Lyther Yud 1 - An Bibel Kernewek 20234 (Kernewek Kemmyn)

Salusyans

¹ Yud, gwas Yesu Krist, broder Jamys, Dhe'n re yw gelwys, karadow yn Duw an Tas ha gwithys rag Yesu Krist:

² Tregeredh re bo palshes dhywgh, ha kres ha kerensa.

Breus erbynn Fals Dhyskadoryon

³ Hwi garadowyon, ha genev mall dres eghenn a skrifa dhywgh a-dro dh'agan selwyans kemmyn, res o dhymm skrifa dhywgh ow pysi may striffyewgh a-barth an fydh re beu unnweyth kemmynnys dhe'n syns.

⁴ Rag entra yn unn slynkya yn-dann gel re wrug sertan re a veu seuladhydh apoyntys dhe'n dampnasyon ma, tus dhidhuw a dreyl gras agan Duw bys yn drokhwans ha nagha agan unn mester hag Arloedh, Yesu Krist.

⁵ My a vynn dri dh'agas kov, hwi neb a woer pup-tra seulabrys, y hwrug an Arloedh, a dhelivras y bobel yn-mes a bow Ejyp, distrui an dhiskryjygyon a-wosa;

⁶ ha'n eledh na withas aga offis aga honan mes a asas aga thrigva aga honan re beu gwithys ganso yn chaynys heb diwedh yn tewlder bys yn breus an jydh meur;

⁷ kepar ha Sodom ha Gomorra ha'n sitys yn aga hyrghynn, a veu omres dhe'n keth dijastita hag ow mos war-lergh kig astranj, settys rag bysna yn aga hessydhyans gans tan heb diwedh.

⁸ Byttegyns yndellma an re ma a wra defola an korf yn aga hunrosow, ha nagha awtorita, ha sklandra an re wynn.

⁹ Pan argyas an arghel Mighal yn-dann strivya gans an jowl a-dro dhe gorf Moyses, ny vedhas ev ri breus a vlasfemi er y bynn, mes leverel, ‘Re'th kerettho an Arloedh’,

¹⁰ mes an re ma a wra anvri dhe bypynag na gonvedhons; ha'n taklow a gonvedhons dre gnas kepar dell wra bestes heb reson, distruys vydhons i gansa.

¹¹ Go-i rag kerdhes war fordh Kayn hag omri aga honan rag gober dhe gammweyth Balaam, hag yn rebellyans Koragh mos dhe goll.

¹² An re ma yw kudhys, kepar dell vens i morgribow, yn agas prysyow-boes a gerensa, hag a wra kevewya heb own kepar ha bugeledh owth omvaga: kommolennow heb dowr, degys hwymm-hwamm gans an awelyow, gwydhennow yn kynyav helergh heb frut vyth, diwweyth marow, diwreydhys;

¹³ mordonnow gwyls owth ewyni gans aga bismer aga honan, sterennow ow kwandra may feu dhedha gwithys an tewlder bys vykken.

¹⁴ A-dro dhe'n re ma y'n seythves henedh a Adam y profoesas Enok pan leveris, ‘Otta, an Arloedh a dheuth gans y dheg-vilyow a syns,

¹⁵ rag kollenwel breus war bub den oll ha keredhi pub enev a-dro dh'aga gwriansow a ansansoleth a wrussons hag a oll an geryow kales a wrug peghadoryon dhidhuw kewsel er y bynn.’

¹⁶ An re ma yw grolyogyon grodhek, omres dh'aga flesours aga honan, ha'ga ganow yw leun a vostyans, ow favera tus rag gwayn.

Gwarnyans ha Keskyans

¹⁷ Hwi garadowyon, perthewgh kov a dharganow abesteli agan Arloedh Yesu Krist,

¹⁸ pan lavarsons i dhywgh, ‘Y'n termyn diwettha y fydh gesyoryon ow kerdhes war-lergh aga hwansow ansans aga honan.’

¹⁹ An re ma yth yw, neb a wra folsyow, tus a'n bys ma heb bos dhedha an Spyrys.

²⁰ Mes hwi garadowyon, owth omdhrehevel agas honan der agas fydh sansella, ow pysi y'n Spyrys Sans,

²¹ omwithewgh yn kerensa Duw, ow kwaytya tregeredh agan Arloedh Yesu Krist bys yn bewnans heb diwedh.

²² Bedhewgh truedhek dhe'n re a dhout;

²³ sawyewgh re erell orth aga hibya yn-mes a'n tan; kemmerewgh truedh a re erell yn own, ha kesewgh ynwedh an dhillasenn hy honan re beu mostys gans an kig.

Bennath

²⁴ Lemmyn dhe neb a yll agas gwitha rag koedha ha'gas gorra heb namm a-rag y wolewder gans heudhder,

²⁵ dhe'n unn Duw agan Selwyas, dre Yesu Krist agan Arloedh, dhodho re bo gordhyans, meuredh, mestrynses, ha galloes kyns pub oes ha lemmyn ha bys vynnari. Amen.