Jamys mab Zebede ha Yowann y vroder, hag i keffrys y'n gorhel owth ewnhe an roesow,

²⁰ ha desempis ev a's gelwis; hag i a asas aga thas Zebede y'n gorhel gans an wesyon wobrys, ha mos a wrussons war y lergh.

An Den hag Ynno Spyrys Avlan

²¹ Hag yth ethons yn Kapernaum; ha distowgh y'n sabot ev eth a-bervedh y'n synaga, ha dyski.

²² Hag yth esa marth dhedha a'y dhyskas; rag ev a wre aga dyski avel den ow toen awtorita ha ny'n gwre avel an skribys.

²³ Ha distowgh yth esa yn aga synaga den hag ynno spyrys avlan; hag ev a armas,

²⁴ ‘Pandr'a vynnydh tejy genen ni, Yesu a Nazareth? Osta devedhys rag agan diswul ni? My a'th aswonn piw os, an Sans a Dhuw.’

²⁵ Ha Yesu a'n koskas, ow leverel, ‘Taw, ha deus yn-mes anodho.’

²⁶ Ha wosa an spyrys avlan dh'y gryghylli gans nerth ha garma gans lev ughel, ev a dheuth yn-mes anodho.

²⁷ Hag yth ens i sowdhenys glan yn kettep penn, may hwrussons govynn an eyl orth y gila ow leverel, ‘Pandr'yw hemma? Dyskas nowydh gans awtorita! Ev a worhemmynn ynwedh dhe'n spyrysyon avlan, ha gostydh yns dhodho.’

²⁸ Ha desempis yth eth son anodho dres oll an pow a-dro dhe Alile.

Yaghheans Lies Den

²⁹ Ha hware, wosa i dhe dhos yn-mes a'n synaga, yth ethons a-bervedh yn chi Simon hag Androw, gans Jamys ha Yowann.

³⁰ Mes hweger Simon a wrowedhi grevys gans fevyr, ha hware i a gewsis orto anedhi.

³¹ Hag ev a dheuth ha'y hemmeres er an leuv, ha'y drehevel; ha'n fevyr a's gasas, ha hi a venystra dhedha.

³² Ha devedhys an gorthugher, wosa an howl dhe sedhi, i a dhros bys dhodho oll an glevyon, ha'n re dalghennys gans dywolow;

³³ hag oll an sita o kuntellys orth an daras.

³⁴ Hag ev a yaghhas lies o klav a glevesow a bub eghenn, hag a dewlis mes lies dyowl; ha ny asas an dhywolow dhe gewsel, drefenn i dh'y aswonn ev.

Kerdh Pregoth

³⁵ Ha myttin a-varr, hag ev ow sevel fest pell kyns hy bos dydh, ev eth yn-mes hag omdenna bys yn tyller difeyth, hag ena yth esa ow pysi.

³⁶ Ha Simon ha'n re esa ganso a'n holyas,

³⁷ ha wosa i dh'y gavoes, yn-medhons dhodho, ‘Yma peub orth dha hwilas.’

³⁸ Hag ev a leveris dhedha, ‘Gwren ni mos yn ken le, y'n trevow nessa, may hylliv pregoth ena ynwedh; rag dhe henna yth o'ma devedhys mes.’

³⁹ Hag ev a dheuth ow pregoth yn aga synagys dres oll Galile, ow tewlel yn-mes an dhywolow.

Glanhe Klavorek

⁴⁰ Hag y teuth unn klavorek dhodho, orth y bysi war benn-dewlin, ha leverel dhodho, ‘Mar mynnydh, ty a yll ow glanhe.’

⁴¹ Hag ev, ow kemmeres truedh, a ystynnas y leuv, ha'y dochya, ha leverel dhodho, ‘Mynnav; bydh glanhes.’

⁴² Ha hware an lovryjyon eth yn-mes anodho, hag y feu glanhes.

⁴³ Hag ev a'n gwarnyas yn straght, ha'y dhannvon dhe-ves dison

⁴⁴ ha leverel dhodho, ‘Gwayt na leverri travyth orth denvyth, mes ke war dha hyns, omdhiskwa dha honan dhe'n oferyas, hag offrynn rag dha lanheans an taklow a worhemmynnis Moyses, yn dustuni dhedha.’

⁴⁵ Mes ev eth yn-mes ha dalleth kewsel anodho yn feur ha dyllo an dra a-les, ma na ylli ev entra dhe'n sita namoy a-wel tus, mes yth esa a-ves yn tylleryow difeyth; hag i a dheuth dhodho a bub tu.