Luk 9 - An Bibel Kernewek 20234 (Kernewek Kemmyn)

Dannvon an Dewdhek

¹ Ena ev a elwis an dewdhek war-barth, hag a ros dhedha galloes hag awtorita war oll an dhywolow, ha dhe yaghhe klevesow,

² hag ev a's dannvonas yn-mes dhe bregoth gwlaskor Duw, ha dhe yaghhe an glevyon,

³ hag ev a leveris dhedha, ‘Na gemmerewgh travyth rag an fordh, na lorgh, na skryp, na bara, na mona na diw bows dhe bubonan.

⁴ Ha py chi pynag a dhyffowgh ynno, trigewgh ena bys pan omdennewgh alena.

⁵ Ha seul na wra agas wolkomma, pan yllowgh yn-mes a'n sita na, shakyewgh an doust a-dhann agas treys yn dustuni er aga fynn.’

⁶ Ytho i eth dhe-ves ha tremena der an trevow, ow pregoth an aweyl hag ow yaghhe yn pub tyller.

Fienasow Herod

⁷ Lemmyn Herod an tetrargh a glewas a bup-tra a hwarva, ha penndegys o, rag re a leveri Yowann re bia drehevys a'n re varow,

⁸ ha re erell, Elias dhe omdhiskwedhes, ha re erell, onan a'n brofoesi a-henys dhe dhasserghi.

⁹ Hag yn-medh Herod, ‘Yowann a dhibennis; mes piw yw hemma, neb a glewav taklow a'n par ma yn y gever?’ Hag ev a hwila y weles.

Maga an Pymp Mil

¹⁰ Ha'n abesteli, wosa i dhe dhehweles, a dherivas dhodho pup-tra re wrussens. Hag ev a's kemmeras hag omdenna yn priva dhe sita henwys Bethsaida.

¹¹ Mes an routhow, pan glewsons, a'n siwyas; hag ev orth aga wolkomma a gewsis orta a wlaskor Duw, hag ev a yaghhas seul a'n jeva edhomm a yaghheans.

¹² An jydh a dhallathas dos dhe benn, ha'n dewdhek a dheuth ha leverel dhodho, ‘Dannvon an routh dhe-ves, rag mayth ellens y'n trevow ha'n pow a-dro ha kavoes ostyans ha neppyth dhe dhybri, rag yth eson ni omma yn tyller difeyth.’

¹³ Mes ev a leveris dhedha, ‘Rewgh hwi dhedha dhe dhybri.’ Yn-medhons i, ‘Nyns eus dhyn moy es pymp torth ha dew bysk, marnas ni a dhe brena boes rag oll an dus ma.’

¹⁴ Rag yth ens i neb pymp mil wour. Yn-medh ev dh'y dhyskyblon, ‘Gwrewgh dhedha esedha yn bagasow a neb hanter kans pubonan.’

¹⁵ Hag yndella y hwrussons, ha gul pubonan dhe esedha.

¹⁶ Hag ow kemmeres an pymp torth ha'n dhew bysk, ev a viras yn-bann dhe nev ha'ga benniga, ha'ga therri, hag ev a's ros dh'y dhyskyblon rag aga settya a-rag an routh.

¹⁷ Ha pubonan a dhybris hag a veu lenwys; hag a'n brewyon gesys dhedha, dewdhek kanstellas a veu kuntellys.

Peder a Avow Yesu dhe Vos an Krist

¹⁸ Hag y hwarva, pan esa ev ow pysi y honan, y teuth y dhyskyblon war-barth ganso, hag ev a wovynni orta, ow leverel, ‘Piw y lever an routhow ow bos evy?’

¹⁹ I a worthybis ow leverel, ‘Yowann Besydhyer, re erell Elias, mes re erell, “Onan a'n brofoesi a-henys re dhassorghas.” ’

²⁰ Ev a leveris dhedha, ‘Mes hwi, piw y leverowgh my dhe vos?’ Peder a worthybis ha leverel, ‘An Krist a Dhuw.’

Yesu a Dhargan y Vernans ha'y Dhasserghyans

²¹ Mes ev a's erghis straght na lavarrons hemma dhe dhenvyth,

²² ow leverel bos res dhe Mab an den godhav lies tra ha bos neghys gans an henavogyon ha'n bennoferysi ha'n skribys ha bos ledhys ha bos drehevys y'n tressa dydh.

²³ Hag yn-medh ev dhedha i oll, ‘Mar mynn nebonan dos war ow lergh, gwres omdhenagha, ha kemmeres yn-bann y grows pub dydh, ha'm holya vy.

²⁴ Rag piwpynag a vynno gwitha y vewnans a'n kyll; mes piwpynag a gollo y vewnans a-barth dhymmo vy, ev a'n gwith.

²⁵ Rag pana les a vydh dhe dhen, pan wrello gwaynya oll an bys, hag ev y honan ow pos diswrys po kellys?

²⁶ Piwpynag ytho a'n jeffo meth ahanav vy ha'm lavarow, Mab an den a'n jevydh meth anodho pan dheffo yn y wolewder ev ha golewder an Tas ha'n eledh sans.

²⁷ Mes yn hwir y lavarav dhywgh, yma rann a'n re ow sevel omma na dastyons ankow erna wellons gwlaskor Duw.’

Treusfigurans Krist

²⁸ Hag y hwarva a-dro dhe eth dydh wosa an geryow ma, ev a gemmeras Peder ha Yowann ha Jamys ganso ha mos yn-bann y'n menydh rag pysi.

²⁹ Hag ev ow pysi, semlans y fas a janjyas ha'y dhillas a veu kann, ow terlentri.

³⁰ Hag otta, dew wour a gewsi ganso; yth ens i Moyses hag Elias,

³¹ neb a omdhiskwedhas yn golewder, ha kewsel a'y dhibarth a vedha orth hy hollenwel yn Yerusalem.

³² Mes Peder ha'n re ganso o poes gans kosk; ha pan ens i difun i a welas y wolewder ha'n dhew wour ow sevel ganso.

³³ Ha pan esens ow tiberth dhiworto Peder a leveris dhe Yesu, ‘Mester, da yw ni dhe vos omma; gwren drehevel teyr skovva, onan ragos jy hag onan rag Moyses hag onan rag Elias’, heb godhvos pandra esa ow leverel.

³⁴ Hag ev ow leverel hemma kommolenn a dheuth ha tewlel skeus warnedha; hag i a borthas own pan ethons y'n gommolenn.

³⁵ Ha lev a dheuth yn-mes a'n gommolenn ow leverel, ‘Hemm yw ow Mab dewisys, klewewgh ev.’

³⁶ Ha wosa an lev dhe gewsel, Yesu a veu kevys y honan. Ha tewel a wrussons ha ny dherivsons orth denvyth y'n dydhyow na an taklow a welsens.

Yaghheans Maw Troblys gans Spyrys Avlan

³⁷ Ha ternos, pan dheuthons yn-nans a'n menydh, routh veur a'n dyerbynnas.

³⁸ Hag otta gour a'n routh a grias ha leverel, ‘Mester, my a'th pys, mir orth ow mab, rag ow unn flogh yw ev,

³⁹ hag otta, spyrys a'n kemmer ha desempis ev a skrij; hag ev a'n tewl gans shorys, owth ewyni, ha skant ny'n gas, orth y vrewi.

⁴⁰ Ha my a bysis dha dhyskyblon a'y dewlel yn-mes, ha ny allsons.’

⁴¹ Ha Yesu a worthybis ha leverel, ‘A henedh diskryjyk ha kammhynsek, pes termyn y fydhav genowgh ha'gas perthi? Doro dha vab omma.’

⁴² Hag ev hwath ow tos, an jowl a'n torras ha'y dewlel dhe'n dor yn shora; ha Yesu a goskas an spyrys avlan ha yaghhe an maw ha'y dhaskorr dh'y das.

⁴³ Ha marth a's tevo peub a veuredh Duw. Hag i hwath gans marth a bup-tra a wre, ev a leveris dh'y dhyskyblon,

Yesu a Dhargan y Vernans Arta

⁴⁴ ‘Gorrewgh an geryow ma yn agas diwskovarn; rag Mab an den a vydh delivrys yn diwleuv tus.’

⁴⁵ Mes ny gonvedhens an lavar ma, ha kudhys o dhiworta, ma na wodhyens gweles y styr; hag own a's tevo a wovynn orto a-dro dhe'n lavar ma.

Piw yw an Moyha?

⁴⁶ Ena dadhel a sordyas yntredha, piw anedha a via an moyha.

⁴⁷ Mes Yesu, ow kodhvos preder aga holonn, a gemmeras flogh ha'y worra rybdho

⁴⁸ ha leverel dhedha, ‘Neb a dhegemmerro an flogh ma yn ow hanow vy a'm degemmer vy; ha neb a'm degemmerro vy, a'n degemmer ev neb a'm dannvonas; rag neb yw an byghanna yntredhowgh, meur yw ev.’

Neb na Vo er agan Pynn, Ragon Ni yth Yw

⁴⁹ Ha Yowann a worthybis ha leverel, ‘Mester, ni a welas nebonan ow tewlel yn-mes dywolow y'th hanow jy, ha ni a'n lettyas, rag ny wra ev holya genen ni.’

⁵⁰ Ha Yesu a leveris dhodho, ‘Na wra y lettya; rag neb na vo er agas pynn, ragowgh hwi yth yw.’

Tre yn Samaria a Skon Wolkomma Yesu

⁵¹ Y hwarva, ha'n termyn ow tos pan vedha kemmerys yn-bann, ev a settyas y fas dhe vos dhe Yerusalem.

⁵² Hag ev a dhannvonas kannasow a-dheragdho; hag yth ethons hag entra yn tre a'n Samaritanys, rag pareusi ragdho;

⁵³ ha ny wrens y wolkomma, rag y fas dhe vos settys troha Yerusalem.

⁵⁴ Ha pan y'n gwelas y dhyskyblon Jamys ha Yowann, yn-medhons, ‘Arloedh, a vynnydh ni dhe erghi may teffo tan yn-nans dhiworth an nevow ha'ga distrui?’

⁵⁵ Mes ev a dreylyas ha'ga heredhi.

⁵⁶ Hag i eth yn-rag dhe dre arall.

Holyoryon Yesu

⁵⁷ Hag i ow mos war an fordh, nebonan a leveris dhodho, ‘My a'th hol py le pynag yth ylli.’

⁵⁸ Hag yn-medh Yesu dhodho, ‘Dhe'n lewern yma tell, ha neythow dhe ydhyn an ayr, mes dhe Vab an den nyns eus tyller vyth may hworro y benn.’

⁵⁹ Hag ev a leveris dhe nebonan arall, ‘Gwra ow holya.’ Mes ev a leveris, ‘Arloedh, gas vy kyns oll dhe vos dhe ynkleudhyas ow thas.’

⁶⁰ Mes ev a leveris dhodho, ‘Gas dhe'n re varow ynkleudhyas aga thus varow aga honan; mes ty, ke dhe bregoth gwlaskor Duw.’

⁶¹ Hag yn-medh den arall, ‘My a vynn dha holya, Arloedh, mes kyns oll gas vy dhe leverel farwell dhe'n dus y'm chi.’

⁶² Hag yn-medh Yesu dhodho, ‘Nyns yw gwiw dhe servya gwlaskor Duw an den neb a worro y leuv war an arader, ha mires war-dhelergh.’