Luk 7 - An Bibel Kernewek 20234 (Kernewek Kemmyn)

Yaghheans Kethwas Penn-kangour

¹ Wosa gorfenna oll y lavarow yn klewans an bobel, ev eth yn Kapernaum.

² Hag yth esa kethwas dhe benn-kangour, drudh dhodho, neb o klav hag yn eneworres.

³ Ytho pan glewas a Yesu, ev a dhannvonas dhodho henavogyon a'n Yedhewon ow pysi orto a dhos ha sawya y gethwas.

⁴ Ha wosa dos dhe Yesu i a elwi warnodho yn ter, ow leverel, ‘Ev yw wordhi may hwredh hemma ragdho,

⁵ rag ev a gar agan kenedhel hag ev a dhrehevis ragon an synaga.’

⁶ Ytho Yesu eth gansa. Mes pan nag esa nep-pell dhiworth an chi, an penn-kangour a dhannvonas dhodho kowetha, ow leverel dhodho, ‘Arloedh, na borth ahwer, rag nyns ov vy gwiw ty dhe dhos yn-dann ow tho;

⁷ rakhenna ny omsynsis gwiw dhe dhos dhis, mes lavar an ger, ha'm gwas a vydh sawys.

⁸ Rag my ynwedh yw den yn-dann awtorita, ha dhymm soudoryon yn-dannov, ha my a lever dhe hemma, “Ke”, ha mos a wra, ha dhe dhen arall, “Deus”, ha dos a wra, ha dhe'm kethwas, “Gwra hemma”, hag ev a'n gwra.’

⁹ Ha Yesu pan glewas hemma, marth a'n jeva anodho, hag ow treylya dhe'n routh a'n siwya yn-medh ev, ‘My a lever dhywgh, ny gevis vy kemmys fydh, na hwath yn Ysrael.’

¹⁰ Ha'n re a veu dannvenys a dhehwelis dhe'n chi ha kavoes an kethwas yagh neb re bia klav.

Drehevel Mab an Wedhwes yn Nayn

¹¹ Nebes a-wosa, ev eth yn sita henwys Nayn, hag yth esa y dhyskyblon ha routh veur ow mos ganso.

¹² Ha pan dheuth nes dhe yet an sita, awotta den re varwsa neb eses orth y dhoen yn-mes, an unn vab a'y vamm, ha hi gwedhwes, hag yth esa routh veur a'n sita gensi.

¹³ Ha pan y's gwelas, an Arloedh a'n jeva truedh anedhi, hag a leveris dhedhi, ‘Na oel.’

¹⁴ Hag ev a dheuth yn-rag ha tochya an eler, ha'n dhegoryon a hedhis; hag ev a leveris, ‘Den yowynk, my a lever dhis, sav yn-bann!’

¹⁵ Ha'n marow a sevis dh'y esedh ha dalleth kewsel; hag ev a'n ros dh'y vamm.

¹⁶ Hag own a's kemmeras oll, hag yth esens ow kormel Duw, ow leverel, ‘Profoes meur re sevis yn agan mysk’, ha ‘Duw re wrug vri a'y bobel.’

¹⁷ Ha'n lavar ma yn y gever eth yn-mes dres oll Yudi hag oll an pow a-dro.

Kannasow dhiworth Yowann Besydhyer

¹⁸ Ha dyskyblon Yowann a dherivas dhodho a-dro dhe oll an taklow ma. Ytho Yowann a elwis dhodho dew a'y dhyskyblon

¹⁹ ha'ga dannvon dhe'n Arloedh ow leverel, ‘Yw ty an den a dal dos, po ken onan a wortyn?’

²⁰ Wosa an wer dhe dhos dhodho, i a leveris, ‘Yowann Besydhyer re'gan dannvonas dhis, ow leverel, “Yw ty an den a dal dos, po ken arall a wortyn?” ’

²¹ Y'n eur na poran, ev re wrussa sawya lies den a glevesow ha plagys ha tebel spyrysyon, ha dhe lies dall ev re rosa golok.

²² Hag ev a worthybis ha leverel dhedha, ‘Kewgh dhe dherivas dhe Yowann an taklow a welsowgh hag a glewsowgh: dellyon a wel arta, evredhyon a gerdh, klavorogyon yw glanhes ha'n vodharogyon a glew, an re varow yw drehevys, dhe'n voghosogyon an aweyl yw pregewthys;

²³ ha gwynnvys neb na vo sklandrys ahanav.’

²⁴ Wosa kannasow Yowann dhe omdenna, ev a dhallathas kewsel a-dro dhe Yowann dhe'n routhow, ‘Pandra ethewgh dhe-ves dhe'n gwylvos dh'y weles? Korsenn kryghyllys gans an gwyns?

²⁵ Mes pandra ethewgh dhe-ves dh'y weles? Den gwiskys yn dillas medhel? Otta, tus gwiskys yn dillas splann hag ow pewa attes, ymons yn chiow myghternedh.

²⁶ Mes pandra ethewgh dhe-ves dh'y weles? Profoes? Ya, my a lever dhywgh, ha moy ages profoes.

²⁷ Hemm yw neb may feu skrifys anodho, “Awotta, my a dhannvon ow hannas a-rag dha fas, neb a dharbar dha fordh a-dheragos.”

²⁸ Rag my a lever dhywgh, yn mysk an re genys a venynes nyns eus nagonan brassa ages Yowann Besydhyer; mes neb yw lyha yn gwlaskor Duw yw brassa agesso ev.’

²⁹ Hag oll an dus, hag ynwedh an dolloryon, pan glewsons hemma, a aswonnis ewnder Duw, hag i besydhys gans besydh Yowann.

³⁰ Mes an Fariseow ha'n laghysi a skonyas towl Duw ragdha, hag i heb bos besydhys ganso.

³¹ ‘Rag dhe bana dra y hwrav vy hevelebi tus an henedh ma, ha dhe bana dra yns i haval?

³² Haval yns i dhe fleghes a'ga esedh y'n varghasva ow kelwel an eyl dh'y gila ha leverel, “Ni a bibas dhywgh ha ny wrussowgh donsya, ni a ganas galargan ha ny wrussowgh oela.”

³³ Rag Yowann Besydhyer a dheuth heb dybri bara nag eva gwin, ha hwi a lever, “Yma dyowl ganso.”

³⁴ Mab an den a dheuth ow tybri hag owth eva, ha hwi a lever, “Gargasenn ha penn-medhow yw, koweth tolloryon ha peghadoryon.”

³⁵ Mes furneth yw prevys ewn gans oll hy fleghes.’

Peghadores yw Gevys

³⁶ Yth esa onan a'n Fariseow ow kovynn orto dybri ganso, ytho ev eth yn chi an Farise, hag esedha dhe dhybri.

³⁷ Hag otta, yth esa unn venyn neb esa y'n sita, peghadores. Ha pan wodhva ev dhe vos esedhys yn chi an Farise, hi a dhros fiol alabaster a unyent;

³⁸ hi a sevis a-dryv dhodho ryb y dreys, owth oela, ha dalleth glybya y dreys gans hy dagrow ha'ga sygha gans hy gols; ha hi a amma dh'y dreys ha'ga ura gans an unyent.

³⁹ Ytho pan y'n gwelas an Farise neb a'n galwsa, ev a gewsis dhodho y honan ow leverel, ‘Mar pe hemma profoes, ev a wodhvia piw ha py par benyn yw hi neb a wra y dochya, rag peghadores yw hi.’

⁴⁰ Ha Yesu a worthybis ha leverel dhodho, ‘Simon, yma dhymm neppyth dhe leverel dhis.’ Yn-medh ev, ‘Mester, lavar.’

⁴¹ ‘Yth esa dhe unn kresysor dew gendoner; yth esa dhe'n eyl kendon a bymp kans diner, ha dh'y gila hanter-kans.

⁴² Pan na yllens pe, ev a avas dh'aga dew. Ytho pyneyl anedha a'n kar moy?’

⁴³ Simon a worthybis ow leverel, ‘Dell dybav, ev may feu moy gevys dhodho.’ Yn-medh ev dhodho, ‘Ewn re vreussys.’

⁴⁴ Ena ev a dreylyas dhe'n venyn ha leverel dhe Simon, ‘A welydh an venyn ma? My a dheuth y'th chi; ny resys dhymm dowr dhe'm treys, mes hi re beu ow klybya ow threys gans hy dagrow ha'ga sygha gans hy gols.

⁴⁵ Ny resys dhymm bay, mes a-ban dheuth vy a-ji ny hedhi hi amma dhe'm treys.

⁴⁶ Ny wrussys ura ow fenn gans oyl, mes hi a uras ow threys gans unyent.

⁴⁷ Rakhenna y lavarav dhis, yma gevys dhedhi hy feghosow pals, rag hi dhe gara meur; mes ev may ma boghes gevys dhodho, boghes ev a gar.’

⁴⁸ Ena ev a leveris dhedhi, ‘Yma gevys dhis dha beghosow.’

⁴⁹ Ha'n re o esedhys ganso a dhallathas leverel an eyl dh'y gila, ‘Piw yw hemma neb a av ynwedh peghosow?’

⁵⁰ Hag ev a leveris dhe'n venyn, ‘Dha fydh re'th sawyas; ke yn kres.’